Utandiko 31 - Amazwi Yakwe Leza 2013

Yakobo uutuka Labani

¹ Yakobo auvwa ukuti ana yakwe Labani aonsi yakuti, “Yakobo watatoola vintu vyonsi ivyali vyakwe tata. Watazana ukama ukufuma kuli vino tata wakwata.”

² Nawe kwene Yakobo waciweni vino ulukundo lwakwe Labani panoli lukucepa, asi vino wali pakutandika.

³ Lyene Yawe anena Yakobo ati, “Pita swilila ku mpanga yakwe so nu ku aluko lwako, lelo ndaya nawe.”

⁴ Caleka Yakobo watumile izwi kuli Lakeli na Leya ukuti yangamukomanya ku vyalo kuno wacemelenga iviteekwa.

⁵ Ayanena ati, “Nemo natincizana ukuti so atacikweti lukundo luno wali nalo kunondi, lelo Leza wakwe tata waya nani.

⁶ Mweili mwamanya ningo ukuti naombela so na maka yane yonsi.

⁷ Lelo wene wansomba nu kucefya malipilo yane maila ikumi. Lelo Leza atamuzumilizye kuti ancise.

⁸ Lyonsi lino Labani wanena wati, ‘Iviteekwa vyonsi vya maalamaala vilaya ali malipilo yako,’ Ala lyene iviteekwa vivyo vyonsi vimavyala ana a maalamaala. Ndi wati, ‘Iviteekwa vyonsi vya mingololozi vilaya ali malipilo yako,’ ala lyene iviteekwa vivyo vyonsi vimavyala ana a mingololozi.

⁹ Caleka Leza waatola iviteekwa vyonsi ukufuma kuli so nu kupeela kunondi.

¹⁰ “Mu nsita ino iviteekwa vikaya na mayele nakweti ciloto, nga naweni ukuti utwana tukuvyalwa utwa mingololozi, utwa matonitoni, nu twa maalamaala.

¹¹ Mungeli wa Mwene Leza avwanga kunondi mu ciloto ati, ‘Yakobo.’ Nani naasuka inti, ‘Mukwai.’

¹² Nga avwanga ati, ‘Silola, yasawe yonsi akulondela zyakaci a mingololozi, a matonitoni, a maalamaala. Nene natindeka kuti avino cicitike pamulandu wakuti natindola vino Labani akucita kunuli.

¹³ Anene Leza wino walolike kunuli ku Betele, kuno watozile iwe witilapo amafuta, ulizilizya kuti liye lyamuzilo ni ciusizyo, nga ulapa nu mulapo kunondi. Acino ndakai iteyanye fuma ku mpanga iyo uswilile ku mpanga yakumwinu.’”

¹⁴ Lakeli na Leya yaasuka Yakobo yati, “Tutacikwetiko wankanyo mu vyuma vyakwe tata mu vyaupyanyi.

¹⁵ Tata akatulola wa inamasi. Watupomile nga ni mpango zya pali sweswe walya wamala.

¹⁶ Acino vyuma vyonsi vino Leza watatola ukufuma kuli tata ivyakwitu na ana itu. Wemo cita cino Leza watakunena ukucita.”

¹⁷ Lyene Yakobo ateyanya ulendo wa kuswilila kuli isi Isaki ku mpanga ya Kenani. Akwezya ana na aci yakwe pa ngamila.

¹⁸ Akolezya na maufyo ya viteekwa vyakwe, asenda ni vyuma vino walonsile mu mpanga ya Mesopotamya.

¹⁹ Insita ilya Labani walanga wapita ku kusenya imfwele mavumbu, na lino atalipo Lakeli asyala aiya tuleza tuluwi twamu ng'anda mwakwe Labani, isi.

²⁰ Yakobo watumpike Labani mwina Alamu, pakumufisa ukuti akulonda ukupuuka.

²¹ Apuuka asenda na vyonsi vino wakweti, nga aya alamba Luzi lwa Yufulate alungama ku myamba ya Gileadi.

Labani walondelela Yakobo

²² Lino papita amanda yatatu antu yanena Labani ukuti Yakobo wapuuka.

²³ Labani akonganika antu yakwe nga yamulondelela pa manda cinimbali mpaka yazana Yakobo ku mpanga ya myamba ya Gileadi.

²⁴ Usiku ulya Leza aloleka kuli Labani mu ciloto nga amunena ati, “Utekele utezya kulandapo izwi nanti limwi kuli Yakobo.”

²⁵ Labani wazanyile Yakobo watakuula insakwe mu myamba yaku Gileadi. Labani pamwi na akazi kakwe iyimika amataalu yao mumu kwene mu myamba iya.

²⁶ Labani anenola Yakobo ati, “Uzye pacani cino wantumpikile, nu kusenda ana yane kwati anaci alemwa mu nkondo?

²⁷ Uzye pacani cino wantumpikile nu kupuuka ukwaula kumpakasya? Ala unena ukuti ukupita, ngano nakupakisye upita nzila yako ule ukusansamuka nu kwimba kwa kukonkelezya ingoma na yababatoni.

²⁸ Utalesile na kuti ntonsole aizikulu yane inti tukateni. Wacisile ca kutumpa!

²⁹ Indi na maka yaku kucisa, lelo usiku wilelo Leza wakwe so wali wansopa wati, ‘Utezya kulandapo izwi nanti limwi kuli Yakobo!’

³⁰ Nimanya mulandu uno wapitila, ukulondesya kuwela kumwinu. Lelo, uzye pacani cino wangiila tuleza twane?”

³¹ Yakobo aasuka ati, “Pamulandu wakuti nali ni ntete zyakuti nalimwi wange umpokolole ana yako.

