Mataafa Otoowwa a paayyota 28 - Mataafa Qulqulloota

Qoota tika qulqullootati desa wa a Taawwiti itturopa koda dikade

¹ Taawwiti ka saarra Isira'eeli piisa ka saarra a kaffa ka saarra kitadda a nuqusa kela koda koona ka shaalaqadda ka motoloqadda ka a teyanta isho horeeta nuqusa isho a hellaadi qara saarumma ka saarra a tika mankisteeta ka a matta qapa isho xormeeta oranna piisa akka Yursaalami karopa de'ane'e olopa hale.

² Nuqusase Taawwiti ka ela qa'ade ka kide, “Hellaanno ka samaytiyyooyye anopa dakkaysada; pora oppa taapotase a kodayteeta Waaqa nessatto ka tika a kela Waaqinno loqta xaayadon qupa fade ka itturan desa meeha qobbeesse.

³ Ma xoori Waaqa i'ana kide, ‘Atti a nama oranna ka diika tuqteey, maxxiyyo tika a qupto.

⁴ Waaqa Poqalla Isira'eeli xoori akkan haka paraparati Isira'eeli qara nuqusumo'e toolinno pisa oppa ana reexade; ka akka saara koddo'e Yihuta reexade; ka tika Yihuta karaaye toolinno reexade ka hellaa a aappinno oppaayye akkan Isira'eeleta piisa qara nuqusumo'e, ana jaalade.

⁵ Waaqa ka hellaa lekaya ana daashe ka hellaayyo a diira pisa oppaayye akka alka mankisteeta Waaqa qara kuti'o'e ka Isira'eeleta piisa qara nuqusumo'e innaayyo Selemooni reexade.

⁶ Ka ana kide, ‘Innaati Selemooni akka innaayyo koddo'en reexade ka aappaaysho koddaay, a tikiyyo isho paapahaddaayyo ana qupo isha!

⁷ Akkima amma koono mina'e, oton i'ajajaddaayyo ka seerraayyo kodeeta kamma japaadeeyye, mankisteetaadi haka paraparati in kokkonnaysha.’

⁸ Amma nefo xora samayta Waaqa oppa a Isira'eeleta piisa akkinnittooyye Waaqinno ka dakaynooyyen ishin ajajni ka kiini, ‘Akka piisse paxaara lehattan ka haka paraparati hellaassin kuli lehaccissane'e ajaja Waaqa Poqallaassina piisa qanqanissa tooytaada.

⁹ Atti nefo innaayyo Selemooni, Waaqa qoota karitta nama piisa kara qorro ka dikatta nama piisa upo malla, Waaqa aappaayshina upnaado ka karittaayti piisan ka heennaati piisan ishi koda kode; oto isha faanittooyye, i'isha teyta; oton xoori alle'e isha diissaayye, isha haka paraparati'i alle ke diisha.

¹⁰ Waaqa akka tika qulqulloota ishi qupto'e ke reexadeey, sede upnaado ka japaado ka dikkishe.’”

¹¹ Kamma desa Taawwiti ka akeeka a qupeeta a pora karandesa tarpinaan a tika qulqulloota ka a tikka meeha ka a fooqeta ka a kaataddaadi isho a pora diissata akkinno innaadi Selemooni daashe.

¹² Ka akeekase a qupeeta a hapura mattaadi oppa xaaye a paapahadda tika a Waaqa ka a kaatadda kapandesa caati ka a tikka meeha a tika Waaqa isho a tikka daassawwa xawwi reexame kara xaaynaane Selemooni daashew.

¹³ Ka akkimoose mina'ew, saanta a ishin qeesewwa isho Lawaata kitaman ka tika qulqulloota a Waaqa kela ishi koda kodan isho meeha ishin koda kodane desa Selemooni dehaamta daasheew.

¹⁴ Ka akka koda ika lekayta ishin kodamo'e, meeha warqeetati'i warqeeta hiilan ishi daashe ka meeha sipla dakarati'i sipla dakara hiilan ishi daashe.

¹⁵ Ka pora a qara ipsa xaaynaan isho a qara opannaane piisa mina warqeeta hiilan ishi daashe ka pora a qara ipsa xaaynaan isho a opannaaneti sipla dakara asseew hiilan daashe.

¹⁶ Ka tarabbeesadda a kalisoota laaqqota piisa mina'e, warqeeta a parpaaccisnitto ka tarabbeesadda a dakara pirreetati sipla dakara a parpaaccisno daashe.

¹⁷ Ka shukkada ka tistewwa isho moqorqoradda'e warqeeta a palite a parpaaccisnitto daashe ka asseew saahinna a sipla dakaraati'i dakara a parpaaccisno daashe.

¹⁸ Ka meeha a qara tankarta kuutannaane'e warqeeta a palite daashe; ka sarakella isho kirupeelewwasene a warqeeta xoollaasso pappaldishe ka taapotase a kodayteeta Waaqa qara dekna kodacciissa'e akeeka daashew.

¹⁹ Taawwiti ka kide, “Sede piisa tooy harkase a Waaqa ana qaraayye co qobbeesse ka akeekose piisa akkan taafo'e, paata qapatta ana daashe.

²⁰ Taawwiti ka oori innaadi Selemooni kide, “Waaqa Poqallaayyo ke olli caay, in fuuran, japaado ka kokkonsado ka kodoose paayye; isha haka kodoose dikkinnitto kara'e, alle ke in diisho umma alle ke in katooy.

²¹ Koda a tika qulqulloota a Waaqati'i kitadda a qeesewwa isho a Lawaata are ke kapa caan. Harmoota a koda ika lekayta kollatte ka ke qaarqaara heento ke olliiw kitta. Saarra isho samayta piisa ka ke ajajaman.”