Mataafa Otoowwa a paayyota 13 - Mataafa Qulqulloota

Akka Taapotase a kodayteeta Waaqa tiitaawte

¹ Taawwiti ka saarra a xela oranna a shalaqadda isho motoloqadda kodde piisa olli oorsade;

² ka samayta Isira'eeli piisa kide'e, “Oton i'ishina paxaariiyyi ikka heenna a Waaqa a Poqallaanno kodditeeyye, hellasene xanno Isira'eeli kara pora deha ka a sekaati kala ka Lawaata isho qeesewwa, ishootta olliiyyiiw a katamaddaasso isho porra horeeta siksattaati kala kamma erkina, ikka ino kapopa de'en;

³ ka taapotase a Waaqinno an xelta Saa'ooliiyyi an faanin issipa oorsanna.”

⁴ Leloose ka samayta piisa paxaarnaade, xora piisa ka kide, “Assen koona asu.”

⁵ Semmalla Taawwiti ka akka taapotase a Waaqa Qiiriyatiyi'aarimi qeedane'e, Isira'eeletase Sihihoori kirra a Kipsiti paayyatte haka tuullaysuma Hamaatiti'i safarte piisa ollopa xora hale.

⁶ Taawwiti isho Isira'eeleta piisa ka taapotase a kirupeelewwa lakki qara caan a Waaqa Poqalla qara kutiino, maxxaadi ka ishin halaame qeeda'e Yihuta kara katamasene a Pa'aala Qiiriyatiyi'aarmi kidamma opa aanen.

⁷ Ka taapotase a Waaqa tika Apinaataapiiyyi sookshen ka sarakella haaraya qara fee'en; Uusa isho Ahiyyo ka sarakellasene qulli ka ishin de'en.

⁸ Taawwiti isho Isira'eeleta piisa ka saara ka pekena ka kehayta ka timpa ka sokojkoja isho kaasa dawni ka isi piisan fuula Waaqa tura kirpini ka xaysonessuma ulfeessini.

⁹ Ete awta Kiidooni oppa kayeneeyye, xormadasene ka kehaden ka kufankufaden, Uusa ka taapotase a Waaqa quda qapa harka derayshe ka qape;

¹⁰ Uusa qoota taapotase quda qape malla Waaqa ka a kuttati isha qara miirode ka isha dayshe, isha ka eyye fuula Waaqa tura to'e.

¹¹ Qoota Waaqa Uusa ishshe malla Taawwiti imiiroode, porose ka haka awweti'i, “Qepanitta Uusa” kidame.

¹² Awsetiiyyi Taawwiti qoota a kuttati Waaqa fuure malla ikide, “Ata kuli attan taapotese a Waaqa issipa teyyatta ettansha?”

¹³ Ka semmalla taapotase a Waaqa katamaadi a Taawwiti oppopa iskapopa kalissa diishe ka tika nama takka Opeeti'etoomi kidammo a Kaatitta opa kalshe.

¹⁴ Taapotase a Waaqa ka tika a Opeeti'etoomi kara'e leyaa sessa pirte; Waaqa ka toola Opeeti'etoomi isho wa a qapane piisa sake.