Yoswa 23 - Amazwi Yakwe Leza 2013

Yoswa wapakasya aina Izlaeli

¹ Papisile insita ntali ukufuma lino Yawe wapeezile aina Izlaeli ukwikala mutende ku anisi yao ayazingulwike, nga Yoswa nawe walanga watakota cuze.

² Lyene Yoswa aama aina Izlaeli yonsi, kumwi na ikolo yao nga ni ntunguluzi zya ng'anda zyao, na yakapingula yao nga na yamusika ya vita, nga ayanena ati, “Nemo ndakai natinkota cuze.”

³ Mweisikulu mwailolile vino Yawe wacisile ku antu amu nko zi pamulandu winu. Yawe Leza winu aliwe uwamulwisizye.

⁴ Iusyini vino napeezile impanga yao yonsi ku mitundu inu kuti iye icaupyanyi, impanga ya antu yonsi yano nacimvya ni ya antu yonsi yano yasyala pakasi ka Luzi lwa Yodani nga na Yemba wa Adiliya lwaku ufumondaka.

⁵ Yawe Leza winu umwisikulu alayazinga mwenemo lino mwemo mukuyamo. Wene alayazingila ukunzi pa manso inu kuti mupoke impanga nu kwikala mwenemo, wakwe vino Yawe Leza winu wamulavile.

⁶ Acino fwandi mwaikomelezya nu kutekela pa kulondela vyonsi ivyalembwa mu lupapulo lwa Masunde yakwe Mose, ukwaula kusya nanti cimwi.

⁷ Mutaezya ukusakana na antu amu nko zi zyonsi izyasyala pakasi kinu. Mutaezya ukulumbula amazina yakwe tuleza twao nanti ukuomvya amazina yatuko nu mulapo. Mutaezya kufukamila nanti kupepa tuleza tuto.

⁸ Lelo mulinzile kuya acumi kuli Yawe Leza winu, wakwe vino mwacita kufika ni lelo kwene.

⁹ Yawe uwamukolelile ala akumuzingila inko zikulu nupya izyamaka. Na pilelo kwene kusi umuntu uwa munoyali uwali na maka akumulwisya.

¹⁰ Wenga uwa munomuli angacocovya antu izimbi lyonga, pamulandu wakuti Yawe aliwe akamulwisizya wakwe vino wene walavile.

¹¹ Acino mutekele kuti mwatemwa Yawe Leza winu.

¹² Lelo ndi cakuti mwata ukumuyela mwatandika ukuvwana na antu amu mitundu iyo iyasyala apakasi kinu, nu kutwalana nayo nga nu kutowenkana nayo,

¹³ lyene mumanye nu kusininkizya ukuti Yawe Leza winu alata ukuzinga antu amu nko zi pa manso inu. Lelo yene yalaya wa viteyo ni nkose kunomuli. Nupya yalaya akalipe wakwe swepu pa matundu inu nanti wa myunga mu manso inu. Vii vyonsi vilamucitikila mpaka mukalowe pyu umu mpanga kwene ii isuma, ino Yawe Leza winu watamupeela.

¹⁴ “Ndakai nemo lyene nasya mfwe. Mwemo mwensi mumanyile umu myenzo inu yonsi ukuti kusi nanti cimwi cisuma cino Yawe Leza winu wamulaya icitafikiliziwa. Vyonsi kwene vino walavile vyafikiliziwa.

¹⁵ Lelo mu musango uli umwi kwene uno Yawe wafikilizya ivisuma vino walavile, avino wene alamuletela iviipe vyonsi panomuli vino wamusopisizye, mpaka asuke amuzinge umu mpanga ii isuma ino wamupeela.

¹⁶ Ndi cakuti mwakana ukusunga upangano uno Yawe Leza winu wamupile ilamulo kuti mwasunga, ndi mwaca mwapita nu kutumikila nu kupepa tuleza tuze, ale lyene ukali wakwe Yawe ulamufulumila. Nupya mulalowa zuwa mu mpanga isuma ino Yawe watamupeela.”