Yelemiya 17 - Amazwi Yakwe Leza 2013

Iifyo nu kuvunukwa kwa Antu amu Yuda

¹ Yawe Leza akuti, “Mwe antu amu Yuda, ala iifyo linu lyalembwa ku cilembelo ca cela. Lyene lyakololwa ku nsongo yi we lyakwe daimondi apa myenzo inu na pa mpembe zya tuvuwa twinu.

² Antu inu yakapepa pa tuvuwa na pa maunkolanya yano yakuulila kaleza kanaci ka Asyela, umwisika lyakwe cila cimuti icilembe, apa twamba papela,

³ alino na papela ya mwamba usanzuke. Ivyuma vyako vyonsi vino mwatuulika ndaleka visampwe. Vilaya wa malipo apa maifyo inu muno mpanga yonsi.

⁴ Mulafumbatula iminwe ku vyaupyanyi vino namupiile. Ndamucita azya ku anisi inu umu mpanga ino mutamanyile, pamulandu wa cipyu cane cino cikoline wa moto umuntazima.”

Imvwango zipusanepusane

⁵ Nupya Yawe Leza avwanga ati, “Watipwa wiyo wensi uwataila mu muntu muze, pano wene wemelela ku mwinakufwa, wino umwenzo wakwe wafutatila Yawe Leza.

⁶ Wene wakolana sile ni cipupa camu lwanga, atangalola ulongo lino lukwiza. Wene alikala umu ncende iyumalale, umu ncende ya cicelecele isiikalwamo. Kusi nanti cimwi cisuma icikatala cimucitikila.

⁷ “Lelo walongo awiyo uwataila mu Mwene Leza, wino Yawe waya utailo wakwe.

⁸ Wene waya wa muti uno walemwa ukuli amanzi uukasakata imisisi ukuli amanzi. Wene usiopa icipuki ndi ciza, pamulandu wakuti amafwa yakweo yakaya sile lyonsi alembe. Umu mwaka wa cilala wene usisakamala foo, nupya usita ukuseeka.”

⁹ “Uzye aweni angatezya vyamu mwenzo wa muntu? Mwene mwazula ucenjezi uwa misango yonsi, nupya uwipe wakwe cimwi.

¹⁰ Nene ne Yawe nkaceceta umwenzo wakwe cila muntu, nu kwezya amano yakwe. Nkapeela na cila wenga ukulingana ni micitile yakwe, ukulingana ni milimo yakwe ino akacita.”

¹¹ Umuntu wino akalonka icuma mu ucenjezi wakolana ni nkwale ikaulola amayayi yano itatiile. Pakasi na nkasi ka umi wakwe ali nu kuponzya vyuma vyakwe, na pakusyalikizya pasi vino alaya, lelo alasyala iciwila.

¹² Ing'anda itu ikulu yakwe Leza ikoline ni cilimba ca wene calulumbi, isanzulwe ukufuma sile nu ku katalili.

¹³ Mwene, wewe uli upalilo wa ina Izlaeli. Yonsi yano yakutazyela yalazewana, na yano yakusangukila yalatenulwa muno nsi, pamulandu wakuti yatayela Yawe intulo ya manzi ya umi.

Yelemiya walenga Yawe kuti amwazwilizye

¹⁴ Sungala ungazwe Mwene, uleke mpole, untuule uleke nkululwe, pano awewe we muno nkalumbanya.

¹⁵ Antu yakanena yati, “Ale izwi lya Mwene lili kwi? Kalifikiliziwe tuvwe!”

¹⁶ Lelo kwene asi nene nakupamvizye kuti ulete uononesi pano yali. Nupya asi nene nakumvilwe ukuyaletela uwanda wa ntazi. Wemo umanyile cii. Umanyile cino nalanda.

¹⁷ Utezya uye icoopo kunondi, pano nemo nkazina munuli pa wanda wa kuzanzwa.

¹⁸ Yano yakancuzya kayazewane, lelo utaleka kuti nemo nzewane. Si leka ingofyo ziyaponele, lelo nemo utangofya. Uyaletele uononesi nu kuyavungola.

Vyakucindika Isabata

¹⁹ Yawe avwanga kunondi ati, “We Yelemiya yanga ukimilile apa mpongolo ilya ino yakaama ukuti Impongolo ya Antu, ino yamwene amu Yuda yakapitilapo apa kwingila na pakufuma mu musumba. Alino nupya uye na pa mpongolo zyuze zyonsi zyamu Yelusalemu.

²⁰ Uye ukanene yamwene na antu yonsi amuno mpanga ya Yuda, nayauze yonsi akaikala mu Yelusalemu, yano yakapitila pa mpongolo zyuze zizi apa kuuvwa vino nemo nkuyanena.

²¹ Uyanene ukuti ndi cakuti yakulonda ukwikala ningo, yatalinzile ukusenda iciviya cimwi icinyome apa wanda wi Sabata. Yatalinzile ukupisya icinyome apa mpongolo zya musumba wa Yelusalemu.

²² Nanti ukufumya iciviya cinyome mu mang'anda yao apa wanda wi Sabata. Mutaezya ukuomba umulimo umwi apa wanda wi Sabata, pano wene uwanda umwi uwamuzilo. Mwemo mulinzile ukulinda ndi vino napiile ilamulo ku vikolwe vinu.

²³ Ivikolwe vyao vituvwile vino nemo navinenyile, vitasumvileko amano awe. Lelo vyatalime vyakanyile ukunguvwa nu kutontela amasunde yane.”

²⁴ Ali cino fwandi Yawe walanda wati, “Nena antu yaa ukuti yalinzile kuyela masunde yane yonsi. Yatalinzile kusenda iciviya cinyome cili consi apa mpongolo zya musumba wa Yelusalemu pa wanda wi Sabata. Yalinzile kucindika wanda wi Sabata nu muzilo nupya yatalinzile kuombamo umulimo uli onsi.

²⁵ Alino lyene aene yao ni ntunguluzi yalingila pa mpongolo zya musumba wa Yelusalemu na maka ya kuteeka ali yamwi na yano Davidi wakweti. Aene kwene yayo pamwi ni ntunguluzi zizi, pamwi na antu aikazi amu Yuda na amu Yelusalemu yaliza ale yakwezile pa maceleta na pa mfwalasi, nga mu musumba wa Yelusalemu mulaya antu avule pee na pee.

²⁶ Alino nupya antu ukufuma mu misumba yamu Yuda nu mu misumba yazinguluka Yelusalemu, umu mpanga yakwe Benjamini, mu mpanga ya mwisika lya myamba yaku Negebu, ukwiza ku kutuula vya mawila yakoca ni mpolelwa, amawila ya mbezu nu ubani nga na mawila ya kutaizya.

²⁷ Lelo ndi cakuti mwala mwakana kunjela, ukuwaka wanda wi Sabata nu muzilo, nu kukana ingila pa mpongolo zyakwe Yelusalemu ni civiya apa wanda wi Sabata, lyene mulaleka noce impongolo zizyo uku moto uno ulamalila amang'anda acindame amu Yelusalemu ukwaula kuti uzime.”