Utandiko 38 - Amazwi Yakwe Leza 2013

Yuda na Tamala nyinavyala

¹ Pa nsita ilya Yuda apaatuka afuma ku ina yakwe, apita aya aikala na Hila mwina musumba wa Adulamu.

² Kuku Yuda akuno yamanyana nu mwanaci mwina Kenani, amutwala. Isi wa mwanaci wali a Syuwa.

³ Lyene umuci wakwe Yuda asenda indilwa, nga avyala umwana umonsi, nga Yuda amutemela izina ati Ele.

⁴ Nupya asenda indilwa nayuze, avyala umwana umonsi amutemela izina ati Onani.

⁵ Nupya kwene avyala umwana umonsi, amutemela izina ati Syela. Yuda wikalanga ku Kezibu lino Syela wavilwe.

⁶ Yuda alondela Ele iyeli lyakwe umwanaci wakutwala, ni zina lyakwe a Tamala.

⁷ Misango yakwe Ele, umwana iyeli wakwe Yuda, itazanzizye Mwene. Caleka Yawe amukoma.

⁸ Lyene Yuda anena Onani ati, “Pyana solenzi, utoole umuci wakwe kuti munoli umuvyalile ana ndi vino caya mu lutambi, kuti izina lyakwe solenzi litakalowe.”

⁹ Lelo Onani amanya ukuti ana yano yalavyalwa yatalaya ana yakwe. Caleka lyonsi lino yakomana nu umuci wakwe silenzi pa musanzi, wafutilanga ukunzi pakuti atavyalila silenzi ana.

¹⁰ Vii vino wacitanga vitazanzizye Mwene. Caleka Yawe amukoma nawe kwene.

¹¹ Alino Yuda anena nyinavyala wilya Tamala ati, “Utale uswilile ku mwinu nga mukamfwilwa kufika lino Syela umwana wane umonsi, muto wa afwe, akakule.” Wavwanzile vi pamulandu wa ntete zyakuti ndi wamupyanike nawe kwene angafwa wakwe vino yasilenzi yafwile. Caleka Tamala aswilila kwakwe isi.

¹² Lino papita myaka umuci wakwe Yuda, uwali umwana umwanaci wakwe Syuwa afwa. Lino Yuda wamala kulosya umuci wakwe, aliwe nu muze Hila mwina Adulamu, yaya ku Timinaa kuno yasenyanga imfwele amavumbu.

¹³ Umwi wanenyile Tamala ati, “Sovyala akuya ku Timinaa kuno yakasenya imfwele amavumbu.”

¹⁴ Tamala azula insalu zya umfwilwa zino wazwalanga, azwala zyuze avimbala nu ku mutwe, aya aikala ku mpongolo ya Enaimu, umusumba waya lwamu museo uwaya ku Timinaa. Tamala wamanyile ningo ukuti pa nsita ilya Syela wakula nanti walanga atalapelwe kunoli kumupyana.

¹⁵ Lino Yuda walola umwanaci wii, aelenganya ukuti acizelele, pano wavimbile ku mutwe.

¹⁶ Yuda atamanyile ukuti anyinavyala. Acino apalama aya kumbali ya museo kunoli, amunena ati, Iza kuno, ndale nawe. Mwanaci wilya amuuzya ati, “Uzye umandipila cani?”

¹⁷ Aasuka ati, Indi nu kukutumila kafwele kamu viteekwa vyane. Mwanaci ati, “Icisuma, cikulu unsile cimwi cakwe kamukole ukufika lino ulantumila imbuzi.”

¹⁸ Yuda azumila ati, “Icisuma, nga icani cino namakusila?” Mwanaci wilya aasuka ati, “Usye impalata yako kumwi nu musipi wakweyo nga ni ntuwa ino ukapitila.” Nawe amusila vyonsi. Caleka amumanya, nga Tamala asenda indilwa.

¹⁹ Lyene Tamala akatuka, apita aya azula cino wazwite nga azwala insalu zya umfwilwa.

²⁰ Yuda nawe ukwakwe aya atuma cuza wakwe, Hila ukufuma ku Adulamu, amutumilizya imfwele kuti akamukombwele vino wasile ku mwanaci vyakwe kamukole. Muze ataile akazane umwanaci wilya.

²¹ Acino auzya antu akaya ya papa kwene ati, “Uzye cizelele wino walali pipi nu museo wa Enaimu alikwi?” Nayo yamwasuka yati, “Pano patatala paya cizelele.”

²² Caleka aswilila kuli Yuda, amunena ati, “Ntaile nkamuzane umwanaci wilya. Antu ya penepo yati pataya nupya patatala paya cizelele papa.”

²³ Yuda alanda ati, “Usi mulandu leka viye pano antu yangatusoweka sile. Nemo namutumile kafwele pakusunga ulayo wane. Lelo utaile umuzana.”

²⁴ Lino papita manye myezi itatu umwi anena Yuda ati, “Nyokovyala Tamala watapula indilwa kumwi.” Yuda apeela ilamulo ati, “Mwanaci wiyo muye mukamufumizye kunzi ya muzi mu moce afwe.”

²⁵ Lino yakumutwala kunzi ya muzi, umwanaci atuma amazwi kuli sivyala ati, “Napelwa indilwa nu muntu umweneco wa vintu vino indi navyo. Mukwai navituma muvilole kuti mumanye umwine wa vintu vi.”

²⁶ Yuda avimanya ati, “Manguvyala watalungika. Cacumi nene naluvyanya, pano cali cakuti mupeele ku mwanane Syela apyane.” Yuda atatazile aswilile kuli nyinavyala.

²⁷ Lino insita yakuvyala yafika, lyene cimanyika ukuti indilwa iyakwe yampundu.

²⁸ Lino ali mu umbuza wenga afumya ikasa, nga yanakambuza yalema ikasa yazwikako kausavu kayenzu yati, “Wi wavyalwa inkolelo.”

²⁹ Lelo waswilizye ikasa, umwina aliwe aiza avyalwa inkolelo. Lyene yanakambuza yati, “Vi avino wazana inzila yakwizilamo!” Caleka yamutemela izina yati Pelezi.

³⁰ Alino mwina avyalwa icisila, wene wali na kausavu ukwi kasa akayenzu kano yamuzwisile. Nawe yamutemela izina yati Zela.