Mpendwa 15 - Amazwi Yakwe Leza 2013

Amasunde ya mawila ya mpolelwa

¹ Yawe apeela amazwi autunguluzi kuli Mose

² kuti anene aina Izlaeli ukuti lino yingila mu mpanga ino akuyapeela pakuti yikale mwenemo

³ na lino yakupeela kuli Yawe amawila yakoca pa moto ukufuma mu ufyo wa mfwele nanti uwa mbuzi, cingaya amawila yakoca nanti impolelwa yakufikilizya ulayo, nanti tuti amawila yano aisikulu yaitemilwe ukupeela, nanti amawila yakucindika kuzevya kwa manda yao akulu aupefi, nanti uwila wa mununko usuma ukazanzya Yawe.

⁴ Lyene umuntu wino waleta uwila wakwe alinzile ukupeela uwila wa cakulya pa kavuwa kuli Yawe. Vivyo vilinzile vyaya icitundu ca usu wa ngano utonyoleke utikinkanye na lita wenga uwa mafuta ya miolivi.

⁵ Apeele na waini ukulingana na lita wenga wa wila wa vyakumwa, ivyakulunda pali cila wila wakoca alino na pali cila wila uze, umwana wa mfwele wenga.

⁶ Papela yakwe suuku wenga, uli nu kwikapo icitundu ca usu utonyoleke ca wila wa cakulya ukulingana na makilogalamu yaili uno yangatikinkanya mwenemo amafuta akulingana na lita wenga na citika.

⁷ Alino uwikepo na waini ukulingana na lita wenga wa wila wa vyakumwa. Mununko usuma uwa wila uu ukazanzya Yawe.

⁸ Nga wapeela kuli Yawe kacipambasi ka wila wakoca nanti uwa kufikilizya ulayo, nanti sile uwila wa utandano,

⁹ ale pali kacipambasi kako uli nu kulunda penepo icitundu ca usu utonyoleke ca wila wa cakulya ukulingana na makilogalamu yatatu uno yangatikinkanya na mafuta ya miolivi ukulingana na citika wakwe lita.

¹⁰ Alino uwikepo citika wakwe lita wenga wakwe waini wa wila wa vyakumwa. Vilinzile vyaya amawila akocela Yawe, amununko usuma ukazanzya Yawe.

¹¹ Vii, ali vino vilinzile kupelwa pamwi na cila ng'ombe, cipambasi, suuku, imfwele, nanti imbuzi.

¹² Lino kwaya ukupeela ukuluta pa nyama yonga, uwila uno ukupelwa pamwi ni nyama iyo ulinzile ukungiliziwa vino cingalinga.

¹³ Umuntu wensi uwamu mutundu wa ina Izlaeli alinzile wacita cii lino akupeela uwila wa vyakulya, uwa mununko usuma ukazanzya Yawe.

¹⁴ Nu umwinamasi wensi umutandazi nanti uwaca wikala namwe mu nkulo zyonsi, nawe kwene alinzile ukupeela uwila wa vyakulya, uwa mununko usuma ukazanzya Yawe. Nawe kwene alinzile kulondela vipope vili vimwi kwene.

¹⁵ Ali vino ni uvi kwene lilinzile lyacita. Kuce kwaya isunde sile lyonga, ku enyi na kuli mwe akaya. Ni sunde lii ilya kuwaka insita zyonsi mu nkulo zyonsi. Mwensi pamwi na enyi kwene pasi upusano ku manso yakwe Yawe.

¹⁶ Kuce kwaya amasunde ali yamwi na malamulo ali yamwi kwene kuli mwemwe nu ku enyi yano yatenzi namwe.

¹⁷ Yawe apeela Mose

¹⁸ vipope vii kuti anene aina Izlaeli yace yavilondela mu mpanga ino alayapeela.

¹⁹ Nga mwalya icakulya icalimwa mwenemo, muce mwapaatula cimwi apambali mupeele kuli Yawe.

²⁰ Nga mwapanga mukate, umukate wankolelo ukupangwa ukufuma ku mbezu zipya ulinzile kupelwa ukuya uwila wakusangula kuli Yawe. Wene ulinzile kupelwa mu musango uli umwi na vino mukapeela uwila wa usu pa kupuula.

²¹ Mu nsita zyonsi izya kunkolelo, muli nu kupeela uwila uu kuli Yawe.

