Yelemiya 49 - Amazwi Yakwe Leza 2013

Upinguzi wakwe Yawe pa ina Amoni

¹ Apa mulandu na ina Amoni, Yawe wavwanga wati, “Uzye Izlaeli atakwata ana aonsi? Uzye atakwata impyanyi? Icani fwandi cino Mikilomu wapyanyile Gadi? Icani cino antu ya mutundu wakwe ikalile umu misumba iyaya mwenemo?

² Cisuma, lelo kwene insita iliiza lino ndalenga ukuti aikazi ya musumba Laba wa ina Amoni, yaluvwa impoma zya nkondo. Umusumba ulya ulasanguka umutumba wa vitalanganda. Imizi yamwenemo ilapya uku moto. Izlaeli nawe alapokolola ivyuma kuli yano yamupokolwile.” Ivyalanda ne Yawe.

³ “Mwe ina Hesyiboni, losyini! Ai wataononwa! Mwe anaci amu Laba, pundini muipombelekezye ivisamu mu misana. Losyini, mwalukuzeuluka kuu na kuu, mukasi ki liinga. Pasi pano lyene Milikomu akuya umu uzya, kumwi na yasimapepo ni ntunguluzi zyakwe.

⁴ Icani cino ungaitakizya apa manyika yako, ukuitakizya pa manyika yako yao amuzano? Iyee mwe we kaciwe wakantu uwaula utailo, wataila apa vyuma vyako vino wakoozya, uti nu kuti, ‘Aweni angezya ukundwisya?’

⁵ Lola, ndakuletela akasokonda mpanga yonsi. Yalazinga, cila muntu pano alungime. Kutalaya nanti wenga uwakukolonganika imbutusi pamwi. Ivyalanda ne Yawe Wamaka yonsi.

⁶ Lelo ukuya kwene apacisila, indawezezya ana yakwe Amoni isyuko.” Ivyalanda ne Yawe.

Ivilacitikila aina Edomu

⁷ Apa ina Edomu, Yawe Wamaka yonsi wavwanga wati, “Uzye amalango yasililikila umu Temani? Uzye na yampandamano yati yaulila kumwi? Uzye amalango yao yasuka yaola?

⁸ Senukini nupya pukiini, muye mukafisame mu macele, mwe ikazi yaku Dedani. Pano kwene nganiza ukukupempula Esau, ndamuletela sile ilovyo.

⁹ Uzye nga cakuti yakakulula ya matingi iizile kuno muli, yatange yamusile utwa kusotolezya? Nga cakuti aivi yamwizile usiku, uzye yatange yamwiile pano yatemilwe?

¹⁰ Pano nemo ali vino ndasambulula Esau. Nene ndasokolola incende zyakwe zyonsi muno zyafisamila, icakuti akaposiwe na pa kufisamila. Umutundu wakwe, wati ononeka, usipo pali ndakai. Nu mu inipamba musi nanti wenga angasyalamo.

¹¹ Nsilini ana asyale, indaazwa na yamukamfwilwa yako.”

¹² Vii ivyalanda Yawe, wati, “Yano yasi nu kumwa mu lwako, yali nu kumwa lyene. Uzye wemo wati wewe ungasyala kwaula kuvunukwa? Utalatala uleuke ukali foo, nawe kwene suka sile ukaumwe.

¹³ Pasi pano nalapa nemweneco ukuti Bozila alasanguka icitala ng'anda, nupya icintu cimwi icakoofezya, camuzewanya nu lutipu. Nupya imisumba ya mwenemo ilasyalilila amatongwa pee.”

¹⁴ Nga nani navwanzile inti, “Edomu, ala natinuvwa amalamulo ukufuma kuli Yawe, inkombe yatitumwa, ku kunena imitundu yonsi ukuti, ‘Kolonganini mulwisye umutundu uu. Katukini mulwe!’

¹⁵ Lyene, namakucefya pa mitundu yuze, ulasulwa apa antu.

¹⁶ Icoopo cako ni cilumba camu mwenzo wako vyakusomba sile, wemuno ukaikala mu macele akuulwa apapela ya myamba itali. Lelo nanti ungaluka icinsanzo cako apapelapela wakwe lyang'anda'anda, ndakuponyezya pansi.” Ivyalanda ne Yawe.

¹⁷ Edomu alononeka cakuzunguka, na yonsi yano yalapita panoli yalazunguka sile nu kukuwa umuluvi apakulola amasyamo yakwe yonsi.

¹⁸ Yawe wavwanga wati, “Mutalikala umuntu nanti wenga. Mutalaya alacita icifulo munoli, ndi vino cali lino yawisizye Sodoma na Gomola, kumwi ni misumba yamu mbali.”