³² Lelo ndi ungazana munotuli umwi ali na tuleza twako ale ali nu kukomwa. Pa manso ya antu yane nga yakambone, londa nu kuzana consi cingaya cakwako nu kutoola icili cako. Yakobo atamanyile ukuti Lakeli walanga wiya tuleza.”

³³ Labani aingila mwi taalu lyakwe Yakobo nu kulonda, afumamo aya mwi taalu lyakwe Leya nu mu mataalu ya anaci azya. Lelo atazanyilemo tuleza twakwe. Pacisila aya mwi taalu lyakwe Lakeli.

³⁴ Lakeli walanga watatola tuleza twamu ng'anda yakwe Labani tuno wivile atufisa pa cikalilo, pa nsizi ya ngamila aikala napo. Labani asakaula mu viya vyali mwi taalu lyakwe Lakeli, lelo atazanyilemo tuleza twakwe.

³⁵ Lakeli anena isi ati, “Musambazi, mutansokela muti misuli pa kukana katuka pano ntenzi pamulandu wakuti indi ku musango wa cimama.” Labani alonda tuleza tutu wakwe cimwi. Lelo atatuzanyile.

³⁶ Lyene Yakobo akalipa nga anenola Labani ati, “Yama uzye mulandu uno nakutala ulikwi?” Alino auzya Labani ati, “Isunde ci lino navuna ilya kupeela nsambu yakundondelezya nu kundunga?

³⁷ Ale vino wasakaula mu viya vyane vyonsi, cino wazana civiya ca ng'anda yako cilikwi? Cifumye pano kuti antu yane na antu yako yalole, uleke yaputule mulandu pali wewe nani yalole ali ningo aweni.

³⁸ Natenzi nawe pa myaka amakumi yaili. Imfwele zyako pamwi ni mbuzi zitatile kuvyala, nupya ntatazile nkome nu kulya nanti umwana wa mfwele ukufuma mu viteekwa vyako.

³⁹ Lino imfwele yakomwa ni vilyanyi, uzye ntaletanga cino napokolwile niza inkulanga vino utali mulandu wane? Lelo nene nalipilanga pano watangi ukulonda yuze mpyanikile po. Nalipilanga na pali yonsi iyaponga usiku nanti musanya.

⁴⁰ Manda yonsi aucemi wane naculanga. Insita ya musanya napyanga nu musanya, ni nsita ya usiku nazakazanga ni mpepo. Ntalalanga tulo.

⁴¹ Vikwene avino natenzi imyaka yonsi amakumi yaili lino nali nawe. Pa myaka ikumi na ini, naombelanga mpango zya pa ana yako, alino imyaka mutanda naombelanga lusoso. Lelo nanti cali vivyo wancenjizye malipilo yane maila ikumi.

⁴² Ndi Leza wakwe tata, Leza wakwe Abulaamu na Isaki atali nani, nga wanzinga mpita minwe. Lelo Leza walola ucuzi wane ni ntazi yapa ncito ino naomba. Caleka usiku wilelo wali wakuvunuka pa uyi wako.”

Upangano wakwe Yakobo na Labani

⁴³ Labani nawe aasuka Yakobo ati, “Akazyana yaa ana yane, na ana yao aizikulu yane, ni viteekwa ivyakwane. Vyonsi vino ukulola pano ivyakwane. Uzye lyene icani cino ningacita pa ana yane na ana yano yavyala?

⁴⁴ Cisuma katupangane wewe nani. Tumatulika amawe alaya cakutwiusya upangano uu.”

⁴⁵ Lyene Yakobo atoola iwe alimika kuti liye ilya ciusizyo.

⁴⁶ Anena na antu yakwe ati, “Kolonganiki amawe yamwi nu kuyatulika.” Acino yatoola amawe yatulika mutumba, nga yalya nu mwikulo papa kwene apambali ya mutumba.

⁴⁷ Labani atemela icifulo cici izina ati Yegala Saaduta, na Yakobo acitemela izina ati Galeedi.

⁴⁸ Labani anena Yakobo ati, “Mutumba wa mawe ya cili ciusizyo pakasi kakwe wewe nani.” Uli mulandu uno cifulo cii yacitemile izina yati, Galeedi.

⁴⁹ Labani avwanga ati, “Si Yawe alolekesya micitile itu kuno twaya ndi twapalukana.” Caleka cifulo cici yacitemile izina nalyuze yati, “Mizipa.”

⁵⁰ Nupya Labani ati, “Ndu lacuzya ana yane anaci nanti kutwala anaci yauze, nanti angala umuntu umwi asi naswe pano, waiusya ukuti Leza ali kambone pakasi kakwe wewe nani.”

⁵¹ Labani atwalilila ukunena Yakobo ati, “Amawe aya yano nalonga pakasi kitu, ni iwe lya ciusizyo nalyo aili.

⁵² Umutumba uu nga ni iwe lya ciusizyo vyoili vimatwiusyanga. Ntalapuzya amawe ya nu kwiza kulwisya, nanti awewe utakapuzye iwe lya ciusizyo nu kwiza ndwisya.

⁵³ Leza wakwe Abulaamu na Leza wakwe Nawoli yali nu kupingula panotuli.” Lyene Yakobo alapa mwi zina lyakwe Leza wino wapepanga, Leza wakwe isi Isaki.

⁵⁴ Akoma ni nyama, nga apeela impolelwa pa mwamba, aama na antu yakwe ku cakulya. Alino yalya nga pacisila yalala indo pa mwamba papela.

⁵⁵ Lino waca katondo Labani atonsola aizikulu na ana yakwe anaci yalya, ayapakasya nga ayapolelela, alino apita aswilila ukwakwe.