Mataafa Otoowwa a paayyota 9 - Mataafa Qulqulloota

Samayta Isira'eeli a poojama kela kale

¹ Isira'eeleta piisa ka akka meeraaysho qara dikamte mina'e, maskapa nuqussaassoti qara taafamte; Yihutaata ka juppootaysho minanne piita Paapilooni opa poojamte.

² Orra paayyota qara piitase xaaysho a oppa daladen a Isira'eeli opa tiitaawe ka palewwaasso kara safare, qeesewwa ka Lewaata ka orra tika qulqulloota kela koda koono isho Isira'eeleta pila kuli.

³ Kafa a Yihuta ka a Piniyaami ka a Efreemi isho a Minaase oppaayye, orrose'e Yursaalami kara kallaatta aane.

⁴ Kafa inna Yihuta a Faaresi oppaayye Utaayi inna Amihuuti, Amihuuti kan inna Omiiri, Omiiri kan inna Imiri, Imiri kan inna paani,

⁵ sanynyeeta Sheela oppaayye, Asaaya qaarta aappaayshoti ka hellaadi a diira ollinni,

⁶ sanynyeeta Saarahi oppaayye Yi'u'eeli isho hellaasso. lekuma a kafa Yihuta a Yursaalamipa kallaatta aane nama dippa lehi ka kunda sakal.

⁷ Kafa Piniyaami oppaayye inna Haasenuu'a Hotaawiya ka inna Hotaawiya Meshulaami ka inna Meshulaami Saalu

⁸ ka inna Yirohaami Yupineeya ka oopa Miikiri inna Uusi Eella, ka inna Yupineeya Re'u'eeli ka inna Re'u'eeli Shefaatiya ka inna Shefaatiya Meshulaami.

⁹ Akka maskapa meeraayshoti qara taafamte mina'e kafa Piiniyaamippaayye lekuma samaytaayshoti dippa sakali ka kunda keni lehi. Diirrosen piisa toollaasso qara saarra.

Qeesewwa Yursaalami kara kala

¹⁰ Qeesewwasene nefo Yitaa'iya ka Yihoyaaripi isho yaakini;

¹¹ Asaariyaasi isase saara tika qulqulloota kodde inna Hiilqiiyya, Hiilqiiyya kan inna Meshulaami, Meshulaami kan inna Sadooqi, Sadooqi kan inna Meraayoti, Meraayoti kan inna Ahiitupi.

¹² Ataaya inna Yirohaami, Yirohaami kan inna Paashihuri, Paashihuri kan inna Maalkiyya. Maa'isaay inna Adi'eli, Adi'eli kan inna Yahiseeri, Yahiseeri kan inna Meshulaami, Meshulaami kan inna Meshiilemiiti, Meshiilemiiti kan inna Imeeri.

¹³ Qeesewwa a toolla tura saarra kodde, nama kuma takka ka dippa tappa ka kunda lehi kayni. Ishootta nefo koda tika qulqulloota kela kodammo piisa'e ookuma qapan.

Lawaata a yursaalami kalto

¹⁴ Lewaatoppaayye sanynyeeta Meraari Shemaa'iyya inna Hashupi, Hashupi kan inna Asiriqaami, Asiriqaami kan inna Hashaapiya.

¹⁵ Paqipaxaari ka Hereshi ka Kalaali ka Mataaniya kan inna Miikka. Miikka kan inna Siikiri, Siikiri kan inna Asaafi

¹⁶ Ka Aptiyu, Aptiyu kan inna Shemaa'iyya, Shemaa'iyya kan inna Kalaali, Kalaali kan inna Yidutaani; ka Perekiya, Perekiya kan inna Aasa, Aasa kan inna Elqaannase palewwa Netoofata kara kallaadeti.

¹⁷ Orra a xarra tika qulqulloota tooytino sene. Shaalumi ka Aquupi ka Talmooni ka Ahimaani isho Hellaasso; saaraysho kan Shaalumi.

¹⁸ Ishootta nefo haka awweti'i xarrase a tika nuqusa qinda piirtotatin co oppa'e kitame. Ishootta xarra safara Lawaata'e tooytini.

¹⁹ Oopa Epiyaasaafi inna Qore Shaalumi isho hellaa a toolaayshoti akkima xatta kafaaysho xarra a tukkana Waaqa tooytino mina'e, ishootta nefo asseew tooytini.

