Zakaliya 5 - Amazwi Yakwe Leza 2013

Cilolwa ca lupapulo ulwapapukanga umwiyulu

¹ Nupya cino nati kaninule amanso, indola icilolwa ca lupapulo ulwapapukanga umwiyulu.

² Umungeli pali pakunguzya ati, “Uzye walola cani?” Nani naasuka inti, “Nalola ulupapulo lukupapuka umwiyulu, luno mu utali luli amamita fundimbali nga nu mu kusalala namo amamita yani na citika.”

³ Nawe apali pakunena ati, “Pa lupapulo lulo palemvilwe ulutipu ulwakutipwila insi yonsi. Ulusansa longa pa lupapulo lulo palemvilwe ukuti umwivi wensi yalamuzinga umu mpanga, nu lusansa luze lwa lupapulo palemvilwe ukuti umuntu wensi wino akalapa ufi yalamuzinga umu mpanga.”

⁴ Yawe Wamaka yonsi wavwanga wati, “Ulutipu luu ndaluponyezya umu ng'anda ya muntu wensi umwivi, nga nu mu ng'anda ya muntu wensi wino akalapa ufi. Lwene lulasuka lwikalilile mu mang'anda yao nu konona vyonsi vino yakuulilwako.”

Cilolwa ca mwanaci muli cimpokoso

⁵ Mungeli wino twalandanga nawe pakutandika wizile nupya anena ati, “Sanzula amanso ulole cino cikwiza.”

⁶ Nga nani imuzya inti, “Uzye icani?” Nawe angasuka ati, “A cimpokoso cakupimilako uyi onsi uwazula insi yonsi.”

⁷ Pa cimpokoso kwene pali ni ntupiko ya mutovwe, nga lino nkulolekesya indola inkupiko yaitupula, nga ndola umwanaci atenzi mwenemo.

⁸ Umungeli avwanga ati, “Umwanaci wii, ali cimanyililo ca uyi kwene.” Alino umungeli atininkizya umwanaci kwene wilya muli cimpokoso, akupikapo ni ntupiko, nayo yali inyome wakwe cimwi.

⁹ Lyene indingamila mupela, nga ndola anaci nayauze yaili yakwiza, yakupapukila lwa panondi, ale yali na maapa kwati amaapa yakwe yanamakungwe, nga yatumpula cimpokoso pakasi ki yulu ni nsi.

¹⁰ Alino nani nuzya umungeli wino twalandanga nawe inti, “Uzye aukwi kuno yakutwala cimpokoso?”

¹¹ Nawe aasuka ati, “Yaya ku kucikuulila ng'anda ikulu mu mpanga ya Babiloni. Lino ng'anda iyo ikulu ilasila yalakuula iciimbili cakuteekapo cimpokoso.”