Milimo 7 - Amazwi Yakwe Leza 2013

¹ Simapepo Mukulu auzya Sitivini ati, “Uzye vii vya cumi?”

² Sitivini aasuka ati, “Inane na yatata, uvwini kunondi! Leza wa lulumbi walolike kuli Abulaamu cikolwe citu, lino wikalanga ku Mesopotamya, ala atali aye ku kwikala ku Halani,

³ nga amunena ati, ‘Usye akazi kako nga ni mpanga yako, nu kuya ku mpanga ino namakulanga.’

⁴ Caleka asya impanga ya Kalideya aya ikala ku Halani. Lino Isi wafwile, Leza aleka aiiza ku mpanga ii, ino mukwikalamo ndakai.

⁵ Leza atapile Abulaamu nanti ciputulwa ca mpanga kuti iye impanga yakwe, nanti impanga kulingana nu lutampulo longa awe. Lelo Leza wamulavile ukumupeela impanga ilya, nu kuti ilaya impanga yakwe nga na amu mupanda wakwe kwene aliza cisila cakwe. Pa kasita kano Leza wacisile ulayo uu, Abulaamu atakweti ana.

⁶ Vii avino Leza wavwanzile kunoli ati, ‘Amu mupanda wako yalikala mu mpanga ya inamasi, kuno yalaya azya, nu kuzunyiwa myaka imyanda ini.

⁷ Lelo ndaleta upinguzi pa antu yano yalaombela, na pacisila cakwe cii yalafuma mu mpanga ilya nu kumpepa mu cifulo cii.’

⁸ Lyene Leza wapangine na Abulaamu cipangano ca kusilamulwa kuti ciye icilangililo ca upangano. Caleka Abulaamu wasilamwile Isaki lino papisile umulungu onga kufuma lino wavilwe. Isaki wasilamwile Yakobo mwana wakwe, na Yakobo nawe wasilamwile ana yakwe ikumi na yaili, vikolwe vitu.

⁹ “Ana yakwe Yakobo yali nu uzuwa pa mwina wao Yosefu, yamukazya kuya umuzya ku mpanga ya Eguputo. Lelo Leza wali nawe,

¹⁰ nu kumupususya mu macuzi yakwe onsi. Wamupile amano nu kutemwikwa ku cinso cakwe Falao, mwene wa Eguputo, pano lino Falao wamuweni amucita kuti aye mulasi wa mpanga ya Eguputo nu kuya cinda wa vyakwi sano.

¹¹ Lyene kwali cipowe mu mpanga ya Eguputo yonsi nu mu mpanga ya Kenani, icileta ucuzi ukulu cuze. Kutali kwakuti vikolwe vitu vingazana vyakulya,

¹² nga lino Yakobo uvwile ukuti ku Eguputo kwali ngano, atuma ana yakwe, vikolwe vitu, ukuya ku Eguputo. Luu, lwali ulwendo lwao lwakutandika.

¹³ Apa lwendo lwakwe ciili, Yosefu waisokolwile ku ina yakwe, nu mwene uwamu Eguputo amanya akazi kakwe.

¹⁴ Caleka Yosefu watumile mazwi kuli Isi Yakobo, kumunena pamwi na akazi kakwe onsi, kuti iize ku Eguputo. Onsi pamwi yali makumi cinimbali na yasano.

¹⁵ “Lyene Yakobo waile ku Eguputo, kuko kuno wene pamwi na ana yakwe yafwilile.

¹⁶ Vyala vyao vyasenzilwe ku Syekemu, kuno vyazisilwe mwi lindi lino Abulaamu wakazile ni mpiya ku antu amu mutundu wa Hamoli.

¹⁷ “Lino insita yapalime iyakuti Leza afikilizye ulayo uno wacisile kuli Abulaamu, impendwa ya antu itu ali mu Eguputo ikulilako cuze.

¹⁸ Lyene pacisila umwene wino atamanyile Yosefu aliwe ateeka mu Eguputo.

¹⁹ Wene wali nu usomvi pa antu itu, nupya wali nu uluku kunoyali, nu kuyapatikizya kuti yasumba utwana twao kuti twafwa.

