Mataafa Otoowwa a paayyota 18 - Mataafa Qulqulloota

Putaymadda a Taawwiti orannaappa akkade

¹ Sekkammaayye Taawwiti ka Filisteemeta torpe ka pute ka iskelopa oorsade; ka katama a Kaati isho palewwa kapandesa ca isheetta qara qeede.

² Ka akkimose mina'ew Mo'aapeta puteew; isheetta ka ishi piddamte ka kipiran ishi de'en.

³ Taawwiti ete piitase kirra Efraatisi kapa kitto qapa aaneeyye, Hataati'eseri nuqusa Soopa'e torpe ka haka Hamaatiti kamma daane.

⁴ Ka isha qara sarakella kuma takka ka orra fartan torpino kuma tappa isho xela loqqaan torpino nama kuma kunda lakki pooje; ka fartada a sarakella tinna dippa takka patta hattishe ka a taakkane piisa qiqqintile.

⁵ Ete Soorata Tamaasqo desa Hataati'eseri nuqusase a Soopaati awliteeyye, Taawwiti ka ishoottoppa nama kuma kunda lakki lakki pire.

⁶ Ka Tamaasqose Sooriya kara kitto kara'e safara oranna kodade. Soorata ka Taawwiti piddamte ka kipiran ishi deete. Waaqa ka pora oppopa Taawwiti oranna tuullo pisa oppaayye ishi putayma daashe.

⁷ Taawwiti ka kontalewwasene a warqeeta a saarra xela oranna a Hataati'eseri qapannaane pooje; ka Yursaalamipan kale.

⁸ Ka katamaddasene a Hataati'eseri Tiipihaati isho Kuuni kidamma karaayye sipla a poora a akata kutta pooje. Selemooni ka siplalloosen oppa tika qulqullootati'i mirka pisha ka tuudda isho meeha ika lekayta kode.

⁹ Nuqusase a Hamaati Too'i, ete akkima Taawwiti xelase a oranna a Hataati'eseri piisa pute dakayeeyye,

¹⁰ qoota turan a lekatin Hataati'eseri oli torpen malla, akka Taawwiti nakayta oorsho ka ishi kido'e, “Paka xasootte'e” innaadi Yoraami Taawwiti kapopa erke. Yoraami ka meeha warqeeta ka dakara isho a sipla poora oppa kodame ika lekayta qapade ka ishi ishin aane.

¹¹ Nuqusase Taawwiti ka akkima turan warqeeta isho dakarase a pirreeta a mankistewwa Etoomi ka a Mo'aapi ka a Amooni ka a Filisteemi isho a Amaaleqi qara pooje Waaqa xawwi reexe mina'e meehose kuli Waaqa xawwi reexxeew.

¹² Apiisa inna Seruyya ka pora takka naaba sookitta kidammo kara'e, Etoometa oppa nama kuma kudanka sette pire.

¹³ Ka piita Etoomi kara safara oranna kodade; Etoometa piisa ka Taawwiti piddamte; Waaqa ka pora oppopa Taawwiti oranna tuule piisa oppaayye ishi putayma daashe.

Maxxada saarra Taawwiti

¹⁴ Taawwiti ka Isira'eeli piisa qara nuqusume, ka samayta piisa'e firteeta dukaata isho hanqeelluma kode.

¹⁵ Iyyo'aapi inna Eeriyya kan saara xela oranna; Iyyoosafiti inna Ahituupi kan saara a tika mankisteeta.

¹⁶ Satooqi inna Ahituupi isho Apemeleki inna Apiyataari qeesewwa; Suusa kan taafampayta a tika mankisteeta.

¹⁷ Pennayya inna Yodaahe, saara orra Kelitaata isho a Felitaata isasene Taawwiti tooytinooti; hellaa a Taawwiti, ishoottaaw nuqusa kammadela qanni.