Mataafa Otoowwa a paayyota 22 - Mataafa Qulqulloota

¹ Taawwiti ka kide, “Arepadesa sede tika a Waaqa Poqallaanno'e koddita; poqase a kalisoota a qara Isira'eeleta kalisoota kupannitto kalisso nefo are poroose oppa kodda.”

Tika Waaqa qupa'e harmisatta a kodame

² Taawwiti ka akka kalayta piita Isira'eeli oppa kalo ollopa halaane'e ajaje ka ishootta oppaayye akka daka tika qulqullootatin qupan faatane'e, orra a daka faanno kite.

³ Ka akka dufanadda xarrada a katama ishin kodamane'e, mismaarra isho siplalla ishoottan qaqqapsiisane kodacciisa'e sipla kuttayta isho sipla poora a hiila in qapnin qobbeesse.

⁴ Qoota Tirooseta isho Sidoonata qoyra talta kuttumtan ishin Taawwiti deete malla, qora a talta a dikoota in qapnin qobbeesseew.

⁵ Taawwiti ka kide, “Tika a Waaqa qupammitto a akata paxaara, kurraadi isho ulfeenaadi ka piita piisa qara dakaanno kodda parpaaccisni. Innaayyo Selemooni xoori nama shakka umma upna in qapooy, ana we piisa ishi qobbeessa.” Ka akka kide mina'e a in toonin turanne we lekaya ishi qobbeesse.

⁶ Ka innaadi Selemooni hale ka akka Waaqa Poqalla Isira'eeliti tika qupo isha ajaje.

⁷ Ka ishi kide, “Innaayyo, anti akkan maxxa Waaqa Poqallaayyoti tika qupo karitta kara in dikade;

⁸ ma xoori nessa Waaqa anopa de'e ka kiini, ‘Atti orra lekayta lesse ka oranna lekaya torpite ka fuuliyyo tura'e diika orra lekayta piita qara tuqteey, atti ulfeena mattiyyooti tika a qupto

⁹ Ma inna a nakayta ka a nessuma kodde'e xaayta, anti ka nyaapaadi a qinda piisan co kelaayye isha nessuma daasha; maxxaadi nefo Selemooni kodda, anka xeltaadiiyyi Isira'eeleta nakayta ka nessuma daasha.

¹⁰ A maxxiyyo tika qupo isha; isha innaayyo kodda anti ka aappaaysho kodda; ka Isira'eeleta qara'e haka paraparati sufaanaadi kokkonnaysha.’

¹¹ Semmalla innaayyo, a Waaqa ke olli kinnaado! Ka akka Waaqa kide, ‘Ke ana qupa’ mina'e a ke olikela teyto ka tikase ishi qupe.

¹² Oto Waaqa Isira'eeli qara ke nuqusumshooyye, akka seera a Waaqa Poqallaatti tooyta ettanisso'e, a Waaqa ookuma ka upna ke daasho.

¹³ Oton seera isho taantetase a Waaqa Muuse qudan Isira'eeleta daashe qanqanissa tooytanniiyyi, ike olkela teytaay kokkonnaado; ka maxanyume, in fuuran ka xasa an muran.

¹⁴ Anti akka Waaqa ishin tika qupamto'e warqeeta mekliteeta kuma dippa takka ka sipla dakara mekliteeta milooneta takka ka sipla isho sipla poora a kuttumaadi qaran xaate a hiila in qapnin ke qobbeesse; ka qora isho dakadda kuli ke harmisheey, atti nefo sede qara padaawe.

¹⁵ Harmoota a daka ka a qora ka harmuma lekayta sahato iskapa iqapta.

¹⁶ Harmoota a warqeeta ka a sipla dakara ka a sipla poora isho a sipla ke kapa dikoota in qaptooy, kokkonsado ka kodaayti oppaayye Waaqa ka ke olli caado.”

¹⁷ Taawwiti ka akka innaadi Selemooni qaarqaarane'e saarra Isira'eeli piisa ajaje ka kide,

¹⁸ “Hela Waaqa Poqallaassin ishin olli in anne? Ka qindadda pisaayye desa ishina in nessinne? Ha Waaqa orra piisse oppa kalo harkiyyoppa'e daashe, piita ka Waaqa isho ishin samaytaadi piddamte.

¹⁹ Amma oori karittaayshin ka dikattaayshin piisan Waaqa Poqallaassin fada ka akka tikase a qulqulloota maxxa Waaqati qupammitto kelopa taapotase a kodayteeta Waaqa isho meehase qulqullaawe a Waaqa kalissane'e xa'a ka tika qulqulloota a Waaqa qupa.”