²⁰ Xatta Finihaasi inna Ali'asaari, tooytampaya xarra qara saarummi; Waaqa nefo ka isha olli ca.

²¹ Sakkaariyaasi inna Meshelemi xarrase a tukkana Waaqa'e tooytiniiw.

²² Akka xarradasene oppan kullinaan tooytane'e, orra reexame olloppa nama dippa lakki ka kudanka lakki kayni. Ishootta nefo palewwa a kara kalane karaayye akka meeraayshoti mina maskapa qara'e taafamen; a tooytampayosen porraasso oppa kite, Taawwiti isho akkampaytase Saamu'eeli.

²³ A tukkanase qulqullaawe tikase a Waaqa tooytina nefo ishootta isho sanynyeetaaysho.

²⁴ Ishootta ka qinda piirtotatin ka qinda dumaatatin ka qinda qutattatin isho qinda tupattatin qindada afur piisan tika Waaqa tooytini.

²⁵ Hellaasso ka paleewwaasso karaayye eta etaan deeni ka kuyyaata tappa tappa olkamma tooytini ka ishootta qaarqaarri.

²⁶ Lawaata nama afuri isasene tooytampaya tika Waaqa qara saarumma xoori tika Waaqa kelaayye kaatadda isho tika meeha tooyta'e atara teyyaden.

²⁷ Ishootta qoota tikase a Waaqa tooytinaan ka teykanta teykanta pannaan malla, eeppandesaaw mukni.

Lewaata pila

²⁸ Ishoottoppa a deemo mehadda a tika qulqulloota kela koda qara nakayna qara saarra ka oto meehase koda sookno ka kullinooyye dikni.

²⁹ Lewaata a deemoow meeha tika qulqulloota qara tooya'e kitamte ka daamma ka taadeta wayneeta ka sayteeta ka tankarta isho qimaamewwa qara tooyni.

³⁰ Qeesewwappaayye a deemo qimaamewwa shittoota ollin laha'e kitamen.

³¹ Lewittase Matitiya kidammo qaartase a Shaalumi a Qoritta, laaqqota a shashakka a kalisoota laaqa'e kitame.

³² Laaqqotase a tika qulqulloota sampata mina harmissa'e, hellasene a Qe'aati oppa a demo kitame.

³³ Sammaarewwasene a Lewaata oppaayye a saarra toolla kodde'ew qoota koda halkeetta ka kuyyaata koonaan qapan malla, akka kaatadda a tika qulqulloota kara kallaadan ka koda pila in koonini'i kitamen.

³⁴ Sene piisa Lawaatoppa saarra toolla ka akka meeraysho mina taafamen ka Yursaalami kara kallaanni.

Meera toola opa Saa'ooli a xatta

³⁵ Yi'eeli katama Kepa'ooni qupe ka kara kallaanni. Iskatteetaadi nefo Maa'ika kidammi.

³⁶ Innaadi a kuuta Apitooni, a kamma qaqqate'ew, Suuri ka Qiishi ka Pa'aali ka Neeri ka Nataapi

³⁷ ka Ketoori ka Ahiyo ka Sakkaariyaasi ka Miiqlooti.

³⁸ Miiqilooti aappa opa Shiimi'a. Ishootta Yursaalami kara'e daltayaasso kapa kallaanni.

³⁹ Neeri Qiisi xaaye; Qiisi ka Saa'ooli xaaye; Saa'ooli ka Yonaataani ka Malkiishu'a ka Apinaataapi isho Eshipa'aali xaaye.

⁴⁰ Yonaataani Meriipa'eli xaaye, Meriipa'eeli ka Miikka xaaye.

⁴¹ Hellaa Miikka a diira, Piitooni ka Meleki ka Taare'a isho Ahaasi kidammi.

⁴² Ahaasi ka Yaa'ira xaaye; Yaa'ira ka Alemeti ka Asimaaweti isho Siimiri xaaye; Siimiri ka Moosa xaaye;

⁴³ Moosa ka Piini'a xaaye; Piini'a ka Raafaya xaaye; Raafa ka Eli'aasa xaaye; Eli'aasa ka Aseeli xaaye;

⁴⁴ Aseeli nefo hellaa a diira lehi qapa. Maxxadaasso, Asiriqaami ka Pokeru ka Isma'eeli ka She'ariya ka Aptiyu isho Haanani kidammi. Sene hellaa Aseeli.