Yobo 16 - Amazwi Yakwe Leza 2013

Yobo

¹ Lyene Yobo aasuka ati, “Amanso yane nayo yayenza na cee, pamulandu wakulila.

² Ampiti sana lino natandike ukuvwa mazwi ya musango uo. Na vyonsi vino mukuvwanga, vikumvulumwila sile amasakamiko.

³ Mulata lilaci ukuvwanga ivyakuzailazaila? Uzye cikamupamvya uli ukulanda amazwi yakanyengula mwenzo?

⁴ Nani kwene inja wakwe mwemwe, ningavwanga vyonsi vino mukuvwanga. Ngano nkuti ndi navwanga intensya nu mutwe mpaka muzuka na cele, uku mazwi yane.

⁵ Lelo ningalanda amazwi akumukomelezya, suka sile na pano amati yanguma umu mulomo wane.

⁶ “Kwene nanti ukuvwanga vii, cikumbaya wakwe cimwi. Ndi cakuti nati nkamyalale sile, ale pasi nanti cimwi icakungavwa.

⁷ Cumi kwene, we Leza watumvungola sile. Watuleka nu lupwa lwane kuti lulowe.

⁸ Wemo watumfyambata. Wewe mwanisi wane! Natinsyala sile amakwankwa yatupu. Na antu yonsi yakuti cico kwene ali cisinilo.

⁹ Cipyu cipyu, Leza watandepola, ala aluminye ni ncecete. Umwanisi wane watantunwila amanso.

¹⁰ Antu yonsi yatiyanjasamwila utunwa twao. Yakundizizya nu kumpamola amapi apa manso.

¹¹ Leza watampela mu makasa ya antu yankota, nu kumfumbatika mu minwe ya antu aipe.

¹² Mpiti natenzi ku matwi cele. Lelo Leza wiza wantitila apa nsingo, watandika nu ku mpamola.

¹³ Inceto zyakwe zyafyontomokanga monsi monsi. Ukwaula ukunguvwila uluse, wene watulola imfyo zyane.

¹⁴ Wasuka walasola umwili wane onsi pyu. Wamvungatila sile kwati icita icati ciluluka.

¹⁵ “Nasuka nasuminkanya sile visamu, avino namavimbala. Namaivumvunya sile umu lukungu wakwe cipena.

¹⁶ Nalila mpaka ni cinso cane ciyenzulukila, na manso yane yasuka yavimba, nga na pa manso pafita fititi.

¹⁷ Lelo kwene nemo ntacita ivyaukakasi, ni pepo lyane lyali ilyacumi.

¹⁸ “Iye mwe! We nsi, utezya nanti panono ukuzika uwazi wane. Utalesya ukupapata kwane ukwa kulenga uwazwilizyo kusulwe.

¹⁹ Nga vino kuko ukupela akuno waya, we kambone wane. Akunuli kuko ukwiyulu we kavwangila wane.

²⁰ Yacuza yane yakunsoweka, nga nani nkalilila Leza.

²¹ Owe mwe! Kalanda kasikolo! Aukwi kuno ningalola umwi uwakumvwangila kuli Leza, ndi vino umuntu umwi angavwangila cuza wakwe?

²² Pano kwene ndi nati kandole imyaka ya umi wane, yasyala sile iyakupenda. Nasya ndondele inzila iyakuya kuno yasiwela.