Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Mataafa a Nuqussa a paayyota 2 - Mataafa Qulqulloota


Dehamta Taawwiti a pirampirati Selemooni dehaame

1 Taawwiti ete kuyyaataadi a toota kela foolsannittooyye innaadi Selemooni dehaame ka kide,

2 “Anti pora nama piisa oppan anno oppannen aanaay, semmalla kokkonnaado, ka nama kodde

3 ka ajaja a Poqalla Waaqaayti tooytaado. Pora a oppopa annitto pisaayye, wa koonitta piisa akka ke olkela teyane'e, akka seera Muuse oppa taafammte mina'e, poraadi ka saantaadin aane ka taantetaadi tooytaado ka ajajaddaadi ka seeraadi isho tampewwaadi tooytaado.

4 Sitiiyyi kippeetase a Waaqa qootiyyo desa kide, ‘Oton hellaatti saantaaysho tooytaanni ka karittaaysho ka napseetaaysho piisan ana tura amanamaan kallaanniiyyi, sanynyeetaayti oppa nama sufaaneta Isira'eeli qara kuti'o an ke an daptisho.’ dikkisha.

5 Semaliiyyiiw Iyyo'api inna Siruyya wa ana qara kode ka wa ajajampayasene lakki a xela oranna Isira'eeli qara kode i''upta. Akkima Apeneeri inna Neeri isho Amesaayi inna Yeteru leyshe ka diika ishootta orannaappa tuqen kapa'e, eta nakaytati ishootta qara haalota pooyye ka salpataadi a surraappa hidanno isho xopaadi a loqqa kela kalsanna diika haalota orannaatin lahe i'upta.

6 Semmalla ookumaaytin akka koonitto kode ka haka raakno ka nakaytan toonoti eeyye isha in diishan.

7 Ma xoori hellaa Parsiili a Kele'adittati paxaarumta kode ikka orra ke olli dammo olli damen. An innaassin Apeseloomi tura qaheeyye, i'ana qaarqaareneey.

8 An Mehanaayimipa aaneeyye, takka jiija neeqa ana jiije, kafa Piiniyaamippa Saami inna Keera, Pahurimittase ke kapaayye are ca. Ma xoori ete Yurtaanoosipa ana mina lekkadeeyye, maxxa Waaqatinnin ishi xaxade ka kide, koraatetan an ke an ishsho.

9 Ma atti a ooka nama'ey, a dapa in qapnini mina isha in diishan; wa qara koota i''upta arretaadi diikan lahe ikka to'o ka hawlamo.”


Toota Taawwiti

10 Sekkamma Taawwiti ka to'e ka katamasene xaadi a Yursaalami kara hawlame.

11 Taawwiti Keprooni qara'e para tappa nuqusume ka Yursaalami kara'e, para kunda sessa sessa nuqusume. Olloppa Taawwiti para kunda afuri Isira'eeli qara nuqusume.

12 Selemooni ka suafaanetase aappaayshoti a Taawwiti qara kuti'e mankisteetaadi nefo ka akata kokkonnaatte.


Toota Atooniyaasi

13 Sekkammaayye Atooniyaasi inna Akiti ka Persaapehi aayya opa Selemooni kapopa aane. Isheetta ka ishi kiite, “Hela nakayta'ewwe deete?” Isha ka kide, “Aa nakayta'ewwen de'e.”

14 Ikka kide, “Waan ke lelada'en qapa.” Isheetta ka ishi kiite, “Leladunka.”

15 Ikka isheetta kide, “Akkima mankisteeta xayyo koddite akkan anti nuqusaumo'e Isira'eeleta piisa ka ana qaropa ilda tiitase i''upta. A koddito ma qoota Waaqa a xaadi kode malla, mankisteeta itiitaawte ka a innaanno koddita.

16 Amma nefo we takkanen ke qara kaassanniiy, anan dawran.” Isheetta ka ishi kiite, “Kaassadunka.”

17 Ikka isheetta kide, “Isha ke qara'en tiitooy, akka Apisa Sunaamitteetase hemitta ana' daasho'e, nuqusa Selemooni ana naappado.”

18 Persaapehi ka kiite, “Ipaxaari ana pakkaaytippa nuqusa lela.”

19 ete Persapehi qoota Atooniyaasi desa ishi lela'e nuqusase Selemooni kapopa kulliteeyye, nuqusase ka isheetta teyyatta ela qa'ade ka isheetta kaareta oorshe; ka sufaanetaadi qara kuti'e ka akka sufaana pila ishi qeedane ajaje. Ikka qinda akkittatin isha kapa kutiite.

20 Isheetta ka ishi kiite, “Waan ke qara kaassada shakkayaan qapaay, atara ana qara'en tiitan.” Nuqusa ka isheetta kide, “Ke qara antiitooy, aayye kaassado.”

21 Ikka ishi kiite, “Apisa Sunaamitteetase innaassin Atoniyaasi hemitta daashe.”

22 Nuqusase Selemooni ka oorshe ka aayyaassoti kide, “Maana'e Apisa Sunaamitteetase patta Atooniyaasi kaassanni? Isha qartinnooy, mankisteeta kuli ishi a kaassatto? Ka qeesittase Apiyaataari isho Iyyo'api inna Suriyya kuli'i a kaassatto?”

23 Sekkammaayye nuqusase Selemooni ka maxxa Waaqatin xaxade ka kide, “Oton afoosen a haasawade minanne opani Atooniyaasi in ikanniniiyyi, a Waaqa asseew ana qara kodo ka qaran jaalsho.

