Mataafa Otoowwa a paayyota 14 - Mataafa Qulqulloota

Kodadda Taawwiti Yursaalami kara kode

¹ Kiraami nuqusase a Tiroosi ka akka Taawwiti'i tika mankisteeta qupane'e erkamampaya ka harmoota a daka laajnitto ka a qora xefnitto isho qora talta erke.

² Taawwiti ka akkima Waaqa Isira'eeli qara isha nuqusumshe ka qoota samayta Isira'eeli malla mankisteetaadi kuttishe upnaade.

³ Taawwiti ka Yursaalami kara iskatta pila lekayta heme ka hellaa a diira isho a tuparra xaayade.

⁴ Maxxada a hellaadi a Yursaalami kara dalade nefo, Shamu'a ka Shopaapi ka Nataani ka Selemooni

⁵ ka Yiphaari ka Eliishu'a ka Eliibeleti

⁶ ka Nokaahi ka Nefeki ka Yafi'a

⁷ ka Eliishaama'i ka Pe'elyaada isho Eliifeleti kidammi.

Akka Taawwiti Filisteemeta pute

⁸ Filisteemeta ka akkima Taawwiti daatame ka Isira'eeleta piisa qara nuqusume dakayte. Ka isha fada'e, hupna a qapto piisan sookte. Taawwiti ka dakaye ka ishootta torpa sookeew.

⁹ Filisteemeta ka deete ka naaba Rafaayimi torpite.

¹⁰ Taawwiti ka Waaqa kaassade ka kide, “Hela in tuula ka Filisteemeta torpa? Ati ka akkan ishootta puto koota?” Waaqa ka kide, “Tuule ka torpe, akka ishootta puton kodaay!”

¹¹ Taawwiti isho xelaadi ka Pa'alfaraasimipa tuulen. Taawwiti ka eyye ishootta pute; ka kide, “Akka malxa kaba kaa'ino ka oppan fullaahasinno mina'e Waaqa ana qudanne paarkaalaayyo pashshe.” Ka seminan porooseti maxxa koden ka kidene, “Pa'alferaasimi.”

¹² Filisteemeta ka eyye waaqaddaadi diisse; Taawwiti ka akka apittan kupane ajaje.

¹³ Filisteemetase ka a lammattati naabase torpiteew.

¹⁴ Taawwiti ka a lammatati Waaqa kaassadeew; Waaqa ka ishi kide, “Ishootta mineela in fayyadan ma tultan ishootta oore ka qora leya minaadesa ishootta torpe.

¹⁵ Ka oto qorasene a leya qara desa nessa kamanta ke dakaannoyye, Waaqa xelase a Filisteemi a oranna ke turandesa torpa sookeey, atti torpa paayye.”

¹⁶ Taawwiti ka akkima Waaqa ishi kide qara kode ka Kepa'ooni paayyatte haka Keseriti'i, xela oranna a Filisteemeta pire.

¹⁷ Sede qaran xaate'e, kurra Taawwiti ka piita piisa qara dakaade; Waaqa ka akkima mankistewwa piisa isha fuurane kode.