Mataafa Otoowwa a paayyota 23 - Mataafa Qulqulloota

¹ Taawwiti ete parra leka kallaade ka kereeyye, innaadi Selemooni Isira'eeleta qara nuqusumshe.

Koda Lawaata

² Taawwiti ka saarra Isira'eeli piisa ka qeesewwa isho Lawaata ollopa hale.

³ Lewaatoppaayye a parraasso kunda sessa kayna ka qaropeela ca piisa ka dikamen; ikka kuma kunda sessa sette kayen.

⁴ Taawwiti ka kide, “Sene oppaayye nama kuma kunda lakki afur, a tika qulqulloota a Waaqa kodacciisen; nama kuma lehiiw a saarra isho taanynyada kodden.

⁵ Nama kuma afuri, a tooytampaya xarra kodden; kuma afuriiw, a meehase a masmuureta an harmishen Waaqa kalataysaden.”

⁶ Taawwiti ka hellaa Lewi ka a Kershooni ka a Qe'aati isho a Meraari mina'e Lawaata kita kita qoote.

⁷ Kershooni hellaa diira Ala'itaani isho Shiimi'i kidamma lakki qapa.

⁸ Hellaa La'itaani a diira Yihi'eeli ka Setaami isho Iyyu'eeli kidammi. Ishootta olloppa sessa.

⁹ Hellaa Hiimi'i a diira Shelomooti ka Hasi'eeli isho Haraani kidammi. Ishootta olloppa sessa. Ishootta toola La'itaani turaayye saarra.

¹⁰ Hellaa Shiimi'i a diira Yahaati ka Siisa ka Yi'uushi isho Periiya kidammi. Ishootta olloppa afur.

¹¹ Qaarta Yahaati, kussittaadi Siisa kidammi. Yi'uushi isho Periiya qoota hellaa a diira lekaya in qapnin malla olloppa toola takka kapa'ew dikamen.

¹² Hellaa Qe'aati a diira, Amiraami ka Yusiihaari ka Keprooni isho Usi'eeli kidammi. Ishootta olloppa afuri.

¹³ Hellaa Amiraami a diira, Arooni isho Muuse kidammi. Arooni ka xawwi reexxame. Wa malla reexxame nefo, akka isha isho hellaadi meeha a qulqullaawe qulqullassa kammaaw caadan ka fuula Waaqa tura kalisowwa kalshan ka fuulaadi tura koda kodan ka maxxaadin orra saka kammaaw caadan malla.

¹⁴ Hellaa a Muuse a namase a Waaqa Lewaatoppa'e dikamen.

¹⁵ Hellaa a Muuse a diira lakki, ka Kershoomi isho Eli'eseri kidammi.

¹⁶ Sanynyeeta Kershoomi oppaayye Shepu'eeli saara.

¹⁷ Sanynyeeta Eli'eseri oppaayye Rehaapiya saara. Eli'eeseri hellaa diira a pila in qapo, Rehaapiya xoori hellaa a diira lekaya qapa.

¹⁸ Hellaa Yisihaari oppaayye Shelomiti saara.

¹⁹ Hellaa a Keprooni a diira, qaarta Yiriiya ka kussitta Amaariya ka a sessatta Yahisi'eeli ka a afratta Yiqaami'aami kidammi.

²⁰ Hellaa a Usi'eeli a diira oppa a qaarta kodde Miikka saara, kussittaadi Yushiiya kidammi.

²¹ Hellaa Meraari a diira, Maahiili isho Muushi kidammi. Hellaa Maahiili a diira'ew Ali'asaari isho Qiishi kidammi.

²² Ali'asaari tuparra patta qapa ka a inna diirta in xaayannin mali to'e. Tuparraadi ka hellaa a kussitta a aappaayshoti a Qiishi opa hemamen.

²³ Hellaa Muushiimi a diira, Mahiili ka Eteeri isho Yiremooti kidammi. Ishootta olloppa sessa.

²⁴ Sene tooy saarra toollaassoti. Sanynyeeta Lewi oppaayye maxxadaasso ka matta mina taafamen. A parraasso kunda lakki ka qaropeela kodde ka tika qulqulloota a Waaqa kela koda kooni.

²⁵ Taawwiti nefo turan ikide, “Qoota Waaqa Poqalla Isira'eeli samaytaadi nessuma daashe ka Yursaalami kara haka paraparati kallaatta de'e malla,

²⁶ arepadesa Lawaata tukkana taaki meeha kodaan koonaan in haato.”

²⁷ Dehaamase a Taawwiti piraampira qara daashe qara'e Lawaata a dikamte a parraasso kunda lakki ka qaropeela koddene ka taafamen.

²⁸ Koda Lawaata nefo sanynyeeta a Arooni a tika a qulqulloota Waaqa kela koda koonitto qaarqaareeta ka oxinta a tika qulqulloota kapandesa kitto isho kaataddaadi qara tooyeeta ka mehadda koda Waaqati reexame jaqeeta ka kodadda a tika Waaqa a pila kuli kodeeta.

²⁹ Ka kalisootase a laaqqota tarabbeesa qara xaayammitto ka daamma kalisoota unta qara saarummi ka laaqqotase haddaya mali laaqammitto ka daamma sayteetan pukessammo ka laaqammo isho wa hiilan ekkaysatamma ka kuramma piisa qara saarummi.

³⁰ Ka teykante teykanteeyye Waaqa saarissa ka kalataysatta qa'anni. Ka kalaakala kalaakalaayye asseew kooni.

³¹ Ka sampataddaayye ka xaysonessuma a xa'atima aleya qaraayye ka xaysonessumadda a kollatame oppaayye dikoota isho saanta turan ishootta lelamte qara'e, fuula Waaqa tura kalisoota a kupannitto kalinni.

³² Semmalla Lawaata ka koda tukkana Waaqa isho a pora qulqullaaweti koda qara nakanni ka Aroonata kelopaxata caanni ka koda tika qulqulloota a Waaqa kuli qaarqaarri.