Mataafa Otoowwa a paayyota 29 - Mataafa Qulqulloota

Daassawwa a tika qulqulloota qupa daasame

¹ Sekkammaayye nuqusase Taawwiti ka xora samayta pisati kide, “Innasene xayyo Selemoonise a Waaqa reexade nama shakka umma paata kara in upooy, tikoose kutta qupammitto nefo nama qupammi in kitto ma Waaqa'e qupammiiy; semmalla kodaadi ikokkoki.

² Tin anti tika qulqulloota a Waaqiyyo qupa'e waan qapa oppaayye koda a warqeetan kodammo'e warqeeta ka koda sipla dakaratin kodamo'e sipla dakara ka koda a sipla poorati kodamo'e sipla a poora ka koda siplan kodamo'e sipla ka koda qoyran kodamo'e qoyra ka a alleeta karan qaqqapsiissaatin kodamo'e dakadda merkidi ka a kelqedooni ka dakadda a pissa lekayta qapa a heraan kokokkoka ka daka ata kuttumtan in qobbeesse.

³ Semaliiyyiiw jaalala an tika qulqulloota a Waaqiyyoti qapo malla, an sede turan daashe qaran qapto'e, tikase a Waaqiyyo qulqullaawte'e waan qapa oppaayye warqeeta isho sipla dakara an qapon daashaaw.

⁴ Sede nefo warqeeta ofiri mekliteeta kuma sessa ka sipla dakara a pale mekliteeta kuma tappa akka qussa tikoosetin sirane'en daashe.

⁵ Ka akka harmoota warqeeta isho a sipla dakara koda warqeeta isho a sipla dakara oppa kooto malla daashe. Ka kuli awwe ayno hennaadin Waaqa xasan daassata heena?

⁶ Sekkammaayye saarra toolla ka a kaffa Isira'eeli ka shaalaqadda ka motoloqadda isho ajajampaya a koda nuqusa qara kitame piisa ka heennasotin daassata daashen.

⁷ Daassata tikase a qulqulloota a Waaqati daashen nefo, warqeeta mekliteeta kuma ken ka warqeeta daariiki kuma kudani ka sipla dakara mekliteeta kuma kudani ka sipla a pora mekliteeta kuma kudanka sette ka sipla mekliteeta kuma kudan heennaassotin daashen.

⁸ Nama daka a heraan kokkoka qapo piisa ka Kershoonittase Yihi'eeli isase tooytampayta meeha a tika qulqulloota kodde qudanne tika qulqulloota a Waaqati daassata daashen.

⁹ Qoota heennaasso ka karittaaysho piisan daassase daashen malla, samayta ixasoode; nuqusase Taawwiti ka asseew harrmo xasoode.

Taawwiti akka Waaqa kalataysade

¹⁰ Taawwiti ka xora samayta piisa tura'e, Waaqa kalataysade ka kide, “Oo Waaqqo! Waaqa aappinno a Isira'eeli a xattati paayyatte haka paraparati kalata a ke kayo.

¹¹ Oo Waaqqo! Wa piita qara ca isho a moonteeyye ca piisa xaaytiiw, kuttuma ka hupna ka ulfeena ka putayma ka nuqusuma xaaytiiw; oo Waaqqo! Mankisteeta xaaytiiw, atti nefo a mattitta a pisa qaropeela co.

¹² Teyanta ka ulfeena ke kapa'ew teyanni, atti ka we piisa mukinni. Nama piisa kuttissa'e ka kokkonnassa'e hupna isho kokkonnuma harkaaytippa caan.

¹³ Oo Waaqinno, amma nefo in ke kalataysanninna ka maxxase xaayti ulfeessame saarinninna.

¹⁴ We piisa ke kapaawwen teyne. Waan ke daanne nefo, waan harkaaytippa ke qara teyyanne patta; ka kuli akkan daassata asse kitto heennaannon daanno'e, anti an ayno? Samayta kan opa ayno?

