Yelemiya 39 - Amazwi Yakwe Leza 2013

Ukuwa kwa musumba wa Yelusalemu

¹ Mu mwaka walenga fundimbali mu mwezi walenga ikumi wa kuteeka kwakwe Zedekiya mu Yuda, Nebukadineza umwene waku Babiloni wizile ni vita vyakwe vyonsi ku kwiza lwisya umusumba wa Yelusalemu

² Mu mwaka walenga ikumi na onga, uwa kuteeka kwakwe Zedekiya, mu mwezi wakwe cini, apa wanda walenga fundimbali, ilinga lyamokolwa.

³ Awe lyene amakombe yonsi amwene waku Babiloni yingile nu kuya ikala pa Mpongolo Yapakasi. Amakombe yalya yali a Neligali Syalezeli waku Samugali, Nebo Selisekimu musika mukulu wa vita, na Neligali Syalezeli intunguluzi ikalamba pamwi ni ntunguluzi zyuze zyonsi zya mwene waku Babiloni.

⁴ Zedekiya umwene waku Yuda pamwi ni vita vyakwe apakulola vyonsi vivyo yalutonkola, yapuuka nu kufuma mu musumba usiku. Yapita umu nzila ino yapita mu calo ca mwene nu mu mpongolo ya pakasi ka malinga yaili nga yalungama ku Alaba.

⁵ Lelo ivita vya ina Babiloni viyazinganya, ivizana Zedekiya mu manyika aku Yeliko. Alino vimulema nu kumutwala ku Libula mu mpanga ya Hamati kuli Nebukadineza, umwene waku Babiloni, nga nawe amupingwila umulandu.

⁶ Kuku kwene ku Libula umwene waku Babiloni akoma ana aonsi yakwe Zedekiya apa manso yakwe Zedekiya kwene nga akoma na asambazi yonsi amu Yuda.

⁷ Lyene aleka yatonkola Zedekiya amanso nga yamunyepa mu minyololo ya mukuwa nu kumusenda ku Babiloni.

⁸ Aina Babiloni yoca isano lya mwene kumwi na mang'anda ya antu, nga yawisya na malinga ya musumba wa Yelusalemu.

⁹ Alino Nebuzaladani umukalamba wakwe yakalinda ya mwene asenda antu ku uzya ku Babiloni, yayo asile mu musumba, kumwi na yayo aile kunoli, nga na antu asyala.

¹⁰ Nebuzaladani umukalamba wakwe yakalinda ya mwene wasile umu mpanga ya Yuda antu yamwi apina, yayo atakweti nanti kamwi. Wene wayapile ivyalo vya matingi ni vyalo navyuze.

¹¹ Nebukadineza umwene waku Babiloni walanga wapeela amalamulo yaa kuli Nebuzaladani, umukalamba wakwe yakalinda ya mwene, akumile Yelemiya, ati,

¹² “Umusende nu kumuwaka. Utamucuzya, lelo umucitile icili consi ndi muno akulondela.”

¹³ Acino Nebuzaladani, umukalamba wakwe yakalinda ya mwene, akatuka pamwi na Nebusyazibani musika mukulu, na Neligali Syalezeli cilolo mukalamba nga na yamusika yonsi a mwene waku Babiloni.

¹⁴ Yene yatuma akuyasenda Yelemiya mu musolo wakwe yakalinda. Yamutwala kuli Gedaliya, umwana umonsi wakwe Aiikamu, umwana umonsi wakwe Syafani, kuti amuswilizye ku ng'anda ukwakwe. Caleka Yelemiya watenzi kuku na antu yakwe.

Ebedimeleki wapolelelwa

¹⁵ Lino Yelemiya acili akusungwa mu musolo wakwe yakalinda, Yawe wavwanzile kunoli ati,

¹⁶ “Yanga ukanene Ebedimeleki umwina Kusyi wilya uti Yawe Wamaka yonsi, Leza wa ina Izlaeli akuti, ‘Nasya mfikilizye vino navwanzile ivikumile musumba uu, nga ivintu vivyo iviipe, kusi ulongo awe. Apa nsita ilya ivintu vivyo vilafikiliziwa apa manso yako.

¹⁷ Lelo wemo ndakupususya mu wanda ulya, nupya utalapeelwa mu makasa ya antu yano ukaoopa.

¹⁸ Endi, wemo ndakupususya, nga utalakomwa ku lupanga. Lelo ulapususya umi wako pano wantaila, Ivyalanda ne Yawe.’ ”