Mpendwa 30 - Amazwi Yakwe Leza 2013

Ivyeo vya pamulandu wa vilayo

¹ Mose wapeezile amazwi yautunguluzi ku ntunguluzi zya mitundu ya ina Izlaeli.

² Ayanena ukuti umuntu ndi walaya kuli Yawe icilayo nanti walaya ukucita icintu cimwi, ale wene asi nu kusenuka nupya umwi zwi lino wavwanzile ku kanwa kakwe. Fwandi alinzile kufikilizya consi cino walavile ukucita.

³ Umukazyana ndi cakuti walaya nu mulapo kuli Yawe icilayo ca kumupeela icintu cimwi pa nsita lino acili mumwao mu ng'anda yakwe isi,

⁴ nga isi nawe auvwa cino watalaya nanti ukupeela cimwi cakwe kamukole, lelo ukwaula ukulandapo cimwi, ale icilayo cakwe cili nu kufikiliziwa.

⁵ Lelo isi ndi cakuti uwanda umwi wiiza wamanya umulandu, alino wamukanya ukufikilizya vino walaya nu mulapo, ale wene asi nu kufikilizya imilapo yonsi ino walavile ukucita nanti ukupeela cakwe kamukole. Fwandi Yawe nawe alaleka aye umuntungwa pamulandu wakuti isi uwamukanya.

⁶ Ndi cakuti umukazyana wanyepa utwazi nanti wata icintu icili consi nu kulapa walapa nu mulapo ukwaula ukwelenganya ningo, alino wasakwa nu kusakwa,

⁷ wene alinzile ukufikilizya vyonsi vino walafile nanti kulaya suka sile ndi cakuti iya wakana lino uvwa cico.

⁸ Lelo ndi cakuti iya wiza uvwa vino cali, nga amulesya kufikilizya icilayo cico, ale lyene ali ni nsambu ya kupasa icilayo cino walavile paula ukwelenganya ningo. Yawe nawe alamwelela.

⁹ Mukamfwilwa nanti umwanaci wino iya wamuta alinzile kufikilizya icilayo ni milapo yonsi ino walavile iya kuntakumako ku cintu cimwi.

¹⁰ Ndi cakuti umwanaci wino wasakwa walaya icilayo nanti walaya kuntakuma ku cintu cimwi,

¹¹ nga iya nawe lino uvwile atamunenyile nanti cimwi nupya atamukanyizye, ale lyene alinzile kufikilizya imilapo yakwe yonsi ino wene walavile ukucita nanti ukupeela cakwe kamukole.

¹² Lelo ndi cakuti iya wiza uvwa vino cali, nga amulesya kufikilizya imilapo iyo kumwi nu kupeela cakwe kamukole, lyene ale ali ni nsambu ya kupasa imilapo ino walavile nanti cimwi cino wali nu kupeela cakwe kamukole, apaula ukwelenganya ningo. Yawe nawe alamwelela, pamulandu wakuti iya watamulesya kufikilizya icilayo cakwe.

¹³ Iya akweti insambu zya kuzumilizya kufikilizya nanti kupasa icilayo icili consi nanti umulapo uno wene wacita.

¹⁴ Lelo ndi cakuti iya atamunenyile nanti cimwi cakumukanya pa wanda uwalondelela penepo, ale calanga ukuti wene alinzile kufikilizya umulapo uli onsi uno wene wacita nanti ukupeela cakwe kamukole cico. Iya watazumilizya icilayo pa kuntalanda cimwi cakumulesya pa wanda uno uvwile icilayo cico.

¹⁵ Lelo ndi cakuti iya wiza wapasa icilayo cico lino uwanda watiupita, ale lyene aliwe wakwata umulandu pa muci wakwe.

¹⁶ Fwandi yaa, ali malamulo yano Yawe wapeezile Mose pamulandu ukumile umonsi nu muci, alino na pamulandu wakwe isi nu mwana umukazyana acili akwikala mu ng'anda yakwe isi.