Mataafa Otoowwa a paayyota 26 - Mataafa Qulqulloota

Tooytampaya a tika qulqulloota

¹ Kita tooytampaya a tika qulqulloota sene arepaxata ca. Kafa Qore oppaayye hellaa Asaafi a diira oppa takka inna Qore Meshelemiya.

² Isha hellaa a diira tappa qapa; qaarta Sekkaariyaasi, kussitta Yidi'eeli, a sessatta Sepaadiyya, a afratta Yatini'eeli,

³ a kenatta Elaami, a lehatta Yehohanaani isho a tappatta Eliyeho'enaayi kidammi.

⁴ Qoota Waaqa Opeeti'etoomi sake malla hellaa a diira sette qapa. Qaarta Terashemaa'iya, kussitta Yihosapaati, a sessatta Yo'ahi, a afratta Sakkaari, a kenatta Natina'eeli,

⁵ a lehatta Ami'eeli, a tappatta Yisaakoori isho a settatta Pe'ulitaayi kidammi.

⁶ Innaadi qaarta Shemaa'iya ka hellaa a diira lehi qapaaw. Ishootta qoota irrelaya kokkoka kodden malla tikka toollaassoti qara'e saarra kodden.

⁷ Maxxadaasso nefo: Otini ka Rafa'eeli ka Opeeti ka Elisaapaadi ka Ellihu isho Semaakiyya kidammi. Xawwidesa Ellihu isho Semaakiyya irreellaya a kokokkoka.

⁸ Sene piisa kan sanynyeeta Opeeti'etoomiiw. Ishootta ka hellaasso ka daltayaasso nefo kodoose kokkoka kodeeta i'ettaninni. Sanynyeeta a Opeeti'etoomi nama kunda lehi lakki.

⁹ Meshelemiya hellaa isho daltayta a hupna qapa kudanka sette qapa.

¹⁰ Sanynyeeta kafa Meraari oppaayye Hoosa hellaa a diira afuri qapa. Saaraysho nefo Shiimiri; isha nefo qaartannema aappaaysho'e saara isha kode.

¹¹ A lammatta Hilqiiya, a sessatta Tepaaliiya isho a afratta Sekkaariyaasi kidammi. Hellaa a hoosa a diira isho daltaytaadi olloppa'e nama kudanka sessa.

¹² Orrose xarra tika qulqulloota tooytino, saarraasso kela'e kitameew ka akka daltayaasso a Lawaata mina'e koda tika qulqulloota a Waaqa xelta xeltan kooni.

¹³ Toolla oppaayye a shakka ka a qime opa in kiinin maliiyyi xarra piisa mina'e qoyritta katen.

¹⁴ Qoyritta a xarra qinda piirtota Shelemiya qa'e; kamma'ew isase dehaamampayta kokkoka kodde innaadi Sakkaariyaasi'i, opanka qoyritta kateneew; xarra qinda qutatta ka isha qa'e.

¹⁵ Qoyritta xarra qinda tupatta Opeeti'etoomi qa'e; qoyritta tika meeha'ew hellaadi qa'e.

¹⁶ Qoyritta a xarra qinda dumaata isho a xarra Shaaleketi isase pora illi qaran annon co ka Shuupiimi isho Hoosa qa'e. Orra tooytino ka xelta xeltan olkamma tooytini.

¹⁷ Kuyyaata kuyyaatanne, qinda piirtotatinni Lawaata lehi, qinda qutattatinni Lawaata afuri ka qinda tupattatinni Lawaata afuri tooytini; tika meeha'ew pora takka'e nama lakki lakki koddini ka tooytini.

¹⁸ Paapahase qinda dumaatatin pora kapa co nama afuri tooytini; paapaha karan co nama lakki tooytini.

¹⁹ Sanynyeeta meraari isho a Qore oppaayye isasene xarra tooytina kitaasso sene areqaropeela ca.

Saarra a tika meeha isho tanynyada a pila

²⁰ Lawaata oppaayye Akiiya tikase a meeha a tika Waaqa isho tikase a meeha qulqullaawe kela xaayammo qaraayye saara.

²¹ Sanynyeetase a Laadeni isase Laadeni qudan Kershooneta koddite oppaayye saarra toolla Laadeni maxxadaasso sene; Yihi'eeli

²² ka hellaa Yihi'eeli a diira Setaami isho Iyyu'eeli. Ishootta tika a meeha a tika qulqulloota a Waaqa qaraayye saarra.

²³ Sanynyeeta a Miraami ka Yisihaari ka Keprooni isho Usi'eeli'i kodadda ishootta daasame.

²⁴ Sanynyeeta inna Muuse a Kershoomi oppa Shepu'eeli tikase a meeha qara saara kutta.

²⁵ Isha inna opa Kershoomi Eli'eseri qudanne Shelomiiti olli diika takka. Eli'eseri Rehapiya xaaye; Rehapiya ka Yishaa'iya xaaye; Yishaa'iya ka Yoraami xaaye; Yoraami ka Siikiri xaaye; Siikiri ka Shelomiiti xaaye.

²⁶ Shelomiiti isho daltayaadi a ollin diika takka koddene, meehase qulqullaawe a nuqusase Taawwiti ka saarra a toollaadi isasene shaalaqadda ka motoloqadda kodde ka saarra a xelaadi a oranna xawwi Waaqa reexxene qaraayye saarra.

²⁷ Ishootta ka poojetase a orannaappa teyen qudadesa akka tika qulqulloota a Waaqatin harmishane xawwi desa reexxen.

²⁸ Akkampaytase Saamu'eeli ka Saa'ooli inna Qiisi ka Apeneeri inna Neeri isho Iyyo'aapi inna Seruyya wa a xawwi reexxame piisa isho meeha a xawwi reexxame a pila piisa, Shelemiti isho daltayaadi tooytini.

Koda a Lewaata a ata haste kitame

²⁹ Sanynyeeta Yisihaari oppa Kenaaniya isho hellaadi koda a tika qulqulloota in koddinin a Isira'eeleta qara saarumma isho a deexa mureetati'i kitamen.

³⁰ Sanynyeeta Keprooni oppaayye Hashaapiya isho daltayaadi a hupna qapa, nama kuma ka dippa tappa; Isira'eeli karaayye Yurtaanoosiiyyi qinda dumaatatin koda a Waaqa isho a nuqusati kitamen.

³¹ Sanynyeeta Keprooni oppaayye akka maskapa meera delootayshoti oppa taafamen mina'e Yiriiya saaraysho; a Taawwiti nuqusumeeyye para kunda afrattati maskapaddasene ka kara fadamen. Yaa'iseeri piita Kele'aadiiyyi Keprooneta oppa orra a hupna qapo ka teyade.

³² Yiriiya daltaya kokokkoka a matta toolla kodde kuma lakki ka dippa tappa qapa. Nuqusase Taawwiti ka ishootta qeedade ka koda a Waaqa isho a mankisteetati'i kafa Roopeeli ka a Kaati isho a Minaase quda paka takka qara ishootta shuume.