Mataafa Otoowwa a paayyota 12 - Mataafa Qulqulloota

Piiniyaameta a turan Taawwiti quda koddite

¹ A Taawwiti Saa'ooli inna Qiisi tura qahe ka Siqlaaki kara cooyye, xormeeta a isha quda koddite ka orannaappa isha qaarqaarte sene.

² Ishootta a paantaan paata pokna ka akkitta ka pittittan lawa pokkeeta ka daka kullumissa ettaninna. Ishootta nefo daltayta a Saa'ooli a Piniyaamitta.

³ Saarraasso Ahi'eseri isho Yo'aashi; ishootta hellaa Ishemaa'i a Kipi'itta; Yisi'eeli isho Peleti hellaa Asimaaweti; ka Peraaka ka Iyyu a Anaatootitta

⁴ ka Yushimaa'iyya Kepa'oonitta isase xormewwasene kunda sessa oppaayye irreelayta kodde ka ishootta qara saara kodde; ka Yirimeya ka Yahisi'eeli ka Yohanaani isho Yosapaati Keteritta

⁵ ka Eli'usaayi ka Yariimooti ka Pe'aaliya ka Shemaariya isho Shefaatiya Haarifitta

⁶ ka Qooretase Eliqaana ka Yushiiyahu ka Asaari'eeli ka Yu'eseeri isho Yashipi'aami

⁷ ka Yu'ela isho Sepaadiyya; hellaa Yirohami a Ketooritta

Kafa Kaati oppa a Taawwiti quda kodde

⁸ Taawwiti a koommaytoppa mishshikeetaadi kara cooyye, kafa Kaati oppaayye orra de'e ka xelaadi a oranna quda kodde. Ishootta nefo xela kokkoka a oranna harmisade ka kontaleeta isho orana qapatta saho. Fuulaaysho akka karma mina'e orra fuurinni ka akka koraata irrowwa qara doddoonitto mina'e, a kuttati keerri.

⁹ Saaraaysho nefo Eseeri, a isha kamma qato Aptiyu ka a sessatta Eli'aapi;

¹⁰ ka a afratta Miishimaana ka a kenatta Ermiyaasi;

¹¹ ka a lehatta Ataayi ka a tappatta Eli'eeli;

¹² ka a settatta Yohanaani ka a sakalatta Elisapaati;

¹³ ka a kundatta Ermiyaasi ka a kudanka takkatta Makipaanaayi.

¹⁴ Sene kafa Kaati ka saarra xela oranna; ishoottoppa a kamma oorsho motoloqa kapa'e dikammi, a tura qato ka shaalaqa kapa dikammi.

¹⁵ Leya paayyotatiiyyi a kirra Yurtaanoosi immakaade ka qaran waallooyye, a oppan tulle ka naabbasene a qinda piirtota isho a dumaatatin ca kara orra daane ishootta.

Kaffa Piiniyaami isho a Yihuta oppa orra Taawwiti quda kodde

¹⁶ Kafa a Piniyaami isho a Yihuta oppaayye orra deemo ka mishshikeetase a Taawwiti kara co opa de'ew.

¹⁷ Taawwiti ka orrose turopa sooke ka ishootta kide, “Oton ana qaarqaara'e nakayta deeteneeyye, ishin teyyatta'e in harmisade; ma oton ana dapa in qapnini qapsiissa ka harka paarkaalaayyo oppopa ana tarpissa faateneeyye, Waaqa aappadaanno a sede akko ka dukaata farato.

¹⁸ Hapura Waaqa ka Amasaayi saarase a nama kunda sessa qara lekkade; ikka kide, “Oo Taawwiti, ino an xaayti! Oo inna Isseyi, ino ke ollin kinna! Waaqa ke olli caay, nakayta a ke koddo! A ke qaarqaarra pisae nakayta a koddo.” Taawwiti ka ishootta teyyade ka xelaadi a oranna qara saarra ishootta kodade.

Kafa Minaase oppa orra Taawwiti quda kodde

¹⁹ A Taawwiti Filisteemeta olliiyyi Saa'ooli torpa tuullooyye, kaffa Minaase oppa orra lamayta ka orraaysho oppa alle sooke ka xela oranna a Taawwiti quda kodde. Qoota Filisteemeta saarraasso olli oorsatte ka kiite, “Takka punu poqallaadi a xatta Saa'ooli kelopa kala ka ino pirsiissa” Malla alle Taawwiti qeette ka Tiklaakipa kalisse; umma Taawwiti isho orraadi Filisteemeta qaarqaara in ettaninne.

