Mpendwa 36 - Amazwi Yakwe Leza 2013

Ukupyana umwanaci

¹ Intunguluzi zyamu lupwa longa zyamu mupanda wakwe Yosefu, izyafumile mu luko lwakwe Gileadi umwana wakwe Makili, umwana wakwe Manase, iziza kuli Mose. Lyene pa manso yakwe Mose na pa manso ya ntunguluzi na aikolo yonsi a nko zya ina Izlaeli, izilanda iziti,

² “Yawe wanenyile umusambazi witu ukupeela aina Izlaeli impanga nu kuyankanya ningo mu kuomvya umusango wa kupendola. Nupya Yawe kwene uwanenyile umusambazi witu Mose ukupeela icipande ca mwina witu Zelofeadi ku ana yakwe anaci.

³ Lelo ndi cakuti yasakwa ku onsi amu mutundu uze uwa ina Izlaeli, ale icipande cakwe cilasenka ku vipandwa vya mpanga ya vikolwe vitu. Lyene mwalola, ale lyene ni cipande ca mpanga iya mutundu uno yalaya mwenemo cilakulilako. Alino ni cipande ca mpanga ino yatupile cilakulilako.

⁴ Alino lyene Mwaka wa Ukuluzi lino uliza ufike, ali lino aina Izlaeli yalalunda icipande cakwe anaci amu cipande ca mutundu uno yalayela mwenemo. Nupya cilafuma nu ku cipande ca mutundu wa vikolwe vitu.”

⁵ Ku maka yi zwi lyakwe Yawe Mose apeela ilamulo ku ina Izlaeli ati, “Amu mutundu uwamu mupanda wakwe Yosefu yatiyalanda ivya mpomvu.

⁶ Amazwi yano Yawe wasokolwela ana yakwe Zelofeadi akazyana aeya. Yangasakwa kuli wensi wino yatemwa, cikulu sile yasakwe ku mitundu pali iyo iyakwe ya isi.

⁷ Icipande ca ina Izlaeli cisi nu kufuma kweneko nu kuya ku mutundu uze. Aina Izlaeli yonsi wenga wenga yali nu kusyala sile ni cipande caupyani ca mpanga ya mutundu wa vikolwe vyao.

⁸ Ali cino fwandi umukazyana wensi uwakwata icipande ca mpanga, mu mutundu onga uwa ina Izlaeli, ali nu kutwalwa kuli umwi uwa luko longa lwakwe isi. Pali pakuti cila wenga uwamu ina Izlaeli asunge icipande caupyani cakwe isi.

⁹ Icipande fwandi citange cifume ku mutundu onga nu kuya ku uze, pano cila mutundu uwa ina Izlaeli ulinzile kusunga impanga ino wapyana.”

¹⁰ Caleka ana yakwe Zelofeadi, anaci, ali pakucita wakwe vino Yawe wapeezile Mose ilamulo.

¹¹ Ana yaa yakwe Zelofeadi, Maala, Tiliza, Hogila, Milika, na Nowa, yatwitwe ku avyala yauze aku mutwe.

¹² Pamulandu wakuti yatwitwe mu nko zyamu mupanda wakwe Manase umwana wakwe Yosefu, icipande ca mpanga cawelelile ku mutundu wa nko zyakwe ya isi.

¹³ Fwandi yao ali masunde na malamulo yano Yawe wapeezile aina Izlaeli ukupitila mu mazwi yakwe Mose ku manyika aku Moabu, pipi nu Luzi lwa Yodani, ulunga na Yeliko.