Yelemiya 34 - Amazwi Yakwe Leza 2013

Ivilazanzwa Zedekiya

¹ Lino Nebukadineza, umwene waku Babiloni, ni vita vyakwe vyonsi pamwi nu wene wakwe onsi uno watekanga pano nsi, walwisyanga umusumba wa Yelusalemu ni misumba yakweo yamu mbali, izwi lyakwe Yawe lyafikile Yelemiya iliti,

² “Yawe Leza wa ina Izlaeli wavwanga wati! Pitanga ukanene Zedekiya umwene wa ina Yuda ukuti Yawe wavwanga ukuti wasya apeele umusumba uu umu makasa ya mwene waku Babiloni, wiyo wino alawooca mpaka uce ulokotele na pansi.

³ Mutalapuka foo, Mulalemwa nu kupelwa umu makasa yakwe. Mulasimpana amanso ntontonto nu kulandana nawe alino muce musendwe nu ku Babiloni.

⁴ Lelo kwene ungala utezye amazwi yano ne Yawe nkukunena, we Zedekiya mwene waku Yuda. Wemo utalakomwa umu ulwi foo.

⁵ Lelo ulafwa umu mutende nu longo. Vino yociile ivikolwe vyako ubani, yamwene yampiti yano yakukolelile, ali vino yalocela nawe kwene, nu kukulosya yati, ‘Iye mwe kalanda kasikolo Umwene witu mwe!’ Vivyo avino nemweneco nalaya, Ivyalanda ne Yawe.”

⁶ Alino lyene Yelemiya aya alanda vyonsi vivyo kuli Zedekiya, umwene waku Yuda umu Yelusalemu.

⁷ Lilyo ala ivita vyaku Babiloni vikulwisya Yelusalemu ni misumba yuze yamalinga, imisumba sile iyamalinga iyasile umu Yuda a Lakisyi na Azeka.

Yafyengelekezya azya yano yakulwilwe

⁸ Izwi lyakwe Yawe lyafikile Yelemiya apacisila ca upangano uno umwene Zedekiya yapangine na antu yonsi aikazi amu Yelusalemu, uwakupeela untungwa uku azya yao.

⁹ Umuntu ali wensi wali nu kupeela untugwa uku muzya wakwe Muyebulai, ciye umwanaci nanti umonsi apakuti aipitila. Kutaya nanti wenga uwakuteeka Umuyuda muze uzya.

¹⁰ Asambazi yonsi na antu yano yazumilizye upangano, yuvwile ningo sana ukuti wensi alinzile ukuta umuzya wakwe, umwanaci nanti umonsi apakuti aipitila ataya umuzya uwakuteekwa nupya foo.

¹¹ Lelo apacisila yasenula amano yao, yawezya azya, aonsi na anaci kwene yano yapile untungwa wa maipitile, nupya yayateeka uzya.

¹² Nga alino nupya izwi lyakwe Yawe lyafikila Yelemiya lyamunena lyati,

¹³ “Ne Yawe Leza wa ina Izlaeli, lino nafumizye ivikolwe vinu mu mpanga ya Eguputo, napangine nayo upangano wakuti,

¹⁴ Cila myaka cinimbali ndi yapita, cila wenga ali nu kulekelamo umuzya wino wiza waikazya kuno muli, apakuti nawe aikalile wenga. Ukuya kwene alinzile waya umuzya apa myaka mutanda kuno muli. Nga alinzile walekwamo apakuya umuntungwa. Lelo ivikolwe vinu vitanguvwile foo, nanti panono.

¹⁵ Mwemo umwilelo mwaiyelako, mwacita icilungame apa manso yane, apa kuuma imbila, iyakuti cila muntu alinzile wapeela umuze untungwa. Mwapangana nu upangano apa manso yane umu ng'anda ikulu iyakumpepelamo, ikaamilwa umwi zina lyane.

¹⁶ Nupya mwasenuka, mwasuula ni zina lyane, apakuwezya cila muntu umuzya wakwe, umwanaci nu monsi yano mwatazile mwapeela untungwa nu kuleka yaikalile. Mwayapatikizya ukuya azya nupya.”

¹⁷ Caleka lyene Yawe wavwanga wati, “Mwatimukana ukunguvwa, mwakana nu kupeela untungwa cila muntu uku anyonko nu ku auzo. Icisuma fwandi, nemo namamusunkilizya umu nkondo, uku mpungo nu ku cipowe. Namamuletela na kasokonda uku wene uli onsi uwa pano nsi.

¹⁸ Antu yano yatiyonona upangano wane, yano yatiyasuula amasunde aupangano uno yacisile apa manso yane, ndayacita wa kang'ombe kano yatiyalepula pakasi, alino kupita pakasi kaviputulwa vyakako.

¹⁹ Asambazi amu Yuda na amu Yelusalemu, yamutungwi ya kwisano yasimapepo na antu yonsi amu mpaga yano yapisile apakasi ka viputulwa vya kang'ombe kaputulwe apakasi,

²⁰ ndayapeela umu makasa ya anisi yao nu mu makasa yakwe yano yakayapangila ukuyakoma.

²¹ Zedekiya nawe, umwene waku Yuda na asambazi yakwe, ndayapeela umu makasa ya anisi yao nu mu makasa yakwe yao yano yakalonda uku yakoma, uku vita vya mwene waku Babiloni, vino vyativimutaluka.”

²² Yawe wavwanga wati, “Namapeela ilamulo lya kuyawezezya uku musumba uu, yaulwisye yaupoke nu kuoca. Namasangula ni misumba yakwe Yuda ukuya ulwanga, umutange mwikale umulawa.”