²⁰ Ete Taawwiti Tiklaakipa aaneeyye, kafa Minaase oppa xela oranna a orraaysho jippe ka isha qudopa oore. Atinaahi ka Yosapaati ka Yiti'eeli ka Mika'eeli ka Yosapaati ka Elliihu isho Siletaayi; ishootta a haminta Minaase oppa caaneeyye, shaalaqadda.

²¹ Ishootta pisani xormeeta oranna'e kodden ka xela a Taawwiti qara saarummi ka adampaya torpeetanne, Taawwiti qaarqaaren.

²² Taawwiti qaarqaara'e kuyyaata kuyyaatanne orra xelaadi quda padaawamaanne aane, ikka xela oranna a koope ka kokkoka qapnaade.

Lekuma a xela oranna a Taawwiti

²³ Akka Waaqa Taawwiti kide mina'e a Keprooni kara cooyye, xela oranna a Saa'ooli qara mankisteeta qeedeta ka ishi daassata de'e sene arepaxata ca.

²⁴ Kafa Yihuta oppa xela a kontaleeta ka orana qapade ka torpana harmisade nama kuma lehi ka dippa sette.

²⁵ Kafa Simooni oppa xela oranna harmisade'ew, nama kuma tappa ka dippa takka.

²⁶ Kafa Lewi oppaayye nama kuma afuri ka dippa lehi.

²⁷ Isase toola Arooni qara saara kodde Yoodaahe isho orra a isha quda co nama kuma sessa ka dippa tappa.

²⁸ Satooqi xormase a oranna xayya qapo isho toolaaysho oppa saarra oranna nama kunda lakki lakki.

²⁹ Kafa Piniyaami oppa a Saa'ooli olli diika takka kodde ka haka kiseese kaynitto kara Saa'ooli amaname, nama kuma sessa.

³⁰ Kafa Efreemi oppa xormeeta a oranna a sanynyewwaasso oppa kurraaysho dakaanna nama kuma kunda lakki ka dippa sette.

³¹ Kafase a Minaase quda paka takka a Taawwiti nuqusumsissa de'e, a maxxadaasso xawwi reexxame nama kuma kudanka sette.

³² Kafa Yisakoori oppa a wa kiseesse oppa kitta upnaade ka Isira'eeli wa kodeeta isheetta faanitta qalpeeffade, saara dippa lakki ka daltayaasso a ajajaaysho kela ca ollinni de'en.

³³ Kafa Saapilooni oppa a karitta lakki in qapnini ka meeha oranna piisan oranna torpeeta harmisade ka Taawwiti qaarqaara de'e, nama kuma kunda keni.

³⁴ Kafa Niftaalemi oppa saarra oranna nama kuma takka ka xela ishootta kela co ka kontaleeta isho oranna qapade, nama kuma kunda sessa tappa.

³⁵ Kafa Taani oppa a oranna harmisade nama kuma kunda lakki sette ka dippa lehi.

³⁶ Kafa Aseeri oppa a oranna torpa saha ka harmisade nama kuma kunda afuri.

³⁷ Yurtaanoosiiyyi qinda piirtotatinni kafa Roopeeli ka a Kaati isho a Minaase quda paka takka a meeha oranna ika lekayta hidade, nama kuma dippa ka kunda lakki.

³⁸ Sene piisa xelaaysho a oranna karaayye a oranna torpa ka Isira'eeli piisa qara Taawwiti nuqusumissa Keproonipa de'e. Isira'eeleta a ata hasse piisa ka Taawwiti nuqusumissa'e karitta takka kodatte.

³⁹ Qoota toollaasso kalaata ishootta koden malla, orrase ka Taawwiti olli dameeta ka ikkeeta quda'e kuyyaata sessa pire.

⁴⁰ Kantada Keprooni ka piitaddasene sesseka a Yisakoori ka a Saapilooni isho a Niftaalemi karaayye kuli harrewwa ka kaalla ka kaankewwa isho Xormadaan damta fee'en ka Ishootta ishin de'en. Isira'eeleta kara qoota xasa kutta kodde malla, daamma ka qoomayta hilteeta a laaqame isho a wayneeta ka taadeta a wayneeta ka sayteeta ekerta ka xaraaffa isho laahadda, kuttumtanne dehaaden ka eyye puren.