²⁰ “Yali ili nsita ino Mose wavilwe, mwana muyembe cuze. Nyina wamulezile ukwakwe pa myezi itatu sile.

²¹ Walanga wasumbwa, mwana Falao, kaci, amutola nu kumukuzya kwati umwana wakwe.

²² Lyene Mose wasambiliziwe mano yonsi amu Eguputo, aya na maka mu kuvwanga nu mu vicitwa.

²³ “Lino Mose waya ni myaka makumi yani ciza ku mano kuti atale katandalile amu luko lwakwe, aina Izlaeli.

²⁴ Lyene alola mwina Eguputo umwi akucuzya umwina Izlaeli. Caleka aya amutaasya, acita cilanduzi akoma mwina Eguputo. (

²⁵ Mose welenganyanga ukuti amu luko lwakwe yamailuka vino Leza watamutuma kwiza yakulula. Lelo yene yatilwike.)

²⁶ Uwanda walondelela alola a Izlaeli yaili yakulwa, aezya kuyataasya avwanga ati, ‘Mwe antu mwe, uvwini. Mwemwe ina! Uzye lyene pacani mukulwisyanya?’

²⁷ Lelo wiyo wino umanga umuze asunka Mose ku mbali, amunena ati, ‘Uzye aweni uwakucita kuya intunguluzi na kapingula panotuli?’

²⁸ ‘Uzye ukulonda kuti unkome wakwe vino wakomile umwina Eguputo mutondo?’”

²⁹ Lino Mose uvwa cii, autuka afuma mu Eguputo, aya aikala ku mpanga ya Midyani. Kuno yamuvyalile ana yaili aonsi.

³⁰ “Pacisila ca myaka makumi yani, mungeli aloleka kuli Mose mu cimbilimbili ca moto mu cimpuza mu lwanga, mu pipi nu Mwamba wa Sinai.

³¹ Mose azunguka pali cino walola, nga apalama pipi kuti alolekesye. Lelo auvwa izwi lya Mwene likuti,

³² ‘Nene Leza wa vikolwe vyako, Leza wakwe Abulaamu, Isaki, na Yakobo.’ Mose auvwa intete azakaza, nga ataposizye kuti alolekesye.

³³ Mwene amunena ati, ‘Zula indyatu zyako, pano papo pano uimi apa muzilo.

³⁴ Nati ndola kucula kwa antu yane mu Eguputo. Nati nuvwa kulila kwao kwa kuilizyanya. Caleka nati niza kuti njakulule. Lyene iza, kuti nkutume ku Eguputo.’

³⁵ “Mose ali wino aina Izlaeli yakanyile lino yavwanzile yati, ‘Uzye aweni uwakucita kuya intunguluzi na kapingula panotuli?’ Wene ali wino Leza watumile ku kutungulula antu nu kuyakulula kufuma mu uzya nu wamwazwanga u mungeli wino uwalolike kunoli mu cimpuza icapyanga.

³⁶ “Watungulwile antu kufuma mu Eguputo, ala akucita vinjelengwe ni vizungusyo mu Eguputo na pali Yemba Muyenzu nga nu mulwanga pa myaka makumi yani.

³⁷ Mose uwanenyile aina Izlaeli ati, ‘Leza alamutumila Kasema, wakwe vino wantuma, alaya uwa muli mwemwe kwene.’

³⁸ Mose kwene wii uwali na aina Izlaeli lino yakongine mu lwanga, nupya uwali ni vikolwe vitu pamwi nu mungeli uwavwanzile nawe pa Mwamba wa Sinai. Wene uwapokelile na mazwi akapeela umi kuti atupele.

³⁹ “Lelo vikolwe vitu vikana kumuyela. Vyamukankile ku mbali vyelenganya ukuti cange cizipe kuswilila ku Eguputo.

⁴⁰ Caleka vinena Aaloni viti, ‘Tupangile yaleza akuti yatutungulula. Tutamanyile cati cicitika ku muntu wilya Mose, uwatutungulwile kufuma mu Eguputo.’

