Mataafa Otoowwa a paayyota 10 - Mataafa Qulqulloota

Toota nuqusase a Saa'ooli

¹ Sitiiyyi Filisteemeta ka Isira'eeleta torpite; Isira'eeleta ka turaayye qahate. Lekaya ka irroota a Kilpo'a qara le'en.

² Filisteemeta ka Saa'ooli isho hellaadi qara pirte ka hellasene xaadi Yonataani ka Apinataapi isho Malkishu'a lesse.

³ Qinda Saa'ooli conne oranase ka Saa'ooli qara kokkonnaade. A paantan pokna ka isha akken ka a kuttati isha qaren.

⁴ Saa'ooli ka xayyoolaytase isha kela meeha oranna haano kide, “Akka sene dawra qara in murannini in deenin ka anoppa in kahannini, attiw koraatetaayti yukado ka kela ana pire.” Ma xoori xayyoolayse isha kelaayye meeha oranna haano a kuttati fuure ka tiite. Saa'ooli ka koraateta mattaadi'iw qeede ka qara pi'e.

⁵ xayyoolaytase isha kela meeha oranna haano ete akkima Saa'ooli to'e akkeeyye, isha kuli koraateta mattaadi qara'e pi'ew ka isha kapa'ew to'e.

⁶ Saa'ooli isho hellaadi sessa ka asse piramen; nuqusuma toolaadi ka dikkade.

⁷ Isira'eeleta naabose kara kalto, akkima Saa'ooli isho hellaadi le'en xela Isira'eeli ka alle qahate ete akkiteeyye, katamaddaadi diisse ka alle qahate. Filisteemeta ka deete ka oppa kutiite.

⁸ Parraytaadiiyyi ete Filisteemeta orra le'e quda mehadda furatta deeteeyye, Saa'ooli isho hellaadi sessa a irroota Kilpo'a qara le'e akkite.

⁹ Ka saa'ooli qara matta murte ka mehaddaadi a oranna isha quda furatte ka akka otootose a xasa orraaysho isho tikkaasso a killoota kara lelane'e orra erkite.

¹⁰ Ka mehaddaadi a oranna qeeden ka tikaaysho a killowwa kara xaayte ka mattaadi tikase a killoota a taakooni kara rakkite.

¹¹ Yaapesheta a Keleaadi kara kalto, ete wa Filisteemeta Saa'ooli qara koote dakateeyye,

¹² xormeetaaysho piisa xa'e ka aane ka pukka a Saa'ooli isho a hellaadi qeette ka Yaapeshipan kalte ka lafaasso qoyra hilteeta kela mookte ka kuyyaata tappa damta musatte.

¹³ Saa'ooli qoota Waaqa in ajajammin malla to'e; umma qaaleta Waaqa in tooytaanne ka laadi qarandesa a kaarayya haleenitto soosade;

¹⁴ umma Waaqa in kaassanne; Waaqa ka isha ishshe; ka mankisteetaadi Taawwiti inna Isseyi daashe.