¹⁵ Ino nefo akka aappadaanno a xatta piisa mina'e an kalayta ka an xaykiyya; parraanno nefo piita qaraayye akka kaatillayta mina'e ennoow tarpini umma kippeeta an qapno.

¹⁶ Oo Waaqa Poqallaanno! Maxxase xaayti qulqullaawe'e tika qulqulloota qupa'e kodattese asse kutta an ollopa qobbeessine piisa xaaytiiw ka harkaaytippaayyeew deete.

¹⁷ Oo Waaqiyyo, akka karitta kara qorritto ka hanqeeta jaalannitto in upa, anti nefo sede kumma karitta piisa ka xasa fayyaatinnin dehayshe; amma samayse xaayti are co akka daassase heennaasso qara dehayshen in akke ka xasoode.

¹⁸ Oo Waaqa Waaqa aappadaanno a Aprihaami ka a Hisaaqi isho a Yayqoopi, dikattose karitta samaytaayti kara co haka paraparati tooyte ka karittaaysho qindaaytipa qajeelshe.

¹⁹ Akka ajajaddaatti ka seeraayti isho taantetaayti tooytaado ka wossene an ishi harmishetin tika kutta ke qupo'e, innaayyo Selemooni heenna kutta daashe.

²⁰ Sekkammaayye Taawwiti ka xora samaytaseti kide, “Waaqa Poqallaassin saarsha, xora samayta piisa ka Waaqa Poqallaasso saarshe ka Waaqa aappadaassoti isho nuqusa tura piitopa sehen ka sakataden.

Selemooni akka nuqusa kodde akka upnaysamte

²¹ Parraytaadiiyyi ikka Waaqa kalisoota kalshen. Ka kalisootase kupannitto kuli dehayshen. Kalisoose nefo xorma kuma takka ka laha kuma takka ka haara laha kuma takka ka kalisootaaysho a ikkayta isho kalisowwa a pila kuli kuttumtan Isira'eeli piisa malla dehayshen.

²² Ka kuyyaasetiiyyi, fuula Waaqa tura xasa kuttaytan damen ka ikken. Ka Selemooni inna Taawwiti akka nuqusa kodde a lammattati upnayshen; ka fuula Waaqa tura isha daaten; ka mukissampayta kodaden. Ka Sadooqi nefo akka qeesittaaysho koddo'e isha daaten.

²³ Selemooni ka nuqusume ka akka Waaqa ishi daashe mina'e pakka aappaaysho a Taawwiti oppa'e alka qara kuti'e, ikka ishi olikela teyte, Isira'eeleta piisa ka ishi ajajamte.

²⁴ Saarraadi a xela oranna ka xormeeta isho hellaa a Taawwiti a diira piisa ka akka Selemooni nuqusa a amaname kodden upnayshen.

²⁵ Waaqa ka Isira'eeleta piisa tura'e, Selemooni kuttishe ka ulfeena apari nuqussa isha turan kallaadeti in daannin kuli ishi daashe.

Toota Taawwiti

²⁶ Taawwiti inna Issayi ka Isira'eeleta piisa qara'e nuqusume.

²⁷ Isha Keprooni kara'e para tappa nuqusume, ka Yursaalami kara'e para kunda sessa sessa nuqusume; ollopa'e para kunda afuri Isira'eeli piisa qara nuqusume.

²⁸ Ka parra lekaya kallaade ka teyanta ka ulfeena pake ka to'e. Innaadi Selemooni ka pakkaadippa nuqusume.

²⁹ Anda oppa Taawwiti nuqusumeeti paayyatte haka piraampirati'i wa kodde mataaffasene a torra a akkampaytase a Saamu'eli ka a xuumampaytase a Nataani isho a akkampaytase a Kaadi taafe qara'e taafamen.

³⁰ Parra a Taawwiti nuqusume karaayye wa mankisteetaadi kara kodde ka hupnaadi ka wa isha ka Isira'eeli isho mankistewwa a kapandesa ca kara kodde kuli mataaffosen oppa'ew taafamen.