Yelemiya 24 - Amazwi Yakwe Leza 2013

Imise iili ya masamvu

¹ Yawe wandanzile imise iili ya masamvu ino yatesilwe apa nkolelo ya Ng'anda ikulu yakwe Leza. Cali apacisila ca nsita ino Nebukadineza umwene waku Babiloni wasenzile Yeoyakini, umwana wakwe Yeoyakimu umwene waku Yuda, uku uzya, ukumufumya mu Yelusalemu nu kumutwala uku Babiloni pamwi na yacilolo yakwe na yafundi kwene.

² Umuse onga wali na masamvu asuma sana, ungati ayano yatandikile penepo ukuca. Umuse uze nao wali na masamvu aipisye sana, atange yalikwe.

³ Lyene Yawe avwanga kunondi ati, “We Yelemiya, uzye walola cani?” Nani imwaasuka inti, “Nalola amasamvu. Yamwi asuma sana, nga na yamwi aipisye sana atange yalikwe.”

⁴ Acino Yawe avwanga kunondi ati,

⁵ “Yawe Leza wa ina Izlaeli wavwanga wati, ‘Ndasakamala antu yakwe Yuda ndi vino nasakamala amasamvu, antu yano yasendwa mu uzya, yano nafumizye mu ncende ino apakuyatuma umu mpanga ya Babiloni.

⁶ Ndasumba amanso yane pano yali apakuyacitila ivisuma. Ndayaswilizya kuno yafuma. Ndayakuula, ntalayaongolola, awe. Ndayalema, ntalayatukula, awe.

⁷ Ndayapeela umwenzo wakumanya ukuti nene indi Yawe. Yene yalaya antu yane, nga nani ndaya Leza wao, pano yalaweluluka kunondi ni myenzo yao yonsi.’”

⁸ Yawe walanda wati, “Zedekiya umwene waku Yuda, yacilolo yakwe ni nsyazi zyamu Yelusalemu na antu yano yaya yikala mu Eguputo, nene ne Yawe ndayacita wa masamvu aipe cakuti kusi angayalya.

⁹ Ndayalenga ukuya na kasokonda uku wene uli onsi uwa panonsi. Yene yalaya izewanya lya antu nu musowe, inseko nu lutipu umu ncende zyonsi muno ndayazingila mwenemo.

¹⁰ Nupya ndayatumila ulupanga ni cipowe nga ni mpungo, mpaka yace yalowe umu mpanga ino nayapile aeneco ni vikolwe vyao.”