Mataafa a Nuqussa a paayyota 3 - Mataafa Qulqulloota

Akkima Selemooni Waaqa qara ookuma qinsade

¹ Selemooni daltayta nuqusa Kipsi a Feri'ooni kodde ka enenta Feri'ooni heme. Ka haka tikaadi a mankisteeta ka tika Waaqa qulqullitteeta isho kawwatta katama Yursaalami dawno ka dikkinno kara'e, katama Taawwiti kara isheetta xaaye.

² Sitiiyyi qoota maxxa Waaqati tika in qupammin malla, samayta kunkunnawwa qara'e kalisoota kalinni.

³ Selemooni iWaaqa jaalanni ka taanteta aappaayshoti a Taawwitin kallaanni. Ma xoori kunkunnawwa qara'e kalisoota kalinni ka tankarta qayyanni.

⁴ Kunkunnaata a qara sakatannaan a kutta qoota Kepa'oni koddite malla, nuqusa ka kalisoota dehassa'e, eeyyepa aane. Selemooni ka poroose a kalissota qara kalisoota a kupannitto kuma takka dehayshe.

⁵ Kepa'oniiyyi Waaqa ka Selemooni halkeetta olsaappan akkaade. Ka ishi kide, “ Wa an ke daasha a heenta piisa qinsado.”

⁶ Selemooni ka kide, “Aappinno Taawwiti qoota dukaata ka hanqeeta ka karitta fayyaatin ke tura kallaade malla, xoona kuttaya isha orxaytaayti akkisse. Ka xoonosen kutta ishi tooytite ka akkima awwe koddite mina'e inna sufaanetaadi qara kuti'a ishi daasse.

⁷ Oo Waaqqo Poqallaayyo ana orxaytaayti qeette ka pakka aappinno a Taawwiti oppa nuqusumisse. Anti xoori an inna shakkaya umma atta akka sooknaan ka kullinaan an upo.

⁸ Anti orxaytaayti samaytase xaayti a reexatte kutta, a lekumaadi qaran xaate'e, dikama ka dikkatta in koddinini oppaayyen ca.

⁹ Semmalla akkan a paxaara ka a neeqa olkela reexo'e, ka samaytaayti muksho'e, matta ookuma qapo ana orxaytaayti daashe. A taakiti ayno samayse xaayti kutta mukissa ettansha?

¹⁰ Qinseetose a Selemooni qinsade ka Waaqa xasasse

¹¹ Waaqa ka ishi kide, “Qoota issi para dera, taaki teyanta, taakki akkan nyaapaayti piro a qinsannin ka dukaata akka ka samayta mukissa'e ookuma qinsatte malla,

¹² wa qinsatte in ke koda. Ka matta upna isho ookuma qapo a nama apari turan in akkannin ka itturopa nefo in qapnaannin ke daasha.

¹³ Ka teyanta isho ulfeena a atti a qinsannin kuli ke daasha. Umma haka kittooyye nuqussa piita oppaayye, a ke kayo in caado.

¹⁴ Kadi aappaayshin Taawwiti mina'e saantiyyon annittaayye ka taantetiyyo ka ajajiyyo tooytaannittaayye, paraayti in deraysha.

¹⁵ Selemooni ka impase ka akka olsa koddite upnaade ka Yursaalamipa tiitaawe ka taapotase a kodayteeta Waaqa tura qa'ade ka kalisootase kupannitto isho a nakayta dehayshe ka mukissampayaadi damta kode.

Akka Selemooni ookuman deexa mure

¹⁶ Awta takkaayye almalewwa iskatta lakki ka de'en ka nuqusa tura qa'aden.

¹⁷ Ishootta oppa takka ka kiite, “Poqallaayyo iskatteese isho ana tika takka karan ollin kalla. An ollin tikase kara kallooyye, anti ka inna xaaye.

¹⁸ An anti xaaye kuyyaata sessa kammaayyeew, isheetta ka inna xaayteew. Tikase kara ino patta ollin ca; umma nama pila ino quda in co.

¹⁹ Qoota qara mukte malla inna iskatteetositi ka halkeette to'en.

²⁰ Ikka halkeette walakkaappa xaate ka an anti orxayteetaayti mukeeyye, ana kela innaayyo qeette ka iskela mukkisatte ka innaadi ato'e qeette ka ana kela mukkisse.

²¹ Eten teykanta innaayyo luukkissa xa'eyye, a to'e'en akke. Eten teykanta la'aytoppa fayya quda tooynooyye, akkima innaayyo an anti xaaye'en koddininin upnaade.

²² Iskatteetase a taaka ka kiite, “Inna! Inna to'e xaayti a ca xayyo.” A paayyota ka kiiteewwe, “Assen! Inna to'e xaayti a ca xayyo.” Ka nuqusa tura asse oli shiishni.

²³ Nuqusa ka kide iskatteeta takka ikiini, “Innoosen ca innaayyo. Sene to'e xaayti. A taaka ka kiiniwwi darta. Inna to'e xaayti, a ca kan xayyo.

²⁴ Semmalla koraateta ana' qeeda” Ikka ishi koraateta qeeden

²⁵ ikka kide, “Innoosen ca lakki kaa'a ka paka takka takka daasha ka takka takka daasha.”

²⁶ Qoota karittaadi in ettaninnin malla aayya opa innasene caati ka nuqusa kiite, “Oo poqallaayyo! Innoosen ca alle isheetta daashe diisheey in ishshan.” A taaka xoori ikiite, “Xayyo in koddinin umma xaayti in koddinin alle lakki kaa'a.”

²⁷ Nuqusa ka oori kide, “Innoosen ca in ishshan ma qeeda ka iskatteetose a paayyotati daasha isheettan aayyaasso'ey.

²⁸ Samayta Isira'eeli ete muroosen a nuqusa mure dakayeeyye, dukaata mura'e akkima ookuma Waaqa qapo upnaade ka nuqusase fuure.