Yowelo 3 - Amazwi Yakwe Leza 2013

Leza alapingula imitundu ya antu

¹ Yawe avwanga ati, “Mu manda yalya nu mu nsita kwene ilya, lino ndawezezya aikazi aku Yuda ulongo nga na aku Yelusalemu,

² indakonganika imitundu ya antu yonsi nu kuyatwala uku Cifoloma ca Yeosafati. Kuku kwene akuno ndayapingula pali vino yacitile antu yane aina Izlaeli. Pasi pano yene yayasalanginye umu nko zyuze nu kwankana impanga yane.

³ Yene yapendozile apa kwankana antu yane nga yakauzyanya alumendo na yacizelele. Yene yakazizye ana nu kukauzyanaya ana anaci na waini apakuti yamwe waini wiyo.

⁴ “Uzye mwemo mwe ina Tuli na ina Sidoni na mwensi mwe ikazi aku mpanga ya Filistia, mukupanga ukuncita cani? Uzye mukucita icilanduzi apa cintu cimwi cino nacita? Ndi cakuti mukulandula, ale lyene nani ntalalengela ukumuswilizizya ivicitwa vinu vyonsi apa mitwe inu zuwazuwa.

⁵ Pasi pano mwemo mwatozile siluva na zaabu wane kumwi ni vintu vyuze ivyamutengo ukome, nga imuvitwala ku mang'anda inu ya mapepo yakwe tuleza twinu.

⁶ Mwemo mwaile mukazya antu aku Yuda na aku Yelusalemu ku Agiliki kuti muyatwale ukutali ukufuma ku mpanga yakumwao.

⁷ Lelo nemo ndayalondola kuti yawele uku mpanga yao. Asi cico conga, lelo amacuzi yano yapitamo, namwe ayano ndamuwezezya apa mitwe inu.

⁸ Indakazya ana inu aonsi na anaci kwene ku antu amu Yuda, nga nayo yalaya yakayakazye ku ina Sabeya, uluko lulu lwa inamasi aikala ukutali. Natimvwanga ne Yawe.”

⁹ “Umini imbila ii pakasi ka nko zyuze muti, ‘Iteyanyizini ukulwa inkondo, amini ivita vinu vyamaka. Asilika yonsi yapalame, yatandike ukulwa.

¹⁰ Sulini amase inu kuti mupange amalupanga. Sulini ni vipeni vyakutungwilila kuti mupange amasumo, apakuti yayo atakweti amaka nayo kwene yalweko.

¹¹ Pitisyini izini, mwe antu amu mitundu yonsi iyazinguluka, nga mukongane pamwi kuko kwene. We Yawe si ungala utume ivita vyako!

¹² “‘Antu amu mitundu yonsi yaiteyanye nga yize ku Cifoloma ca Yeosafati. Kuku kwene akuli kuno ne Yawe ndapingula antu amu mitundu yonsi ukufuma ku ntunga zyonsi.

¹³ Swelula icikwakwa cakusinzila, pasi pano ingano zyatizica mpiti. Izini, mulyatole amatingi, pasi pano umwakufenela amatingi mwatimuzula waini, nga na waini akusampoka. Vivyo ivyaya ukwifya wakwe cimwi, ukwa antu amu mitundu yuze.’”

¹⁴ Amaumba na maumba ya antu yali mu Cifoloma ca Upinguzi. Pano Uwanda wakwe Yawe watiupalama apipi mu Cifoloma ca Upinguzi.

¹⁵ Ilanzi nu mwezi vilaya wa mfinzi, ni ntanda nazyo zilata ukuwala.

Yawe alapolelela antu yakwe

¹⁶ Yawe akululuma ku Zioni, ni zwi lyakwe likuvwika wa kupangalansya ukufuma mu Yelusalemu. Nga insi nu lwelele ivitenta. Lelo Yawe alaya cakuzinamo antu yakwe, ilinga lya kucingilila aina Izlaeli.

¹⁷ “Alino mulamanya ukuti nene, ne Yawe, Leza winu, ne muno nkaikala ku Zioni, umwamba wane uwamuzilo. Umusumba wa Yelusalemu ulaya uwamuzilo nga ainamasi yatalatala yauzanze nupya.

¹⁸ “Mu wanda ulya, imyamba ilazwa waini umupya, nga nu twamba tonsi tulapongolola iziya, nga nu tunguzi twamu Yuda tulakonkoloka amanzi. Akafukoka kalafukoka amanzi mu ng'anda yakwe Yawe nu kutapilila cifoloma ca Sitimu.

¹⁹ “Lelo Eguputo alasyala wa citotela. Edomu nawe alasyala wa lwanga, pamulandu wa nkondo ino yaponyizye apa antu aku Yuda nga na pamulandu wa kuzwisya uwazi uwakaele umu mpanga yao.

²⁰ Lelo uku Yuda kwene antu yalayelelela umuyayaya, nga uku Yelusalemu kutalaulwa antu mu nkulo zyonsi.

²¹ Ndalandwila uwazi wakwe yayo akomwa, nupya ntalelela nu utazi uwo uwakatwe. Nupya ne Yawe ndaikala ku Zioni.”