Yelemiya 42 - Amazwi Yakwe Leza 2013

Antu yuzya Yelemiya uku yapapatilako kuli Yawe

¹ Alino akalamba ya vita yonsi na Yoanani, umwana umonsi wakwe Kaleya, Azaliya, umwana umonsi wakwe Hosyaya na antu yonsi, ance na aikolo yiza kuli kasema Yelemiya.

² Yamunena yati, “Twapapata, uvwa vino tukulenga. Utupapatileko kuli Yawe Leza wako. Swe antu twali nyanya, lyene tusile sile incepelwa, ndivino nawe kwene ungailolela we mweneco.

³ Tulengeleko uleke Yawe Leza wako atunene kuno tungaya na vino tungacita.”

⁴ Yelemiya aasuka ati, “Namuvwa sana, namamulengela kuli Yawe ndi muno mwati muuzizya kwene. Indi nu kumunena vyonsi vino Yawe amalanda, nupya ntalamufisa nanti kamwi,”

⁵ Lyene iyanena Yelemiya iyati, “Yawe angala aye akambone uwacumi, uwakutusinila, ndi cakuti twakana ukucita ukulingana nizwi lyonsi lino Yawe Leza wako amatutumila ukupitila umu kanwa kako.

⁶ Ndi cakuti icakutuzipila nanti foo, tuluvwa izwi lyakwe Yawe Leza witu, wino twakutuma kweneko. Icakuti, apakuyela izwi lyakwe Yawe Leza witu tuce tukalole isyuko.”

Uwasuko wakwe Yawe, uku kupapata kwakwe Yelemiya

⁷ Walanga amanda ikumi yapita, izwi lyakwe Yawe lyafikile kasema Yelemiya.

⁸ Nawe ali pakulaizya Yoanani umwana wakwe Kaleya na akalamba ya vita yonsi, yano yali na antu yonsi aikolo na ance,

⁹ nu kuyavwanga kunoyali ati, “Yawe, Leza wa ina Izlaeli wino mwantumile kweneko uku kuyamunena vino mwalenzile walanda wati,

¹⁰ ‘Ndi cakuti mukasi ukwikala umutende umu mpanga ino, ndamukuula ntalamuongolola pansi. Ndamulema ntalamwipa foo, pasi pano nimutezela apa uyi uno namucitile.

¹¹ Mutaoopa nupya umwene waku Babiloni wino mukaoopa. Mutamoopa foo. Ivyalanda Yawe. Pano nemo indi namwe apakumupususya nu kumutuula mu makasa yakwe.

¹² Ndamuyelela uluse pakuti namwe ace amuyelele uluse nu kumuzumilizya ukuswilila ku mwinu.’

¹³ “Lelo ndi cakuti mwati musikulonda kwikala mu mpanga ii, mwakana nu kuyela amazwi yakwe Yawe Leza winu,

¹⁴ ale mukuti, ‘Tukulonda ukuya ku mpanga ya Eguputo kuno tutalalola inkondo, nanti ukuvwa ukulila kwa ntandala, nanti ukuulilwa icakulya, imuti akuno mukulonda ukwikala,’

¹⁵ fwandi lyene muvwe uku mazwi yakwe Yawe, mwemuno mwasyalako mu mutundu wakwe Yuda. Yawe Wamaka yonsi, Leza wa ina Izlaeli, wavwanga wati, ‘Ndi mwalozya sile amanso inu ku Eguputo, mwala mwingilamo nu kwikala mwikala mwenemo,

¹⁶ ale lyene ulupanga luno mukaoopa lulamuponela mumu kwene mu mpanga ya Eguputo. Ni cipowe kwene cino mukautuka cilamuponela mumu kwene mu Eguputo, ali muno mulafwila.

¹⁷ Antu yonsi yano yapanzile ukuya ku Eguputo ku kwikala, yalafwila kuku kwene ku lupanga, ku cipowe nu ku mpungo. Kutalasyala nanti wenga uwa mulembo pamulandu na masyamo yano ndayaletela.

¹⁸ “Yawe Wamaka yonsi, Leza wa ina Izlaeli wavwanga wati, ‘Vino ukali wane ni cipyu cane vyaponile akaya aku Yelusalemu, ali vino cipyu cane cilamuponela ndi mwaya ku Eguputo. Mulaya antu yamwi atipwe na asulwe. Mutalatala musyukile incende ii nupya.’ ”

¹⁹ Yelemiya nawe ali pakwasuka ati, “Mwe! Mwemuno mwasyalako mu ina Yuda Yawe wamunena wati, ‘Mutezya muyeko ku Eguputo! Mucimanye ukuti ni musoka mu wanda wilelo.

²⁰ Namunena nati ndi cakuti mwala mwaluvyanya, ale mwailetelela, mwasumba sile umi winu. Alino nukuya, amwemwe mwantumile kuli Yawe Leza winu kuti inje mupapatile kunoli nu kuti ince munene na consi cino alavwanga, nga nu kuti muce mucicite.

²¹ Fwandi ali cino nimunena mu wanda wilelo. Lelo mwemo mwatimukana ukuvwa amazwi yakwe Yawe Leza winu. Mutazumile umulandu nanti onga uno ntumilwe ukwiza munena.

²² Fwandi mucimanye ukuti mulafwa ku lupanga, ku cipowe nu ku mpungo mu ncende ino mukulonda ukuya mu kwikalamo.’ ”