Mataafa Otoowwa a paayyota 11 - Mataafa QulqullootaAkka Taawwiti nuqusa Isira'eeli ka a Yihuta kodde 1 Isira'eeleta piisa ka Keprooni karopa Taawwiti kapopa ante ka ishi kiite, “Ha ino an ollin diika takka; 2 xatta a Saa'ooli ino qara nuqusa koddeeyye, ke Isira'eelin tuulli; Waaqa Poqalla ka ke kide, ‘Samaytiyyo a Isira'eeli qara'e sikmayta ka saara koddita.’” 3 Qimaya Isira'eeli piisa ka Keprooni karopa nuqusase Taawwiti kapopa de'en. Taawwiti ka Keprooni kara'e fuula Waaqa tura ishootta olli kodayteeta kodade. Ishootta ka Kippetase a xatta Waaqa Saamu'eeli qudan daashe qara'e Taawwiti daaten ka Isira'eeli qara nuqusumshen. Akka Taawwiti Yursaalami pute 4 Taawwiti isho Isira'eeleta piisa ka Yursaalamise “Iyyapuusi” Kidammitto opa tuulen; sitiiyyi Iyyapuusata piisse oppaayye kala. 5 Ka Taawwiti kiite, “Pakkanna arepa a kullito!” Taawwiti xoori mishshikeeta a katama Siyyooni qara pire; isheetta ka “Katama Taawwiti” kidamte. 6 Taawwiti ka kide, “A paayyota Iyyapuusatoppa ikassa paayyo, saara xela oranna'e kodda.” Iyyo'api inna Seeruyya ka paayyota tuule ka saara xela oranna kodde. 7 Sekkammaayye Taawwiti ka kawwattase kara kallaade; ikka semmalla “Katama Taawwiti” kidamte. 8 Taawwiti ka Miillo paayye ka katamasene qupe; Iyyo'aapi ka qupeeta a kela haste harmishe. 9 Qoota Waaqa Poqalla a we piisa ettaninno isha olli co malla, Taawwiti ka kokkonnaattaan aane. Xormeeta oranna a Taawwiti a kurraaysho dakaanno Saamu a 2ta 23:8-39 10 Sene arepaxata ca xormeeta oranna a Taawwiti a mattiyya kodde. Ishootta samayta Isira'eeli piisa ollinni kodden ka akka turan Waaqa kippeeta daashe qara'e Taawwiti akka piitoose piisa qara nuqusa koddo'e, isha qaarqaaren ka nuqusumaadi kokkonnayshen. 11 Sene arepaxata dikame, xormeeta oranna a Taawwiti. Haakimoonittase Yaashopi'aami, saara xormeeta sessa isha oranaadi teyyade ka oranna takkan oppa'e nama dippa sessa leyshe. 12 Xormewwasene sessa oppaayye a isha kamma qannoow, Ali'asaari inna Dodo a A hottitta. 13 Isha awta Filisteemeta oranna ollopa tuulteeyye, Paasitemiimi karaayye Taawwiti olliiyyi ca; dula poortan immakaade oppaayye, xela Isira'eeli ka Filisteemeta tura qahen. 14 Isha isho orraadi xoori, dulase otantoppa'e pora qapaden ka Filisteemeta leyshen; Waaqa ka putayma kutta ishootta daashe. 15 A xela Filisteemeta naaba Rafaayimi kara safareeyye, saarrasene kunda sessa oppaayye sessa ka Taawwiti kapopa shilase rahana a Adolaami kapa co opa aanen. 16 Sitiiyyi Taawwiti mishshikeetaadi kara ca; xela oranna a Filisteemeta ka Peteleheemi karaayye ca. 17 Taawwiti ka pisha deepode ka kide, “Katin nama qaawase a pisha xarra Peteleheemi oppa co kara pisha ikkayta ana muuddini ma!” 18 Sitiiyyi xormewwasene sessa ka xela a Filisteemi oppan mitten ka qaawase a pisha xarra Peteleheemi oppa co kara pishasene muudden ka Taawwiti ishin de'en; Taawwiti xoori pishasene ikka in heenanne ma kalisoota Waaqati'i alle tuqe. 19 Ka kide, “a Waaqa alle ana kapa sede sekaysho! Sede diikase orrose karitta isqara kutade ka aane ikkeeta minanne?” Pishosen muudda'e, qoota ishootta isqara karitta kutaden malla, Taawwiti pishosen ikka in heennaanne. Xormewwasene sessa tooy wa asse paha'e koden. 