Mataafa Otoowwa a paayyota 21 - Mataafa Qulqulloota

Akkima Taawwiti samayta diksiise

¹ Seetana ka Isira'eeleta qara xa'e ka akka Taawwiti samayta diksiiso isha nyarshe.

² Taawwiti ka Iyyo'aapi isho ajajampayasene a xela orannaati kide, “Aana ka Persaape paayyatte haka Taaniti samayta Isira'eeli piisa dika; ka meeqa akkima kayno ana lela anka upnaado.”

³ Iyyo'aapi ka Taawwiti kide, “A Waaqa Poqalla samayta a Isira'eeli a amma qaran qapto'e harka dippa leksho! Poqallaayyo, nuquso! Ishootta piisa orxayaattinni? Ka kuli maana'e sede koda faate ka samayta Isira'eeli dapoppopa kalinni?

⁴ Ma xoori ajaja nuqusa'e afa Iyyo'aapi qaropa jaale; Iyyo'aapi ka sooke ka piita Isira'eeli piisa oppopa samayta dika aane ka Yursaalamipa tiitaawe.

⁵ Ka dikoota xela oranna torpa kaye piisa Taawwiti upnayshe; Isira'eeleta pisa oppaayye a koraateta qapatta kaye milooneta takka ka kuma dippa takka ka Yihuta karaayye nama kuma dippa afuri kunda tappa ka teyade.

⁶ A koddito ma Iyyo'aapi qoota ajaja nuqusa akata ishi neeqnade malla, Lawaata isho Piiniyaameta oppa in dikne.

⁷ Ajajose qoota Waaqa kuli tura neeqnaade malla, ikka Isira'eeleta qara'e erkanaata qeede.

⁸ Taawwiti ka Waaqa kide, “Sede an asse kode a kuttati'in ishin dape ka koda eepuma kodeey, dapiyyo a orxaytaayti akka ana diisso'en ke qinsanni.”

⁹ Waaqa ka Kaati akkampaytase a Taawwiti kide,

¹⁰ “Aane ka Taawwiti kide, ‘Waaqa Poqalla ikiini, we sessaan ke tura xaayaay, sene oppaayye waan ke qara koda takkan reexado.’”

¹¹ Kaati ka Taawwiti kapopa aane ka ishi kide, “Waaqa Poqalla ikiini, ‘Sene oppaayye a ke aakto takka reexado!

¹² Hela loota para sessa'em, moon a nyaapaayti leya sessa ke torpo akka tura pora qahatom, moon erkannaata Waaqa Poqalla'e kuyyaata sessa piitaayti qara de'a, erkampattoota Waaqa piita Isira'eeli piisa qara'e pateetta qeetta?’ Semmalla isase ana erke'e maana akkiman oorsho oppa dikado ka ana lele.”

¹³ Taawwiti ka Kaati kide, “Akatan oppa rakkade; ma xoori diissata Waaqa Poqalla ikuttiiy, ana harka nama oppa'ew pi'a diisho, ka harkaadippa'ew pi'o.”

¹⁴ Waaqa Poqalla ka piita Isira'eeli qara'e erkannaata qeede; nama kuma kunda tappa ka pirame;

¹⁵ kamma'ew Waaqa ka akka Yursaalami patisso'e, erkampatootaadi erke; ete patissa dehaatteeyye, Waaqa ka akke ka pateetta a deenitto malla maraarfade ka erkampattootase orra pirritto kide, “Ikodditeey, harkaayti oorsado!” Sitiiyyi erkampattootase a Waaqa awta Orna a Iyyapuusitta kapa'e qa'atte.

¹⁶ Taawwiti ete opeela tooyyadeeyye, erkampattoota a Waaqa a piita isho moonta otantoppa qa'atte ka koraateta yukamte harkoppa qapatte ka qinda Yursaalami opa oorsatte akke; sitiiyyi Taawwiti isho qimaya ka mehadda dapteeta a kalsadenetin piitopa seehen ka fuula piitan kayen.

¹⁷ Taawwiti ka Waaqa kide, “Akka samayta dikamo'e a ajaje ananne? A ishin dape ka neequmta kode anaay, sene kahirra minaay, maana koden? Waaqqo Poqallaayyo, ana isho tooliyyo qara erkannaata qeede diisheey, samaytaayti qara'en qeedan.”

¹⁸ Erkampattoota Waaqa ka Kaati ajajte ka ishi kiite, “Aane ka akka Taawwiti opeela fayyado ka awta a Orna a Iyyapuusitta oppa Waaqa poqa kalisoota kodo'e ishi lele.”

¹⁹ Taawwiti ka qaalese a Kaati maxxa Waaqatin ishi lele qara koda'e opeela fayyade.

²⁰ Sitiiyyi Orna isho hellaadi a diira afuri kappa tummi, ete tiitaawen ka erkampattoota a Waaqa akkeneeyye, hellasene xaadi ka alle deddekaden.

²¹ Ete Taawwiti Orna kapopa deenooyye, Orna ka tooyyade ka Taawwiti akke ka awtaappa sooke ka Taawwiti kaareeta oorshe ka fuula piitan kaye.

²² Taawwiti ka Orna kide, “Akka erkannaase samayta qara mayto'e, Waaqa'en oppa poqa kalisoota kodaay awtosen xaayti ana kate anka kapan wa qeennaane daasho.”

²³ Orna ka Taawwiti kide, “Nuquso, poqallaayyo qedado ka wa ke aaka oppa kode; kalisoota kupannitto'e xormadosenen daasha ka ishin kupa'e, qorosen awtaappa ca daasha; ka kalisoota untati'i, kappose daasha; sene piisa anaaw daasha.”

²⁴ Nuqusase Taawwiti ka Orna kide, “In koddito; wa xaayti kodde an qeedo ka Waaqa kalisoota an kalsho; umma waan kamma kaaja an daannini kalisoota a kupannitto an kodo ka an kalsho. Heraadi piisan ke daasha.”

²⁵ Taawwiti ka awtasene kapa'e, warqeeta sheqileeta dippa lehi hiile ka ishi daashe.

²⁶ Taawwiti ka eyye'e pora kalisoota Waaqa kode ka kalisoota a kupannitto ka a takkumta kalshe; ka qara Waaqa hale. Waaqa ka moontexata poqase a qara kalisoota kupannitto kalte qara'e, apittan ishi malseeta oorshe.

²⁷ Waaqa ka erkampattootase ajaje; erkampattootase ka koraatetaadi korkorta karopa oorsatte.

²⁸ Taawwiti akka Waaqa awtasene a Orna a Iyyapuusitta oppa ishi malseeta oorshe ete akkeeyye, kalisoota eyye kalsheew.

²⁹ Tukkanase a Waaqa a Muuse koommaytoppaayye kode isho poqase a kalisoota qara kalisoota a kupannitto kalinnaan, sitiiyyi kunkunnaata qara Kepa'ooniiyyi pora sakatattaati caan.

³⁰ Taawwiti xoori qoota koraatetase a erkampattoota Waaqa fuure malla Waaqa kaassatta'e eeyyepa anta in ettaninne.