24 Semmalla Waaqase ana kokkonnayshe ka suufaaneeta aappinno a Taawwiti qara ana kutiishe ka akka ana kippeeta daashe qara'e mankisteeta ana qaatishennen xaxanni; Atooniyaasi awwe ito'a.

25 Nuqusase Selemooni ka akka Atooniyaasi ishsho'e, Pannaayyaasi inna Yoodaahe erke. Pannayyaasi ka Atooniyaasi dayshe ka ishshe.


Daanamitta Apiyataari isho toota Iyyo'api

26 Nuqusase ka qeesittase Apiyataari kide, “Atti allu toota ke parpaaccisni ma, qoota aappinno Taawwiti turan desa taapota Waaqa a we piisa qara qapo haate malla ka rakkowwa aappinno qara kaye piisa oppa aappinno olli rakkatte malla, amma ke an ishshooy, dulase xaayti a Anatooti kara co opa nakaytan kale.

27 Semmalla Selemooni ka qeesitta Waaqa koddeeta qaraayye alle Apiyataari daane. Seden qaaletase a Waaqa Seelo karaayye qoota toota Eeli desa haasawade ka dikkatte.

28 Otootose ka Iyyo'api qara kayte; Iyyo'api kadi punu Apseloomi quda in koddinin nefooyye, qoota Atooniyaasi quda kodde malla tukkanase a Waaqa kelopa qahe ka kaassa pora kalisoota quda qapade.

29 Akkima Iyyo'api tukkana Waaqa kelopa qahe ka pora kalisoota kapa co, nuqusase Selemooni ka dakaye ka Pennayyaasi inna Yoodaahe ajaje ka kide, “Aane ka isha ishshe”

30 Pannayyaasi ka tukkanase a Waaqa kelopa kulle ka Iyyo'api kide, “Nuqusa ike kiini are kela sooke” Isha ka kide, “Ansooko are kela'en to'a.” Pennayyaasi ka aaneew ka wa Iyyo'api ishi kide nuqusa lele.

31 Nuqusa ka ishi kide, “Akka kide qara kode ka isha ishshe ka hawwle. Ka ana ka tika aappinnoqaraayye diika a Iyyo'api patta tuqe jaqe.

32 Ha isha a aappinno Taawwiti in upnin mali nama lakki a isha qaropa hanqeelluma jaalla ka wayya qara xa'e ka koraatetan ishootta leyshe; ishootta nefo isase saara xela oranna a Isira'eeli kodde Apeneeri inna Neeri ka Amesaayi inna Yeteri isase saara xela oranna a Yihuta kodde. Waaqa diikose isha qaropaaw oorsho.

33 Semmalla diikaaysho haka paraparati a Iyyo'api, isho sanynyeetaadi qaropa ooro, Taawwiti ka sanynyeetaadi ka tikaadi isho sufaanetaadi xoori, haka paraparati a Waaqa kapa ishootta nakayta koddo.

34 Inna Pannayyaasi Yodaahe ka aane ka Iyyo'api dayshe ka ishshe. Ikka koommaytoppaayye tika mattaadi kara mookame.

35 Nuqusa ka pakkaadippa'e, Peniyaasi inna Yodaahe saara xela orannaati kode. Ka pakka Apiyataari oppe'e, qeesittase Satooqi shuume.


Toota Saami

36 Nuqusa ka Saami halacciise ka ishi kide. “Yursaalami kara tika qupado ka eeyye kallaado. Ka arepa ka arepa in kidan.

37 Kuyyaata eeyye kara sookto ka kirra Kitirooni tuullitooyye, akkima keeto tooto upnaado. Diikaayti ke qaropaaw ooraay.”

38 Saami ka Nuusa kide, “Wa kiite ipaxaari. Nuquso poqallaayyo, anti orxaytaayti akka kiite qara'en koda.” Ka Yursaalami kara eta kutta kallaade.

39 Para sessa kammaayye xoori orxaya Saami oppaayye nama lakki xa'e ka nuqusase a Keetti Ankusa inna Me'aka kelopa qahe. Ikka Saami lelen ka kidene, “Orxayaatti Keetti kara caan.”

40 Saami ka xa'e ka harrewwaadi fee'ade ka orxayaadi fada'e, Keettipa Ankusa kapopa aane ka Keettiiyyi orxayaadi qeede.

41 Ikka akka Saami Yursaalami xata Keettipa aane ka tiitaawe Selemooni lelen.

42 Nuqusa ka Saami halacciise ka ishi kide, “An ke an lelle ka an kiine ‘Kuyyaata oppaayye are kara sookto ka pora pila opa antooyye akkima tooto dukaatan upnaado.’ Ka maxxa Waaqatin ke an xaxacciisne? Atti akka ana a kiine wa kiite ipaxaariiy in ke ajajama?”

43 Ka kuli maana malla xaxa a Waaqa tura xaxatte isho ajaja an anti ke daashe a tooytinin?

44 Semaliiyyiiw nuqusa ka Saami kideewwe, “Neequmta aappinno Taawwiti qara koote karittaayti karan xata i''upta. Semmalla Waaqa neequmtaayti ke qaropaaw oorsha.

45 Nuqusase Selemooni xoori i'eeppisama. Suufaaneta Taawwiti ka fuula Waaqa tura'e haka paraparati kallaatta.

46 Sekkamma nuqusase ka Pannayyaasi inna Yoodaahe ajaje. Pannayyaasi ka aane ka Saami dayshe ikka to'e. Mankisteeta ka oori harka Selemooni oppa kokkonnaatte ka qa'atte.

ကြှနျုပျတို့နောကျလိုကျပါ:



ကြော်ငြာတွေ