20 Apiisa inna opa Iyyo'aapi xormewwasene sessa qaraayye isha saara kodde. Isha ka oranaadi teyyade ka nama dippa sessa pire; seminanne xormewwasene sessa olliiyyi kurraadi ka dakaade. 21 Kadi punu pora xormewwasene a sessa oppa in kayninniiyyi, qoota ulfeena harka lakki akkade malla, ajajampaytaaysho'e kodde. 22 Pannayya inna Yoodaahe isase Qapsi'eeliyyi de'e, torpampayta a kokkoka a koda kutta kode. Isha xormeeta oranna a Mo'aapi lakki leyshe. Ka kuyyaata takka a apteenta roopte ka piita qara immakiteeyye, qaawa karopa lekkade ka karma ishsheew. 23 Ka irreelayta takka a Kipsi a deruma dumduma ken kayno ishsheew; Kipsittose kappuma a sayma oranaadi wantarshoota ohaata mina'e ca; Pannayya ka turopa xata uleeta pattan aane ka harka Kipsittaseti oppa orana tafe ka ishannew isha ishshe. 24 Xormuma pannayya a inna Yoodaahe kode sede. Xormewwasene sessa olliiyyi kurraadi ka dakaade. 25 Kadi punu a xormewwasene kunda sessa oppa kurraadi dakaadeeyye, pora xormewwasene sessa oppa in kayne. Taawwiti ka ajajampayta isha tooytino qara'e, saara isha kode. 26 Sene arepaxata ca, hupnampayasene a xela oranna oppa caan. Asaaheli inna opa Iyyo'aapi, ka Elihanaani inna Dodo a Peetelehemitta, 27 ka Shamooti Harootitta ka Helesi Feletitta 28 ka Iira inna Iqeeshi Teqo'itta ka Api'eseri Anatotitta 29 ka Siipekaay Huushitta ka Ilaayi Ahoohitta 30 Mahiraayi Netoofitta ka Heleti inna Paa'ina a Netoofitta 31 ka kafa Piniyaami oppaayye Itaayi inna Riipaayi a Kipi'itta ka Pannayya Piri'atoonitta 32 ka Huraayi isase naaba Ka'ashi kara dalade ka Api'eeli Arapitta 33 ka Asimaaweti Pahiirumitta ka Eliyaahipa Sha'alpi'oonitta 34 ka hellaasene a Haashemi a Kiisonitta ka Yoonataani inna Shaake a Haraaritta 35 Ahi'ami inna Saakaari a Haraaritta ka Eliifaali inna Uuri 36 ka Heferi Mekeritta ka Ahiiya Faloonitta 37 Hesiro Qermeloositta ka Na'iraayi inna Esipaayi 38 ka Yo'eeli inna opa Nataani ka Mipihaari inna Haakiri 39 ka Seleqi Amoonitta ka Naahiraayi Perotitta isase Iyyo'aapi kelaayye meeha oranna haano 40 ka Iira isho Kaareepi Yatiritta 41 Ooriyooni Hittitta ka Saapaati inna Ahilaayi 42 ka Atiina inna Shiisa Roopelitta, isha poqalla kafa Ropeeli ka saara a xela isha quda cooti a nama kunda sessaati 43 ka Hanaani inna Maaika ka Iyyoosaafiti Miitaanitta 44 ka Usiiya a Shiteritta ka Shaama'i isho Yi'eeli hellaa Hotaami a Aroritta 45 ka Yidi'eeli isho Yoha hellaa Shiimiri Tiisitta 46 ka Eli'eeli Mahaawitta ka Yiriipaayi isho Yoshaawiya hellaa Elina'aami ka Yutiima Mo'aapitta 47 ka Eli'eeli ka Opeeti isho Ya'isi'eeli Soopitta. |