Mataafa Otoowwa a paayyota 20 - Mataafa Qulqulloota

Akka Taawwiti katama Raapa pute ka qara pire

¹ Masaanaappa a nuqussa oranna tuullaaneeyye, Iyyo'aapi xelaadi a orannaatinni tuule ka piita Amooneta pashshe; ka katama Raapa opa aane ka kapa mure ka torpe ka qitqishshe. Taawwiti xoori Yursaalami kara'e hase.

² Taawwiti ka aane ka kulleeta warqeeta a nuqusaayshoti a Milkoomi matta qara ishi qedade. Ulsuma kulleeseti nefo mekliteeta a warqeeta takka kayni ka karaayye daka a heraan kokkoka qapta; ikka matta qara kalsade; ka katamoosen oppa poojeta kuttayteeta pooje.

³ Ka samayta katamoosen kara co sookshe ka akka makaaseta ka tooma isho erkahan koda kodane'e ishootta kite; ka katamadda a Amooneta a ata hase piisa kara asseew kode. Taawwiti isho xelase a oranna piisa ka oori Yursaalami opa tiitaawe.

Oranna a xormeeta Filisteemi olli torpame

⁴ Kammadesa, Keseri kara'e Filisteemeta oli torpeneew; Huushittase Siipekaayi ka sanynyeeta Rafaaymippa Siipaayi ishshe; Filisteemeta ka putamte.

⁵ Ikka amma Filisteemeta olli torpeneewe; Elihaana inna Ya'iri ka Laahimi inna opa Koliyaadi a Kaatitta a sayma oranaadi wantarshoota ohaata mina kitto ishsheew.

⁶ Ikka Kaati kara oli torpeneew; sanynyeeta Rafaaymi oppaayye irrelayta takka harka isho loqqa qudaayye qupiyya lehi lehi, olloppa qupiyya kunda lakki afuri qapo ka eyye ca.

⁷ Ete Isira'eeleta qara jeejjanooyye, inna inna a opa Taawwiti Ashaama ka isha ishshe.

⁸ Sene tooy sanynyeeta Rafaaymi a Kaati kara kalto ka harka Taawwiti isho a xelaadi a oranna oppa piramte.