²² Lelo ukusi ku mufulo, ndi cali umwi waposiwa kulondela vipope vii vino Yawe wapeezile Mose,

²³ nanti ndi mu manda akunkolelo iuvi lyaposiwa ukucita vyonsi vino Yawe wakonkomizye Mose.

²⁴ Ndu kuluvyanya kwacisilwe pamulandu wa kuntamanya kwi umba, ale lyene yalinzile ukupeela kacipambasi kuti kaye uwila wakoca, uwa mununko usuma ukazanzya Yawe. Yaupeele pamwi nu wila wa cakulya uno walandwa pamwi nu wila wakwe waini. Kulunda pali vii, yalinzile ukupeela sawe ukuya uwila wa kwelela amaifyo.

²⁵ Alino simapepo ali nu kucitila iuvi lyonsi lya ina Izlaeli ulutambi lwa kufuta amaifyo, nga nayo yalelelwa, pamulandu wakuti kuluvyanya kuko kwacisilwe ukusi ku mufulo nga nu kuti yene yalesile uwila uwo kuli Yawe, uwa kwelela amaifyo.

²⁶ Ala lyene aina Izlaeli yonsi iyelelwa kumwi na inamasi akaikala nayo, pamulandu wakuti yonsi kwene yaluvinye ukusi ku mufulo.

²⁷ Lelo ndi cakuti umuntu wenga sile wifya ukusi ku mufulo, wene alinzile ukupeela imbuzi, musesi uwa mwaka onga ukuya uwila wa kwelela amaifyo.

²⁸ Simapepo nawe ali nu kumucitila ulutambi lwa kufuta amaifyo kwi iifyo lyakwe lino wacisile kusi ku mufulo, nga nawe alelelwa.

²⁹ Umukaya ali wensi pa ina Izlaeli nu mwinamasi ali wensi akaikala nayo nga waluvyanya kusi ku mufulo, kuce kwaya isunde ilili lyonga kuli mwensi.

³⁰ Lelo wino wensi uwala waluvyanya ku mufulo, ciye mukaya nanti umwenyi, wene ale wasuula Yawe. Umuntu wiyo alinzile kusukulwa mu antu yakwe.

³¹ Pamulandu wakusuula amazwi yakwe Yawe nu kukanayela amasunde yakwe, cumi kwene umuntu wiyo alinzile kusukulwa. Wene acili nu mulandu.

Umuntu uwaomba pa Sabata

³² Insita imwi, lino aina Izlaeli yacili pa lwendo mu lwanga, iyalola umonsi umwi uwatiyanga inkwi pa wanda wi Sabata.

³³ Yao amulemile lino akutiya inkwi iyamutwala kuli Mose na Aaloni ni umba lyonsi,

³⁴ nga yatala iyamwika mu cifungo nu kumulinda, pamulandu wakuti ala yatali yamanye ningo ivyakumucita.

³⁵ Lyene Yawe anena Mose ati, “Umonsi wiyo alinzile kukomwa. Iuvi lyonsi lilinzile lyamutamola na mawe kunzi ya nsakwe.”

³⁶ Acino iuvi lyonsi ali pa kumutwala ukunzi ya nsakwe, iyamutama na mawe mpaka afwa, wakwe muno Yawe wapeezile ilamulo kuli Mose.

Amasunde pamulandu ni nsenkewele

³⁷ Alino Yawe apeela ilamulo nupya kuli Mose

³⁸ kuti anene aina Izlaeli ati, “Umu nkulo zyonsi zili inkolelo muce mwapanga mansenkewele akwika mu masempele ya vyakuzwala vinu. Muce mwaika pali cila sempele umwando wa cifungo.

³⁹ Fwandi muli nu kucita vivyo kwene pakuti insita yonsi ndi mwazilola, imwiusya amasunde yakwe Yawe, pakuti mwayela kuti mutaca mumufutatile nu kulondela ulunkumbwa lwa mu myenzo inu nu lwa mu manso inu.

⁴⁰ Lyene mulaiusya kuyela amasunde yane, nupya mulaipaatula ukuya akwane.

⁴¹ Nene indi Yawe Leza winu, wino uwamufumizye mu Eguputo kuti nje Leza winu. Nene indi Yawe Leza winu.”