Yelemiya 46 - Amazwi Yakwe Leza 2013

Umwene waku Babiloni wacimvya Eguputo.

¹ Yaa ali mazwi yakwe Yawe yano yafikiile Yelemiya apamulandu ni mitundu ya inamasi.

² Apa lwakwe Eguputo, ilamulo ilya pa vita vyakwe Falao Neko, vino vyatantime uku luzi lwa Yufulate umu mbali na Kalikemisyi, lino Nebukadineza, umwene waku Babiloni wacimvizye umu mwaka uwalenga iini, uwakwe Yeoyakimu umwana umonsi wakwe Yosiya, ukuya pa wene wa ina Yuda. Wavwanzile wati,

³ “Teyanyini ivyakuipangasya, ivisyangu ivikulu ni vinono. Aleni pitangini uku kulwa inkondo!

⁴ Nyepini imfwalasi inu ni nsinga! Kwelinipo mwemuno mukapitila pa mfwalasi! Tantamini ale mwati muzwala ivimpompo! Nyolini amasumo, muzwalile ni nsalu zya nkondo!”

⁵ Nupya Yawe anguzya ati, “Uzye ivyani vivi vino nalola? Iye mwe! Yali ni ntete wakwe cimwi. Yaweluluka cundansizi. Ivita vyao vyumwa, yutuka ulwilo, kusi nu wakupepela icisila. Akasokonda konsi konsi.” Ivyalanda ne Yawe.

⁶ “Yano yakwatisya ulwilo yapotwa ukuipususya. Ivipokapoka vyao vyaposiwa ukuipususya. Uku katutu uku Luzi Yufulate, yakupempezyoka, yapona.

⁷ “Aweni wiya uwakatuka ungati a Nailo, ungati inguzi zya manzi akasambela uku vituntu?

⁸ Ala a Eguputo, awino aimilile wakwe Nailo, ungati inguzi zino zikasambela uku vituntu. Ali wino wavwanzile ukuti amakatuka mpaka atuwizye impanga isuke iundwe. Namaonona imisumba ino yakaikalamo.

⁹ Kalaukini mwe mfwalasi, namwe maceleta zingulusini imipeto. Ingilini umu nkondo mwe vita, mwe ina Kusyi na mwe ina Libya, ale musenzile ni visolelo umu minwe. Kumwi namwe kwene mwe ina Lidya mwemuno mwacenjela ukukana malapwa nu kufiika inceto.

¹⁰ “Lelo ilelo uwanda wa Mwene, Yawe Wamaka yonsi. Wanda wi lelo uwanda wa cilanduzi, wakulandula ku anisi yakwe. Lupanga lwakwe lumalya nu kwikuta. Mumakoleka uwazi wao, pano Yawe Wamaka yonsi amatuula impolelwa umu mpanga iyayela ku ntunga yaku kayeya mu pipi nu luzi lwa Yufulate.

¹¹ Pitanga utumbele ku Gileadi, we mukazyana nacansonso mwana Eguputo, ukalonde umulembo. Lelo ukuicuzya sile pakulonda umulembo pano kusi umulembo ungakupozya.

¹² Mitundu yatiyuvwa pa lwakuzewana kwako. Impooma zyakukutezela zyatizilimba impanga. Icita conga cati cipempezyokela ku cuze nga na vyoili kwene vyativiponela pansi.”

Ukwiza kwakwe Nebukadineza

¹³ Lino umwene Nebukadineza wizile ku kuzanza impanga ya Eguputo, Yawe wanenyile kasema Yelemiya ati,

¹⁴ “Umini imbila ku Eguputo, nu ku Migido, mulaizye ku Memfisi nu ku Tapenesi. Muyanene yaiteyanye, pano ulupanga lumakomola monsi monsi luzinguluke.

¹⁵ Uli kuko we Apisi, uzye watupuka? Uzye ivita vyako vyativizyansya? Yati yatenulwa kuli Yawe.

¹⁶ Ivita vyako vikupempezyoka nu kuifuntula pansi. Cila cita cikunena icuze citi, ‘Kalauka! Tuye twapita kumwitu ku antu itu, tupuuke ulupanga lwa anisi itu.’ ”

¹⁷ Temelini Falao umwene waku Eguputo izina lyakuti, “Uwa congo icikulu, wino wapanya insita yakwe ilingine.

¹⁸ Lino nene ndi wa umi, ivyalanda Yawe, wino izina lyakwe a Yawe Wamaka yonsi. Kuliza umwi wiyo akoline na Taboli umwamba uno watalimpisya pa myamba yuze, wiyo akoline nu mwamba wa Kalimeli, uwaya mu nkumba yakwe yemba.

¹⁹ Teyanyini iviya vinu vyakusenda ku uzya, mwe ikazi aku Eguputo, pano Memfisi alasanguka aye wa lwanga, alononeka nupya mutalatala mwikale antu

²⁰ “Eguputo ali wa kana ka ng'ombe, akandama akayembe. Lelo icizyembele caku kayeya camwizila.

²¹ Asilika ivipondo yano yali nayo, yakoline wa ana ya ng'ombe aine. Yonsi pamwi yaseleuka nu ku lupuuka. Yaposiwa kuzyansya pano uwanda wa kuzanzwa wati uyazana, insita yao yakuvunukwa.

²² Izwi lyakwe Eguputo liluvwika wa kufwina kwa nzoka ino ikuutuka, pamulandu wakuti anisi yakwe yakwiza na maka, yakwiza ni zyampasa, ungati antu yano yizile sinda imiti.

²³ Yakutema umutengo wakwe, Ivyalanda Yawe. Utange uyapende foo. Yene avule, yalusile na makanta ku wingi. Ala imintapendwa.

²⁴ Umukazyana umwana wakwe Eguputo insonyi zilamulema. Wene alapeelwa mu makasa ya mutundu wa kukayeya.”

²⁵ Yawe Wamaka yonsi, Leza wa ina Izlaeli, wavwanga wati, “Indi pipi nu kuleta uvunuko pali Amoni, Leza wakwe Teebesi. Ndavunuka na Falao kwene na Eguputo kumwi na tuleza twakwe na yamwene yakwe, nga na yayo yano yasintilila muli Falao.

²⁶ Nemo ndayapeela mu makasa yakwe yayo akalonda kuyakoma, kuli kuti mu makasa yakwe Nebukadineza umwene waku Babiloni nu mu makasa ya aomvi yakwe. Lelo apacisila antu yalaikala nupya mu Eguputo, ndi vino cali mu manda yampiti. Ivyalanda ne Yawe.”

²⁷ Lelo wemo we muomvi wane Yakobo, utoopa, utazakaza, we Izlaeli. Pano apanondi namakupususya uku mpanga zya kutali, alino napakufumya ana yako mu mpanga ya uzya wao. Yakobo alikala umu mutende nga kutalaya uwakumucuzya nupya.

²⁸ Yawe walanda wati, “Utoopa we muomvi wane Yakobo, pano nemo ndi nawe. Ndalovya imitundu yonsi ya antu amu nko zino namusalanganyizizyeko. Lelo wemo ntalakulovya. Ndakusunda sile ukulingana ni nsambu. Ntalakutapo sile, lelo ndakukalipila.”