Yelemiya 30 - Amazwi Yakwe Leza 2013

Izlaeli alakululwa

¹ Nga alino nalyuze izwi lyakwe Yawe lyafikile Yelemiya.

² Yawe, Leza wa ina Izlaeli wavwanga wati, “Lemba amazwi yonsi yano nkunenyile umu lupapulo.

³ Insita iliiza lino ndaswilizizya antu yane, aina Izlaeli na ina Yuda isyuko lyao ilyampiti. Alino ndalenga nu kuti yakawelulukile uku kukwata impanga ino napiile ivikolwe vyao” Ivyalanda ne Yawe.

⁴ Amazwi yano Yawe wavwanzile apamulandu wa ina Izlaeli na ina Yuda, aeya akuti,

⁵ “Natinuvwa inkuuta zinu zya ntete izikalamba, izya koopa apakalamba, zisi zya longo foo.

⁶ Tala tekelini, muzyeko! Uzye umonsi angavyala umwana? Uzye pacani fwandi nkulola kuno umonsi ali wensi watalema mu musana wa mwanaci wino ali pipi nu kulela? Uzye pacani cino amausyu yao yatiyasenukila vii nu kuswepuluka?

⁷ Iye mwe vino uwanda uu wakulisya! Kusi uwanda nauze uno wakolana na uu. Insita imwi iya ulanda kuli Yakobo, lelo wene alakululwa.

⁸ “Mu wanda ulya, ali vino ne Yawe Wamaka yonsi navwanga, ndakontola ikoli apa nsingo zyao, ndatankola ni minyololo yao, yatalatala nupya yaye azya ku enyi.

⁹ Yalatumikila sile Yawe Leza wao nu mwene wao Davidi wino ndayapeela.

¹⁰ “Utaaopa fwandi we muomvi wane Yakobo. Utazakaza we Izlaeli. Ivyalanda ne Yawe. Pano nemo ndakukulula mu mpanga ntali na ana yako mu mpanga ya uzya wao. Yakobo alasyukila nupya ulongo nu mutende, kutalaya nu wakumucuzya.

¹¹ Pano indi nawe apakukupususya. Ndalovya imitundu yonsi muno nakusalanganyizizye. Lelo wemo ntalakulovya foo, ndakukalipila sile kulingana ni nsambu pano limwi ungasyala vivyo kwene ukwaula ku kukalipila.”

¹² Yawe wavwanga wati, “Icilonda cako icamuntapola. Ivyumo vyako vitangapola.

¹³ Kusi nanti wenga uwakusakamala indwala yako, kusi nu mulembo uno ungakuwezezya umutende.

¹⁴ Yacuza yako yonsi yakwilila, kusi nu wakusakamala foo. Pano nakuumile amatukizyanda. Nakukalipile cipyu cipyu apamulandu wakuti uyi wako wakulisye na maifyo yako nayo yavulisye.

¹⁵ “Pacani fwandi cino ukuilizyanyizizya pa cilonda cako? Ukucula kwako kutalasila. Nakucitila vyonsi vii pano uyi wako wakulisya na maifyo yako yakulisya.

¹⁶ Lelo ukuya kwene yayo yano yakukumalila, alio kwene yalasila, na anisi yako yonsi yalasendwa ku uzya. Yano yivile ivyuma nayo yalayiyila ivyuma vyao, na yano yakusamfile nayo yalasampwa.

¹⁷ Pano yene yakakwama ‘umusumbwe ni cisampwa cao’ cino yatasakamala awe. Lelo ndakuwezezya umutende wako ni vilonda vyako vilapola.” Ivyalanda Yawe.

¹⁸ Yawe wavwanga wati, “Lola, ndawezya antu yane ku mpanga yao nu kukwatila cila ng'anda uluse. Yelusalemu alakuulwa cipya cipya, ni sano li linga lilakuulwa nupya cipya cipya.

¹⁹ Ali muno mulaafuma inyimbo zyakulumbanya nu kupunda kwa nsansa. Ndayavuzya yatalatala yacepe foo. Ndayacindamika yatalasulwa foo.

²⁰ Ana yao yalaya vino yali apa mpiti. Iuvi lyao lilasimpwa pa cinso cane. Ndavunuka yayo yonsi akayafyenga.

²¹ Intunguluzi yao ilaya iya mutundu wao. Uwa kuyateeka alafuma pakasi kao. Ndaleka ukuti aize kunondi nu kumpalamila, pano kutanga kuye angaitemelwa ukumpalamila.” Ivyalanda Yawe.

²² Alino mwemo mulaya umutundu wane nga nani ndaya Leza winu.

²³ Mutale mulole cipunga cakwe Yawe caticikatuka. Nkungulupya watakatuka, waponela pa mitwe ya antu aipe.

²⁴ Icipyu cakwe Yawe icikali citalatala cizuke foo, suka sile ace atale afikilizye amapange yamu mwenzo wakwe. Antu yakwe yaluvwa muno ciile mu manda aliza ku nkolelo.