Yelemiya 38 - Amazwi Yakwe Leza 2013

Yasumba Yelemiya umucifula

¹ Alino Syefatiya umwana umonsi wakwe Matani, Gedaliya umwana umonsi wakwe Pasyuli, Yukali umwana umonsi wakwe Mali, yuvwa amazwi yano Yelemiya wanenanga antu ati,

² “Yawe wavwanga ukuti, wiyo wensi uwala wasyala umu musumba uu, alafwa uku nkondo, uku cipowe, nu ku mpungo. Lelo wiyo wino wafuma mwenemo nu kuya uku lusansa lwa ina Babiloni, alapususya umi wakwe. Alapuuka nu umi wakwe, nu kwikala uwa umi.”

³ Yawe wati, “Umusumba uu ulapelwa mu makasa ya vita vya ina Babiloni, vivyo ivilaupoka.”

⁴ Lyene amakombe yaya yanena umwene yati, “Umuntu wii, alinzile ukufwa. Pano kwene kuvwanga kwakwe kwatikunenula ivita ivisiile mu musumba uu, pamwi na antu yonsi. Umuntu wii itonsya! Kulanda kwakwe kusi kwakuzipila umutundu uu, suka sile ivyakuusyamika.”

⁵ Umwene Zedekiya nawe ati, “Awiyo, ali mu makasa inu. Ne mwene ntakweti nanti cimwi cakumulesya.”

⁶ Acino nayo ali vino yasenzile Yelemiya, yaya yamusumbila mu cifula cakwe Malikiya, umwana wa mwene. Icifula cayelile mu musolo wakwe yakalinda. Ali muno yamutelemwila ku mwando. Lelo icifula cico mutalimo amanzi. Mwali sile amatipa. Yelemiya ali pakutika mu matipa.

⁷ Lelo Ebedimeleki, umwina Kusyi, uwaombelanga kwi sano auvwa ukuti Yelemiya yatiyamusumbila mu cifula. Fwandi lino umwene watenzi apa mpongolo yakwe Benjamini,

⁸ Ebedimeleki afuma mwi sano, anena nu mwene ati,

⁹ “Musambazi, we mwene wane, antu yaa yatiyaifya wakwe cimwi kuli kasema Yelemiya, apa kumusumbila mu cifula, kuti amuno ace akafwile ku nzala.”

¹⁰ Lyene umwene nawe apeela ilamulo kuli Ebedimeleki umwina Kusyi, ati, “Senda aonsi yatatu, upite nayo kuti yakafumye Yelemiya mu cifula lino atacili afwe.”

¹¹ Caleka Ebedimeleki nawe ali pakusenda aonsi yayo ukwisano. Aingila mu muputule wakusungila mwenemo vyakuzwala. Alino asolola mwenemo ivisamu vyampiti, aviponyezya Yelemiya ku mwando mu cifula.

¹² Alino Ebedimeleki umwina Kusyi anena Yelemiya ati, “Kwapila insalu zizyo mu nkwapa zyako umwisika umu mapitanga umwando.” Yelemiya nawe acita vivyo kwene.

¹³ Alino yatinta Yelemiya ku mwando nu kumufumizya ukunzi, yamuzuulula mu cifula. Yelemiya atala asyala mumu kwene mu musolo wakwe yakalinda.

Yelemiya wapanda umwene Zedekiya amano

¹⁴ Alino lyene umwene Zedekiya atuma akuya aama Yelemiya kuti aize alolekele kunoyali, ku mpongolo yalenga zitatu, ya Ng'anda ikulu yakwe Leza. Alino umwene auzya Yelemiya ati, “Nkukuuzya icintu cimwi, utezya umfise icintu cili consi.”

¹⁵ Yelemiya nawe anena Zedekiya ati, “Ndi cakuti nakunena icumi, uzye utamankoma? Nupya ndi cakuti nakupanda amano, wemo usikunguvwa foo.”

¹⁶ Lelo umwene Zedekiya alapa mu umfisolo kuli Yelemiya ati, “Cumi cumi Leza andye, intakukukoma foo. Ntalakusumba mu makasa ya antu yaa yano yakulonda kukukoma.”

¹⁷ Alino Yelemiya anena Zedekiya ati, “Yawe, Leza Wamaka yonsi, Leza wa ina Izlaeli, wavwanga wati, ‘Ndi cakuti wala wafuma, waya wacimbila ivita vya ina Babiloni, lyene ale wemo ulapusuka nu kupususya umi wako. Nu musumba uo lyene utalapya ku moto. Wewe kwene nu luko lwako mulasyala nu umi.

¹⁸ Lelo ndi cakuti utafumile nu kuyacimbila ivita vya mwene waku Babiloni, ale lyene umusumba uu umapeelwa mu makasa ya ina Babiloni. Yene yamaoca nga nawe kwene utalapusuka uku makasa yao.’”

¹⁹ Umwene Zedekiya nawe ali pakunena Yelemiya ati, “Nkoopa aina Yuda yano yaikumika ku lusansa lwa ina Babiloni. Pano ungazana ukuti napelwa mu makasa yao, yancuzya.”

²⁰ Yelemiya wamwasuka wati, “Utalapeelwa mu makasa yao foo. Wemo ule uvwe sile izwi lyakwe Yawe ndi muno namakunenela, apakuti cikuzipile, upususye umi wako.

²¹ Ndi cakuti wemo wakana ukutontelela, vii ali vino Yawe watansokolwela ukuti,

²² anaci yonsi pyu yano yasile mu musumba wa mwene waku Yuda, yamayatwala ku yaomvi ya mwene waku Babiloni, ale yakwimba yakuti, ‘Yatiyakusomba, iyakucenjezya, yacuza yako yano wataila, yatiyakupuuka, pano ingazo zyako izitika mu matipa.’

²³ “Anaci yonsi, na ana yako yonsi yalasendwa ku ina Babiloni. Nawe kwene utalapusuka ku makasa yao. Yalakulema yakusende ku uzya ku mwene waku Babiloni. Yaloca nu musumba uu ku moto.”

²⁴ Lyene Zedekiya ali pakunena Yelemiya ati, “Utaleka umuntu nanti wenga amanye amazwi yaa, pano limwi ungafwa.

²⁵ Ndi cakuti inkombe zyane zyamanya ukuti twatitulanda nawe amazwi yaa, nanti ndi yakunena yati, ‘Tunene vino wali walanda ku mwene, utatufisa nanti cimwi, pakuti tutakumona,’

²⁶ wemo ulinzile wayanena sile uti nali napapata ku mwene ukuti yatanswilizya ku ng'anda yakwe Yonatani pakuti ntakafwilemo.”

²⁷ Nu mucumi amakombe yonsi yizile kuli Yelemiya uku kumuzya. Nawe ayaasuka vivi kwene vino umwene wamupile ilamulo kuti ayanene. Acino kusi cuze cino yavwanzile kunoli nupya, pano kusi nanti wenga uwatazile auvwa kuno wene yalanzyanyizye nu mwene.

²⁸ Na Yelemiya wikalanga mu musolo wakwe yakalinda mpaka nu wanda uno yaposile Yelusalemu.