Zakaliya 13 - Amazwi Yakwe Leza 2013

¹ Yawe Wamaka yonsi wavwanga wati, “Lino insita iya ilafika, intulo yonga ilapongwela amanzi, yano ana yakwe Davidi na ina Yelusalemu yalafulala ku ukowezi wao.

² “Pa nsita kwene ilya ndalovya amazina ya tuluwi mu mpanga ilya, nga kutalaya nanti umwi alaiusya nupya. Na yakasema yaufi nayo ndayafumyamo, ndafumyapo nu mukonkelelo wakupepa utuluwi.

³ Alino umwi ndi waca watwalilila ukusema, isi na nyina, yayo amuvyalilila yalamunena yati, ‘Wemo ukulonda imfwa, pasi pano ukuitunga ukulanda amazwi yakwe Yawe, lino fwandi ivyaufi sile vino ukulanda.’ Alino ndi waswilizyapo ukusema, lyene isi na nyina amuvyalilila, ali yano yalamutota icanzo mpaka yamupulinkanye, pamulandu wakusema ivyaufi.”

⁴ Insita iyo ndi yafika kutalaya kasema nanti wenga alayuvwa pa vilolwa vyakwe, nanti kuzwala vyakuzwala vya usemo pakuti atumpoka ukuti akasema.

⁵ Kasema wensi alalanda sile ati, “Awe, nemo nsi kasema. Lelo nene mulimi sile. Nemo kulima kuli kuno nkalima ukufuma ku wance wane.”

⁶ Umwi ndi waca uzya kasema umwi wati, “Uzye fwandi ivilonda ni viyazi ivili pa cifuwa cako vyafuma kwi?” Nawe alaasuka sile ati, “Viyazi vii alino yancisile ku ng'anda yakwe cuza wane wenga.”

Lamulo lyakukoma kacema wakwe Leza

⁷ Yawe Wamaka yonsi wavwanga wati, “Ale we lupanga lwane, zanza kacema wane, zanza umuntu akambombela. Ukome kacema pakuti imfwele zisalangane. Nani namazanzapo utwana twa mfwele.”

⁸ Yawe Wamaka yonsi wavwanga wati, “Alino mu mpanga yonsi apa vipande vitatu vya antu, palakomwa vipande vili. Lelo mulasyala icipande conga.

⁹ Cipande ca antu calenga vitatu cino casyala penepo cili cino nemo ndezya, nu kuyazifya ndi vino yakaengulula siluva, nupya ndayezya ndi vino yakaezya zaabu. Yalaalaizya izina lyane, nani ndayuvwa nu kuyanena inti, ‘Mwemwe antu yane.’ Nga nayo yalavwanga yati, ‘Wewe uli Leza witu.’ ”