Yoane 17 - Amazwi Yakwe Leza 2013

Yesu wapepela alondezi yakwe

¹ Lino yesu wamala kulanda, alingamila kwiyulu avwanga ati, “Tata, kasita kati kiza. Sokolola lulumbi lwa Mwana wako kuti Mwana wako nawe asokolole lulumbi lwako.

² Pano wemo wamupile maka pa antu onsi, kuti angapeela umi wa pee kuli yonsi yano wamupile.

³ Umi wapee uwakuti antu yamanye wewe, Leza wenga sile uwa cumi, nga nu kumanya Yesu Klistu wino watumile.

⁴ Nati mpela lulumbi kunuli nu mu nsi nati malila milimo ino wampile kuti ncite.

⁵ Tata! Ndakai mpela lulumbi pa manso yako, luno nene nawe twakweti lino insi itali icitwe.

⁶ “Nati ndenga kuti antu yano wampile kufuma mu nsi yakumanye. Yene yali akwako, nga nawe wayampile. Yene yakayela mazwi yako,

⁷ nga ndakai yamanya ukuti vintu vyonsi vino wampile vyafuma kunuli.

⁸ Nayapile mazwi yano wampile, nga nao yayapokelile. Yamanya vino cacumi nemo nafumile kunuli, nu kutaila vino wewe wantumile.

⁹ “Nayapepela, nsyakupepela amu nsi, lelo nkupepela yao yano wampile, pano yene akwako.

¹⁰ Vintu vyonsi ivyakwane vyene ivyakwako nga ni vintu vyonsi ivyakwako vyene ivyakwane. Vyene vikalanga lulumbi lwane.

¹¹ Ndakai nkwiza kunuli. Ntacili mu nsi, lelo yene yacili mu nsi. Tata Wamuzilo! Yasunge kupitila mu maka yako yano wampile, kuti yaye wenga ndi vino wewe nani twaya wenga.

¹² Lino nali nao, nayasunganga ningo kupitila mu maka yako yano wampile. Nayacingililanga, nga kutali wenga uwalowa, suka sile umuntu wino uwasolwilwe kulowa, kuti cino calembwa cifikiliziwe.

¹³ Ndakai nkwiza kunuli. Vintu vii nkuvwanga mu nsi, kuti luzango luno nkweti luzuziwe mu myenzo yao.

¹⁴ Nayapile izwi lyako, nga na antu amu nsi yayapata, pano yasi wa antu amu nsi ndi vino nani kwene nsi wa antu amu nsi ii.

¹⁵ Nsyakupepa kunuli kuti uyafumye mu nsi, lelo nkupepa kunuli kuti uyasunge ningo ku mwipe wilya.

¹⁶ Ndi vino nsi wa antu amu nsi, nao kwene yasi wa antu amu nsi.

¹⁷ Leka icumi ciyacite kuya akwako. Mazwi yako lyonsi acumi.

¹⁸ Ndi vino wantumile mu nsi, avino nani nayatuma.

¹⁹ Pamulandu wao nemo naitula kunuli kuya uwakwako, kuti nao kwene yaitule kunuli yaye akwako mu cumi.

²⁰ “Ntakupepela sile yaa, lelo na yao alantaila pamulandu wa mazwi yao.

²¹ Nkuyapepela kuti yonsi kwene yaye wenga. Tata! Si leka yaye wenga, ndi vino wewe nani twaya wenga. Si leka yaye wenga, kuti antu amu nsi yataile vino wewe wantumile.

²² Nalenzile kuti yapokelele lulumbi, wakwe vino wemo wampile lulumbi, kuti yaye wenga ndi vino wewe nani twaya wenga.

²³ Nemo nao tuye wenga, nga wewe nani tuye wenga, kuti yaye afumaluke muli uwenga. Na kuti antu amu nsi yamanye vino wewe wantumile nga nu kuti wayatemwa ndi vino nani wantemwa.

²⁴ “Tata! Wayampela, nga nani nkasi kuti yaye nani kunondi, kuti yangalola lulumbi lwane luno wampile. Pano wemo wantemilwe lino insi itali icitwe.

²⁵ Tata, wewe mololoke! Antu amu nsi yatakumanyile, lelo nemo nakumanya, nga na yaa yamanya vino wewe wantumile.

²⁶ Nene nalenzile kuti yakumanye, nupya namatwalilila kucita vikwene, kuti kutemwa kuno wakwata panondi kuye panoyali. Na kuti nani ningaya wenga nao.”