⁴¹ Lyene yapanga akaluwi mu musango wakwe cipambasi wa ng'ombe, yapela impolelwa kuno kali, nga yacita ni cimulo cakuzevya milimo yaku makasa yao.

⁴² Lelo Leza nawe afwitoka ayafutatila, aleka kuti yatumikila intanda zya mwiyulu, wakwe vino icalembwa mu lupapulo lwakwe yakasema cikati, ‘Mwe ina Izlaeli! Asi kuli nene kuno mwaletanga impolelwa zya nyama zino mwakomanga mu lwanga, pa myaka makumi yani.

⁴³ Lyali itaalu lyakwe Moloki leza winu alino mwasendanga, nga nu lutanda lwakwe Lefani leza winu. Yaa yaili yali utuluwi tuno mwapanzile nu kutupepa. Caleka nani ndaleka yamusende kutali ukucila musumba wa Babiloni.’

⁴⁴ “Ivikolwe vitu vyali ni Taalu lya kulanga vino Leza wali nao mu lwanga. Lyapanzilwe wakwe vino Leza wanenyile Mose kulipanga, kulingana na vino Mose yamulanzile mu cilolwa.

⁴⁵ Lyene pacisila vikolwe visya itaalu ku ana yakwevyo, nga nao yalisenda lino yapisile na Yoswa nu kupoka mpanga ya inamasi yano Leza wazinzile pa manso yao. Nalyo lyali papa kwene kufika na pa nsita yakwe Davidi.

⁴⁶ Davidi wakunzilwe na Leza nga auzya Leza kuti amuzumilizye kukuula ng'anda yakwe Leza wakwe Yakobo.

⁴⁷ Lelo Solomoni uwamukulile ing'anda.

⁴⁸ “Nanti cingaya vi Leza wapapelapela asiikala mu mang'anda akulwa na antu, wakwe vino kasema wavwanzile ati,

⁴⁹ ‘Umwene wati, Iyulu cili cilimba cane, ni insi cili cilimba ca ngazo zyane. Uzye lyene ing'anda ya musango ci ino mulankulila? Nanti uzye cifulo cane umwakupuzila cili kwi?

⁵⁰ Uzye asi nene nacisile vyonsi vii nemwisikulu?’

⁵¹ Sitivini atwalilila kuyanena ati, “Mwe antu akoma myenzo mwe! Mutamanya Leza! Mwe yankoma matwi mwe. Mukoline ni vikolwe vinu kwene: namwe kwene mukukanya u Mupasi Wamuzilo lyonsi!

⁵² Uzye kwali kasema umwi wino vikolwe vinu vitazunyizye? Awe! Vyakomile inkombe, izyasowile ukwiza kwa muomvi wakwe mololoke wiya. Ndakai mwamukoopela ku anisi yakwe yamukoma.

⁵³ Amwemwe mwapokelile masunde yakwe Leza lino angeli yalesile, lelo mwakana ukuyayela.”

Ayuda yatama Sitivini na mawe

⁵⁴ Lino inkombe zya mwi Tengo zyuvwa kuli Sitivini, zikalipa cuze zilumanya incecete ku ukali.

⁵⁵ Lelo Sitivini, uwazuziwe na Mupasi Wamuzilo, alingamila kwiyulu nga alola lulumbi lwakwe Leza, na Yesu ala aimi kwi kasa lilunji lyakwe Leza!

⁵⁶ Ayanena ati, “Lolini! Nalola iyulu ililekuka nu Mwana wa Muntu aimi kwi kasa lilunji lyakwe Leza!”

⁵⁷ Alino yaweleketa, ala iyacilika makutwi yao. Lyene yonsi yasimwila pamwi kunoli,

⁵⁸ yamufumizya kunzi ya musumba, nga yamutama na mawe. Yakambone yasya makoti yao ku mulumendo umwi izina a Saulo.

⁵⁹ Alino yatwalilila kutama Sitivini na mawe. Ala akulenga Umwene ati, “Mwene Yesu, pokelela mupasi wane!”

⁶⁰ Alino afukama pansi asazinka izwi likulu ati, “Mwene! Utayapeela mulandu pi ifyo lii.” Walanga wavwanga vii, afwa.