Mataafa Otoowwa a paayyota 19 - Mataafa Qulqulloota

Akka Taawwiti Amoonata isho Soorata pute

¹ Sekkammaayye nuqusa Amooni Na'oosi ka to'e; inaadi Hanuuni ka pakkaadippa nuqusume.

² Taawwiti ka dikade ka kide, “Aappaaysho wa paxaara'e ana kodeey, ana innaadi Hanuuni wa paxaara kodoow.” Qoota aappaaysho to'e malla Taawwiti ka akka Hanuunin paanane'e orra erke. Orrase a Taawwiti ka Hanuunin paana'e piitase a oppa co a Amooni opa aanen.

³ Saarra Amooni ka Hanuuni kidene, “Sede a Taawwiti paanitta orra ke kapopa erke, hela a aappaayshin ulfeessino ke pahata? Ha akka piitaayti kara tooyan ka lettishan ka issipa oorsadan malla.”

⁴ Hanuuni ka orrase a Taawwiti erke qapsiise ka qara matta isho kawsa kooshacciise ka mehadda a kalsadene haka marsaati kamma quursiise ka ishootta kamma daane.

⁵ Taawwiti ka wa orrose qara kaye dakaye; orrose qoota a kuttati jeere malla, Taawwiti ka ishootta turopa orra pila erke ka kide, “Haka nyirfaassin isho kawsaayshin dehno kara'e, Iyyaarko kara tawa ka kuli kala.”

⁶ Amooneta ete akka Taawwiti ishootta qara miirode upnaatteeyye, Hanuuni isho Amooneta piita Mesepetoomiya ka a Ramime'akka isho a Suupatiiyyi fartada oranna torpina isho sarakelladda xaayyatta'e dakara pirreeta mekliteeta kuma takka erken.

⁷ Ka sarakelladda kuma kunda sessa lakki ka xela a ishoottan torpino ka nuqusase Ma'ika isho xelaadi a oranna xaayyaden; ikka de'en ka Metaapa tura safaren. Amooneta ka katamaddaasso kara ollopa xoorteew ka oranna tuulteew.

⁸ Taawwiti ete sede dakayeeyye, Iyyo'aapi isho xelaadi a oranna piisa ollin erke.

⁹ Amooneta ka sookte ka xarra katamaassoti kapa pora qapatte. Nuqussasene a xaayatte ka tuulen ka xaayshotin lakoppa porra qaqqapaden.

¹⁰ Iyyo'aapi ka akkima nyaapa fuule desa ka kamma desa isha kapa mure akke ka xela Isira'eeli oppaayye xormeeta oranna a upnaysamte reexe ka Soorat tura ishootta pora qapsiise.

¹¹ Ka xela ata hase qara'e, innaasso Apisa saara kode ka Amooneta tura ishootta pora qapsiise.

¹² Iyyo'aapi ka Apiisa kide, “Oton Soorata ana qara kokkonnaanniiyyi ana awle ka ana qaarqaare; oton Amooneta ke qara kokkonnanniiyyi anti in ke awlaay.

¹³ Semmalla japaado! Ka qoota samaytinno isho katamadda waaqinno malla torpina; Waaqa Poqallaanno ka wa ishi aaka kodo.”

¹⁴ Sekkammaayye Iyyo'aapi isho xelase isha quda co ka Soorrata torpa'e turopa aanen; Soorrata ka ishootta tura alle qahate.

¹⁵ Amooneta ete akkima Soorata qahate akkiteeyye, isheetta kuli ka asseew Apisa tura alle qahateew ka katama karopa kalte; Iyyo'aapi ka Yursaalamipa tiitaawe.

¹⁶ Soorata ete akka Isira'eeleta ishootta putte akkiteeyye, orra erkite ka Soorata kirra Efraatisiti afa disiti kitto halaatte; Shopaaki saarase a xela oranna Hataati'eseri ka saaraaysho kodde.

¹⁷ Taawwiti ete sede dakayeeyye, xela oranna a Isira'eeleta piisa ollopa oorshe ka kirra Yurtaanoosi tuulle ka aane ka fuule desa ishootta torpa pora qapade. Ete Taawwiti Soorata torpa dehaadeeyye, ishootta ka isha olli torpen.

¹⁸ A kodditoma, Soorata Isira'eeleta tura alle qahate. Taawwiti ka ishootta oppa xela a sarakellaan torpino nama kuma tappa ka a loqqaan torpino nama kuma kunda afuri pire; ka saaraaysho Shopaaki kuli oppa'ew ishshe.

¹⁹ Nuqussasene Hataati'eseri kela ca, akkima Isira'eeleta tura putamen ete akkeneeyye, Taawwiti olli araaramen ka ishi piddamen; sekkammaayye, Soorata ka Amooneta awleeta tiitte.