Utandiko 28 - Amazwi Yakwe Leza 2013

¹ Acino Isaki aama Yakobo nga amupolelela, alino amunena ati, “Utange utwale umwanaci mwina Kenani.

² Katuka upite kwakwe sokulu Betuele, ku Mesopotamya, akuno ukatwale umwanaci uwamu avyala yako, ana yakwe Labani nyokolume.

³ Si Mwene Leza Wamaka yonsi akupolelele akupeele nu uvyazi uce usanduluke uye imitundu ingi!

⁴ Nupya akapolelele na ana yako kwene vino wapolelile sokulu Abulaamu. Ace alenge kuti ukapyane impanga ii ino nkaikalamo wa mwinamasi, impanga ino Leza wapile kuli Abulaamu.”

⁵ Pacisila ca mazwi yaa, Isaki atuma Yakobo ku Mesopotamya kuli Labani, umwana umonsi wakwe Betuele umwina Alamu, kalume wakwe Labeka, nyina wakwe Yakobo na Esau.

Esau watwala umwanaci Namuze

⁶ Esau auvwa ukuti Isaki watapolelela Yakobo nu kumutuma ku Mesopotamya akuno akalonde umuci wakutwala. Esau nupya amanya ukuti Isaki apakupolelela Yakobo wamupeezile ilamulo kuti atezya kutwala umwanaci mwina Kenani,

⁷ amanya navino Yakobo watayela isi na nyina nu kuti wataya ku Mesopotamya.

⁸ Lyene Esau asininkizya ukuti isi Isaki asilonda anaci amu Kenani.

⁹ Caleka Esau aya kuli Isumeli nga atwala Maalati umwana umwanaci wakwe Isumeli, nupya umwizikulu wakwe Abulaamu. Kalume wakwe Maalati wali a Nebayoti.

Ciloto cakwe Yakobo pa Betele

¹⁰ Yakobo afuma ku Belisyeba, nga atenuka aya ku Halani.

¹¹ Lino ilanzi lyawa afika pa ncende imwi yamuzilo, akuula insakwe apano alala, atoola iwe acita musamilo nga akasula.

¹² Alota akulola mutanto, ala cisinte cakweo cimikwe pansi nu lutwe lwauko lusintilile umwiyulu, nga na angeli yakwe Leza yamwi yakwika na yamwi yakukwela penepo.

¹³ Mwene aimilila pipi nawe avwanga ati, “Nene Yawe, Leza wakwe Abulaamu na Isaki. Ndapeela impanga muno uizi kunuli nu ku amu mupanda wako.

¹⁴ Ndalenga kuti ana yako yavule wa musensenga uwamu nkumba yakwe Yemba. Ana amu mupanda wako yalasalangana ukuya mu ntunga zyonsi izya nsi. Kupitila munuli nu mu amu mupanda wako indapolelela antu amu nko zyonsi.

¹⁵ Ndakucingilila konsi kuno ulaya, nupya ndakuwezya ku mpanga kwene ii. Intalakusya mpaka nkafikilizye vyonsi vino nakulaya.”

¹⁶ Lino Yakobo wazyuka avwanga ati, “Mucumi Yawe ali pa cifulo ci, nani ntacimanyile!”

¹⁷ Auvwa intete nga avwanga ati, “Owe cifulo ci icakoopa! Cilinzile ukuya ing'anda yakwe Leza ni mpongolo ya kuila kwiyulu.”

¹⁸ Yakobo akatuka katondotondo. Atoola iwe lino wasamile, alimika nu kulicita ciusizyo. Lyene aitilapo na mafuta, alipaatula kuti liye lyamuzilo.

¹⁹ Atemela cifulo cici izina ati Betele. (Lelo umusumba ulya mpiti wamwangwa ukuti Luzi.)

²⁰ Lyene Yakobo alaya nu mulapo kuli Yawe ati, “Ndi ulaya nani nu kuncingilila mu ulendo wane uno nkweti, nu kumpela ivyakulya ni vyakuzwala,

²¹ nupya ndi naca nawela ulumi kuli tata, lyene ulaya Leza wane.

²² Iwe lii lya ciusizyo lino nimika paa, lilaya cifulo ca kukupepela penepo, nga ndakupeela icikumi muli vyonsi vino ulampa.”