Mataafa Otoowwa a paayyota 17 - Mataafa Qulqulloota

Kippeeta a Waaqa Taawwiti daashe

¹ Taawwiti ete olkela oorsade ka tikaadi a mankisteeta kara kallaannooyye, xuumampaytase Naataani'i kide, “Tin anti tika qora taltatin qupamte karan are kala; taapota kodayteeta Waaqa xoori tukkana kela kitta!”

² Nataani ka ishi kide, “Waaqa ke olli caay, wa dikatte piisa kode.”

³ Halkeesse oppaayyeew nessa Waaqa ka Naataani de'e ka ishi kide,

⁴ “Aane ka orxaytiyyo Taawwiti kide, ‘Waaqa ikiini, tikan anti kara kallaado atti ana a qupto!

⁵ An Isira'eeleta Kipsi kara sookshe paayyatte haka awweti'i tukkana olliiyyin pora takka desa takkopa oore; ka pora kallaata takkaayye desa takkopa kotaane diisheey, tika kara an kallaanne.

⁶ Isira'eeleta olli porra an oppopa aane piisa oppaayye, hela in apari saarrasene akka samaytiyyo mukshane shuume oppaayye takka kide, ‘Qora taltatin tika ana qupa?’

⁷ Amma nefo orxaytiyyo Taawwiti kide, Waaqa Poqalla we piisa ettaninno ikiini, ‘Akka samaytiyyo Isira'eeli qara mukissampayta koddito'e pora oppa kahirra sikinnittooyyen xelloota kahirra kamma ke qeede;

⁸ ka porra oppopa ante pisa oppaayye ke olli caade; ka nyaapaayti piisa alle ke tura pashshe; ka amma nefo maxxaayti akka maxxada a orra piita qara kukutta mina dakaado kode.

⁹ Ka samaytiyyo a Isira'eeliti pora daasha; ka akka tikkaasso a mattaayshoti qapnaadan ka arepadesa lammatta in ririkkoonnini ishootta disha; umma arepadesa a paayyota mina'e ukkuttowwa ishootta in miiddan.

¹⁰ Umma hakan samaytiyyo a Isira'eeli qara mukissampaya shuume desa paayyatte akkima miiddampaya ishootta miidden mina'e arepadesa ishootta in miiddan; ka nyaapaayti piisa jeersha; ka akkiman ana Waaqa mankisteeta sanynyeetaayti kokkonnaysho ka qupo ke lelli!

¹¹ Oto parraatti dikkissooyye ka aappadaassin kapopa annittooyye, hellaa a kupeettaayti oppa sooke oppan takka xaasha ikka pakkaayti oppa nuqusuma anka mankisteetaadi kokkonnaysha.

¹² A tika ana qupo nefo isha; anka alkaadi haka paraparati kokkonnaysha;

¹³ anti aappaaysho'en kodda; isha ka innaayyo kodda; akkiman isase ke turan nuqusume qara jaalalaayyo alle mayshe mina'e, umma alle isha qaraayye an maysho.

¹⁴ Tikiyyo isho mankisteetiyyo qara'en haka paraparati isha kokkonnaysha, alkaadi nefo haka paraparati caadan.’”

¹⁵ Naataani ka nessoose keleshaatoppan dakaade piisa Taawwiti lele.

Qinseeta Taawwiti a kalata

¹⁶ Sekkammaayye nuqusase Taawwiti tukkanase a taapota kodayteeta Waaqa kela kitto kelopa kulle ka fuula Waaqa tura kuti'e ka kide, “Oo Waaqqo Poqlo! Anti an ayno? Tooliyyo kan ayno akka aren ana kayte?

¹⁷ Oo Waaqqo, sede ke turaayye maana kapa'e dikamtaaw? Akka qoota sanynyeeta orxaytaayti a itturopati desa haasawwatte; oo Waaqqo akka nama orra piisa qara jaale ka ulfeena qapo kapa'e ana dikte.

¹⁸ Atti i'orxaytaayti uptaay, qoota orxaytaayti ulfeessite malla, anti sede qaropeela maanan kida ettansha?

¹⁹ Oo Waaqqo Poqlo, ana orxaytaayti malla kiite ka akka heennaatti qara'e wossen asse kutta koote ka kippewwosen piisa akka upnaysamane koote.

²⁰ Oo Waaqqo Poqlo ha Waaqa a ke paho in co; akkan nappaannon dakayne mina'e, ke mali Waaqa pila in co.

²¹ Waaqqo, ke samaytaayti Kipsi kela sookshe; ka xaayti kodatte ka maxxase xaayti kutta fuurammo malla kodadda kukutta ka orra qawwanna kodeetan mankistewwa ishootta turaayye daante; ka samaytaayti furatta awliteey; hela a samaytaayti paho piita qara a xaame ca?

²² Ha samaytaayti a Isira'eeli haka paraparati samaytaayti kodatte; oo Waaqqo Poqlo atti ka Waaqaaysho koddite.

²³ Amma nefo oo Waaqqo Poqlo, kippeeta ana orxaytaayti isho tooliyyo daasse haka paraparati a kokkonnaatto ka caatto; ka kippetase a daasse koda qara nakayshe.

²⁴ Sede nefo maxxaayti akka haka paraparati kuttado ka dakaado malla. Orra ka kida, ‘Waaqa Isira'eeli dukaatannen Waaqase Poqalla a we piisa ettaninno;’ Tikiyyo a orxaytaayti a Taawwiti ka fuulaayti tura kokkonnaatta ka caatta.

²⁵ Oo Waaqqo, akkima ana orxaytaayti tika qupto'e ana lelte; anti orxaytaayti anka seminan keepa qinsatta maxanyume.

²⁶ Oo Waaqqo Poqlo, atti dukaatanne a Waaqa; ka kippeese paxaara ana orxaytaayti daasse.

²⁷ Ka akka haka paraparati fuulaayti tura kallaatto'e sanynyeetiyyo a orxaytaaytiti sakeeta jaalatte; oo Waaqqo Poqlo, qoota atti ishi sakte malla, isha haka paraparati a sakame kodda.”