Mataafa a Nuqussa a paayyota 4 - Mataafa Qulqulloota

Orra Selemooni mukissampaya kode

¹ Nuqusase Selemooni piita Isira'eeli piisa qara'e nuqusume.

² Orrase a mukissampaya kodade nefo, asariyaasi inna Satooqi qeesitta.

³ Hellaa Shiisha Elihoorefi isho Akkiya taafampaya. Iyyosaafiti inna Ahiluuti taafampayta torra.

⁴ Pannayyaasi inna Yodaahe saara xela oranna. Satooqi isho Apiyataari qeesewwa.

⁵ Asariyaasi inna Nataani saara mukissampaya. Saapuuti inna Naataani qeesitta isho dehaamampayta nuqusa.

⁶ Ahishaari saara tika mankisteeta, Atooniraami inna Apta saara koda hupna.

⁷ Selemooni saarra a isha isho tikaadi samayta Isira'eeli piisa qara qallapa pohona kudanka lakki qapa, ishootta ka paroppa leyaa leyaan matta mina qallapa dehanni.

⁸ Maxxadaasso nefo piitase kunkunnawwa qapto a Efreemi qaraayye Penehuuri inna Huuri saara

⁹ ka Maaqasi ka Shaalipi ka Peetesaamesi ka Elonpeeti ka Haanaani qaraayye Penseqeeri inna Seqeri.

¹⁰ Saara Arupooti ka Sokooti isho piita Heferi kuli qaraayye, Peenheseti inna Heseti saara.

¹¹ Piitase a Doori piisa qaraayye, Aminataapi isase enenta Selemooni Taafeeti heme saara.

¹² Ta'inaaki ka makito ka Seretaani kapaayye, piita Peetesameeki piisa ka Peetesaami paayyatte haka Apeelimihoolati ka Pene'ati ka Iyyisira'eli ka Yoqimayimi kama disi piisa qara'e, Pe'ana inna Ihilooti saara.

¹³ Katama Kele'adi Raamooti ka eeyyeyye palewwasene haminta Ya'iri a inna Minaase kara ca ka Paasaani karaayye awraaja Arkoopi ka katamaddasene kukutta kawwattan kapa qorrene ka xarrada sipla qapa kunda lehi qaraayye Keperi saara.

¹⁴ Mahanaayimi qaraayye Ahinataapi inna Iiddo saara.

¹⁵ Ka Niftaleemi qaraayye, Akimaasi isase Pasmaati enenta Selemooni heme saara.

¹⁶ Aseeri isho Pe'alooti qaraayye, Pe'anne inna Kuusi saara.

¹⁷ Yisaakoori qaraayye, Iyyosafiti inna Faaruwwan taanynya.

¹⁸ Piniyaami qaraayye, Saami inna Eella saara.

¹⁹ Kele'adi piitase a Sihooni a nuqusa Amoorata ka piitase a Ooki a nuqusa a Pasaani qaraayye Keperi inna Uuri pattan mukissampayta.

Poha kuyaata mina Selemooni pohonaane

²⁰ Samayta Yihuta isho a Isira'eeli lekuma'e hinkaajjeta daka kela'e pahan ka dammi ka ikkini ka xasoonni.

²¹ Selemooni ka kira efraatiisiti paayyatte haka piita Filisteemi isho haka xeela Kipsiti mankistewwa piisa mukinni. Ikka haka co'e, isha kapparri ka ishi piddammi.

²² Selemooni qallapa a kuyyaata mina ishi kallo daamma a lawame taara kunda sessa ka daamma unta ata ka a tiima taara kunda lehi.

²³ Ka xaraaffa meere kudani ka xormada dawwanna kunda lakki ka laahadda isho qolpaya dippa ka sene maliiyyiiw, katamta ka kuumanta ka kaappurashsha isho xampira dammane.

²⁴ Selemooni katama Tiffisati paayyatte haka Kaasaati qoota mankistewwa kirra Efraatiisiti qinda dumaatetatin ca piisa mukinno malla, qinda piisanne nakayta qapnaade.

²⁵ Parra Selemooni nuqusume piisa oppaayye Taani paayyatte haka Persapehiti'i, nama Isira'eeli isho a Yihuta ka wayneetaadi isho qoraadi a hilteeta kelandesa nakaytan qaa'ini.

²⁶ Selemooni moona a fartada sarakeella tinna kuma afuri ka fartada kuma kudanka lakki qapa.

²⁷ Saara awraajjadda ka matta mina'e leyaa leyaanne nuqusase Selemooni isho a damta eeyyepa aananna piisa'e a oppaayye in qajinnin mali qallapni.

²⁸ Nama piisa ka pora a parpaaccisnitto opa akka ishi kiten mina'e, fartadasene sarakella tinna isho a pilaati'i poorta isho ohan anni.

Ookuma Selemooni

²⁹ Waaqa ka Selemooni ookuma ka upna kutta ka matta a we piisa qapanno ishi daasha.

³⁰ Ookuma Selemooni ookuma a orra qinda piirtotati qato isho a piita Kipsi piisa qara jaalli.

³¹ Maana malla isha orra piisa qaropa ookuma jaalliiy ka Eysira'elittase Etaani ka hellaa Mahooli Kemaani ka Kalqali isho Tera'i kuli qara jaalliiy. Kurraadi ka mankistewwa a kapandesa ca piisa oppa dakaade.

³² Isha deymatteeta kuma sessa haasawade. Saaraadi a saarshe nefo kuma ka keni kayni.

³³ Qoota qoraati desaaw, talta Lipanoositi paayyatte haka hansaabitta a kawwattoppa dehete haasawade. Ka qoota pinaana ka a xampra ka a uumata a piitandesa titmanno isho qoota murkujaati desa haasawade.

³⁴ Nuqussa piitadda a turan ookumaadi dakaye piisa kapaayye, orra ka ookuma Selemooni dakkaysatta deeni.