Mataafa Otoowwa a paayyota 15 - Mataafa Qulqulloota

Taapotase Yursaalamipa kalissa'e harmisatta a kodame

¹ Taawwiti ka katamaadi kara'e, tikka qupade ka taapoteta a Waaqati pora harmishe ka tukkana ishi daape.

² Taawwiti ka kide, “Akka taapota Waaqa haadane'e ka haka paraparati ishi koda kodane'e, Lawaatase a Waaqa reexade mali nama takka nefo taapota Waaqa haada isha parpaaccisni in kitto.”

³ Ka akka porase a harmishe karopa taapotase a Waaqa kalshane'e Isira'eeleta piisa Yursaalami karopa ollopa hale.

⁴ Ka sanynyeeta a Arooni isho Lawaata ollopa haleew.

⁵ Sanynyeeta Qe'aati oppaayye saaraaysho Uuri'eeli isho hellaasso nama dippa ka kunda lakki

⁶ ka sanynyeeta Meraari oppaayye saaraaysho Asaya isho hellaasso nama dippa lakki ka kunda lakki

⁷ ka sanynyeeta Kershooni oppaayye saaraysho Yu'eeli isho hellaasso nama dippa ka kunda sessa,

⁸ sanynyeeta Eliisafaani oppaayye saaraysho Shemaa'iyya isho hellaasso nama dippa lakki,

⁹ sanynyeeta Keprooni oppaayye saaraysho Eli'eeli isho hellaasso nama kunda sette,

¹⁰ sanynyeeta Usi'eeli oppaayye saaraysho Aminaataapi isho hellaasso nama dippa ka kudanka lakki ollopa hale.

¹¹ Kammadesa Taawwiti ka qeesewwasene Satooqi isho Apiyaataari ka Lewaatoppaayye Uri'eli ka Asaaya ka Iyyu'eeli ka Shemaa'iyya ka Eli'eeli isho Aminaataapi hale.

¹² Ka ishootta kide, “Ishina toolla Lawaata qaraayye a saarraay, ishina isho hellaassin a Lewaata porase an ishi harmishe karopa taapotase a Waaqa Poqalla Isira'eeli kalissa'e isi qulqullaysha;

¹³ wa malla Waaqa Poqallaanno a kuttati ino qara miirode, qoota ishin Lewaateeyye turan a deenin, ino nefo ka taanteta a turan lelamte qara isha an kaassannin malla.”

¹⁴ Semmalla qeesewwa isho Lawaata ka taapotase a Waaqa Poqalla Isira'eeli kalissa'e isi qulqullasse.

¹⁵ Akka Muuse qaaleta Waaqa qara ajaje mina'e, Lawaata ka taapotase a Waaqa xashshiyya qara molookan qapatte ka haate.

¹⁶ Taawwiti ka akka Lawaata issi oppaayye orra masmuureta dawo reexatto ikka kehayta ka pekena isho sokojkojaan nessaaysho kuttishan ka xasan dawadane'e, saarra Lawaatati lele.

¹⁷ Lawaata ka Hemaani inna Iyyu'eeli reexte; ka hellaasso oppaayye Asaafi inna Peraakiya ka hellaasso a sanynyeeta Meraari oppaayye Etaani inna Qusaaya reexte.

¹⁸ Ka ishootta quda'ew hellaasso a saaruman ishootta kamma qate shuumte. Ishootta nefo, Sekaariyaasi ka Yaa'isi'eeli ka Shemiiramooti ka Yihi'eeli ka Uuni ka Eli'aapi ka Pannayya ka Ma'iseeyya ka Matitiya ka Eliifeli isho Miiqineeya ka a xarra tooytina oppaayye Opeeti'etaami isho Usi'i'eeli quda reexte.

¹⁹ Akka nessaaysho kuttishan ka sokojkoja siplatin dawadane'e, Hemaani ka Asaafi isho Etaani shuumen.

²⁰ Sakkariyaasi ka Ya'isi'eeli ka Shemiiramooti ka Yihi'eeli ka Uuni ka Eli'aapi ka Ma'iseeyya isho Pennaya'ew, kehaytanne kirpa Alamooti dawni.

²¹ Matitiya ka Eliifele ka Miiqineeya ka Opeeti'etoomi ka Yu'i'eeli isho Asaasiya ka pekena dawni.

²² Kenaaniya saara a Lewaatase sammarritto'e, meeha nessada kirpa qara'e shuumame. Sede nefo qoota kamma teyno malla qara kitame.

²³ Peraakiya isho Elqaana tooytampaya xarra tika taapota'e kodden.

²⁴ Qeesewwasene Shepaaniya ka Iyyoosafiti ka Natina'eli ka Amasaayi ka Sekkaariyaasi ka Penaaya isho Eli'eseri, taapota Waaqa turandesa kaasa dawni; Opeeti'etoomi isho Yuhiiya kuli ka xarra tika taapota tooytini.

Akka Taapotase Yursaalamipa kalte

²⁵ Semmalla Taawwiti ka qimaya Isira'eeli isho shaalaqadda oranna ka taapotase a kodayteeta Waaqa tika Opeeti'etoomiiyyi qeeda'e, xasan aanen.

²⁶ Lawaata taapotase a kodayteeta Waaqa haate qoota Waaqa ishootta qaarqaare malla xorma tappa ka laha tappa qalen ka Waaqa kalisoota dehayshen.

²⁷ Taawwiti ka kaappa a rufta nukkulla isho oyleeta kalsade; Lawaatase taapotase haanitto piisa ka a sammarra isho saaraaysho Kenaaniyya ka asseew kaappa a rufta nukkulla kalsaden.

²⁸ Pora asse pahonne Isira'eeleta piisa ka uuyatanne ka kaasa isho turumpa daweetanne ka sokojkoja ka kehayta isho pekena dawaanne taapotase a kodayteeta Waaqatin kalen.

²⁹ Ete taapotase a kodayteeta Waaqa katama Taawwiti karopa kullinittooyye, Taawwiti ka xasan kirpini ka shoshshorri; Melkooli enenta Saa'ooli iskatteetase xaadi, maskootetoppan isha akkite ka iskaranxata isha puyatte.