¹⁹ Ndiza njapumikizye nu kuyazingila kutali, wakwe vino cisama akacita ukufuma mu matesi yakwe Yodani nu kutumbela mu nyika ya mulemvwe. Alino lyene ndiika mwenemo yano ntemilwe nemweneco. Aweni waya wakwe nene? Wino angandolwela aweni? Na kacema wino angimilila pa cinso cane aweni?

²⁰ Caleka mwemo kutikini sile kunondi, muvwe vino nateyanyizizya kucitila Edomu, na vino napangila ukucita aikazi amu Temani. Ala nu twana kwene utwamu ufyo tulakululwa. Ni nyika yao apakulola vivyo, ilazakaza ku ntete.

²¹ Insi ilatenta uku congo ca kuwa kwao, nga ni zwi lya mpooma zyao, liluvwika ukufika na kuli Yemba Muyenzu.

²² Silola! Wiyo wino akuwela nu kulelemba wakwe lyang'anda'anda. Akwanza amapa yakwe pali Bozila. Mu wanda ulya imyenzo ya vita vyamu Edomu ilaya wa mwenzo wa mwanaci ali pakulela.

Ivilacitikila Damasiko

²³ Apa lwa musumba wa Damasiko, Yawe wavwanga wati, “Aikazi amu Hamati na Alipadi, amano yatiyayapeela. Pasi pano yene yatiyuvwa ululumbi ulwipe. Imyenzo yao yafwa cipafi. Yasi yakutekeziwa foo.

²⁴ Damasiko wataiteyanya ukuutuka, akuzakaza sile. Ulanda ni ntazi vyati vila vimuzana. Ali kwati umwanaci wino ali pipi nu kulela.

²⁵ Iye mwe umusumba wa lulumbi, umusumba wa nsansa vino wasyala ivitotela!

²⁶ Alumendo yakwe yalaponela mu miseo yakwe mu wanda ulya. Alino asambazi ya mwenemo nayo yalalowa yonsi pyu. Ivyalanda ne Yawe Wamaka yonsi.

²⁷ Ndakozya umoto mu malinga yakwe Damasiko, nao uloca amasano ya mwene Beni Hadadi.”

Ivilacitikila umutundu wa ina Kedali nu musumba wa Hazoli

²⁸ Apamulandu wakwe Kedali na pali yakateeka ya musumba wa Hazoli, uno yapokolwile kuli Nebukadineza umwene waku Babiloni, Yawe wavwanga wati, “Katukini, mukalwisye Kedali, mulovye na antu aku ufumondaka.

²⁹ Amataalu yao na maufyo yao yonsi visendini. Insalu zyao ni viya vyao vyonsi, ukwikapo ni ngamila zyao visendini ale mukuyapundilila mukuti, ‘Opa, Opa,’ konsi konsi!

³⁰ Vwandamukini, utukini ulwilo mufisame ningo mwe ina Hazoli. Ivyalanda ne Yawe. Pasi pano Nebukadineza watamupangila, watateyanya ni vyakumucitila.

³¹ Katukini mukalwisye umutundu utakwata isakamiko, uno wikala ku matwi cele. Uno utakwata impongolo nanti imikolongelo, wikala sile pwanku onga mpo. Ivyalanda ne Yawe.

³² Ingamila zyao zilaya izyakupokolola. Imfwele zyao zino zitaivulila zilaya izyakusenda. Yano yapela ivinsumpa ndayasansantila mu ntunga zyonsi ziini, ndayaletela isyamo lino lilafuma mu nsi yonsi. Ivyalanda ne Yawe.

³³ Hazoli alasanguka incende yakwe yankusa, ulwanga lwa pee. Mutalatala mwikale umuntu nanti wenga. Kusi nupya nanti wenga wino alakuula mu cifulo cao.”

Ivilacitikila Elamu

³⁴ Izwi lyakwe Yawe lyafikile kasema Yelemiya pamulandu na Elamu. Cali ku kutandika kwa utesi wa mwene Zedekiya waku Yuda.

³⁵ Yawe Wamaka yonsi wavwanga wati, “Lolini ndakontola ulapwa wa ina Elamu, iciombelo cimwi cikulu ca maka yao.

³⁶ Ndaletela Elamu imiza ini, ukufuma ku mpela ziini zya mwiyulu. Ndasalanganyizizya aina Elamu ku miza kwene iyo. Kutalaya umutundu ulasyala ukwaula kuti imbutusi zyutukile kweneko zyaku Elamu.

³⁷ Indoofya aina Elamu pa cinso ca anisi yao, apa cinso cakwe yano yakapangila kuyakoma. Ndayaletela ulanda, icipyu cane cikalipisye. Ndayalondelela nu lupanga, suka sile ince njalovye pyu. Ivyalanda ne Yawe.

³⁸ Indika ni cilimba ca wene wane mu Elamu Na makombe yane mwenemo. Ivyalanda ne Yawe.

³⁹ Lelo ukuya kwene, amanda yaliza lino ndawezezya Elamu isyuko,” Ivyalanda ne Yawe.