Milimo 26 - Amazwi Yakwe Leza 2013

¹ Agilipa anena Paulo ati, “Uli nu lusa lwakuivwangila.” Paulo aololola ikasa lyakwe aitaasya umwisikulu ati,

² “Mwene Agilipa, nemo nkwelenganya vino ilelo nasyuka kuti njivwangile panuli pali vyonsi vino Ayuda yakundongwela.

³ Pano wemo umanyile ningo ntambi ni vikanza vyonsi vya Ayuda. Caleka nakupapata kuti unguvwe nu kutekela.

⁴ “Ayuda yonsi yamanya vino nikala ukutandika ku wance wane. Yamanya na vino umi wane waya, inkolelo mu mpanga ya kumwitu nga nu mu Yelusalemu.

⁵ Yene lyonsi yamanya, ndi yakasi kupeela umboni, kufuma ku kutandika mu umi wane onsi nikala wa Mufaliseo inkonko.

⁶ Acino ndakai nimilila nu kupingulwa pamulandu wa upaalilo uno nakwata mu ulayo uno Leza wacisile ku vikolwe vitu,

⁷ ulayo kwene uno mitundu itu yonsi ikumi na iili, ino ikatumikila Leza ikapaalila kupokelela lino ikupepa usiku nu musanya. Pamulandu wa upaalilo kwene uu, we Mwene wa kwisaci, auno Ayuda yakundongwelapo!

⁸ Uzye lyene pacani mwemo mwacizana icitale kutaila ukuti Leza angazyukula antu kufuma ku afwe?

⁹ “Lelo nani nelenginye ukuti, indi nukwezya na maka yane yonsi ukulwisya izina lyakwe Yesu uwaku Nazaleti.

¹⁰ Nu kucita avino nacitanga mu Yelusalemu. Nayanga nkulenga maka kuli yasimapepo akalamba akuyalila antu yakwe Leza aingi mu mang'anda yaminyololo. Na lino yapingwilwanga ukufwa, nani nazumilizyangako.

¹¹ “Nupya maila aingi mu mang'anda ya mapepo nayazunyanga, kwezya kuti yafutatile utailo wao. Alino pano ukali wane walusya, lyene nayalondelelanga nu mu misumba yamu mpanga zyuze, ku kuyazunya.

Paulo walondolwela Agilipa ukuzenzuka kwakwe

¹² “Wali uli mulandu kwene uno nayanga ku Damasiko ala indi na maka nga ni nsambu kufuma kuli yasimapepo akalamba.

¹³ Cali mu nzila, Mwene wa kwisaci, lino ilanzi lyafika umutwe papela indola luswepo luyengese kuluta ilanzi lufuma mwi yulu, lunzinguluka pamwi na yano twali nao.

¹⁴ Swensi tupona pansi, alino nuvwa izwi mu Ciyebulai liti kunondi, ‘Saulo, Saulo! Pacani ukunzunya? Ala ukundwisya uwalanganyi.’

¹⁵ Alino nani inuzya inti, ‘Wewe weni Mwene?’ Nawe Mwene aasuka ati, ‘Anene Yesu, wino ukuzunya.

¹⁶ Lelo katuka, imilila. Nati ndoleka kunuli kuti nkusole uye muomvi wane. Uli nu kupeela umboni kuli yauze pali vino walola na vino ndakulanga pacisila.

¹⁷ Ndakupususya ku antu amu mutundu wako nu ku Akulukuwa, yao yano ndakutumako.

¹⁸ Uli nu kuyayula amanso, kuti yafume mu kanda iize ku luswepo, na kuti yafume mu maka yakwe Ciwa iize kuli Leza, na kuti maifyo yao yelelwe kupitila mu utailo wao munondi, nga yapokelele cifulo pamwi na antu yano Leza wasola ukuti yaye akwakwe.’

Paulo wavwanga ivya mulimo wakwe

¹⁹ “Acino mwene Agilipa, ntakanyile kuyela icilolwa cino Leza wandanzile kufuma kwiyulu.

²⁰ Kutandikila mu Damasiko nu kwiza mu Yelusalemu nga nu mu mpanga yonsi ya Yudeya nga ni ya Akulukuwa, nakosozile ukuti yalinzile kuzenzuka yataile muli Leza, nu kucita ivintu ivyakulanga ukuti yati yazenzuka.

²¹ Uli mulandu uno Ayuda yandemilepo lino nali mu Ng'anda ikulu yakwe Leza, nga yezizye kunkoma.

²² Lelo Leza wangazwa kufika ni lelo kwene. Acino njimi pano kuti mpeele umboni pa manso ya antu onsi, apina na akama. Cino nkavwanga icili cimwi kwene na cino yakasema pamwi na Mose yavwanzile ukuti cili nu kucitika.

²³ Yavwanzile ukuti Klistu, Katuula uwalavilwe alinzile kucula nu kuya uwankolelo kuzyukuka kufuma ku mfwa, kuti alete luswepo lwa ufyusi ku Ayuda nu ku Akulukuwa.”

²⁴ Lino Paulo atali kuti amale kuitaasya ndi vii, Fesito asanzika izwi ati, “Paulo, siwapena! Kusambilila kwako kukulu kumakupenya.”

²⁵ Paulo amunena ati, “Ntapena, Mwene wakwisaci! Nkuvwanga icumi icipuma.

²⁶ Mwene Agilipa! Ningavwanga kunuli nu kupama, pano umanyile vintu vii. Nati nsininkizya ukuti pasi cimwi cino utamanyile, pano vintu vitacitikile mu umfisolo.

²⁷ Mwene Agilipa, uzye wataila vyavwanzile yakasema? Imanyile vino wataila!”

²⁸ Agilipa auzya Paulo ati, “Uzye ukwelenganya ungampindulula kuti inje mwina Klistu mu kasita kwene kaa kanono?”

²⁹ Paulo aasuka ati, “Nanti pa kasita kanono nanti nsita ntali, ipepo lyane kuli Leza ilyakuti wewe na yao yonsi asyala, mwe muno mu kuuvwa kunondi ilelo mungaya wakwe vino indi, suka sile kuntanyepwa mu minyololo ii!”

³⁰ Lyene umwene, umulasi, Benise, nayauze onsi yakatuka,

³¹ nga pacisila lino yafumanga yavwanzyanya yati, “Muntu wii atacisile nanti cimwi icakuti angafwila nanti kusumbwa mu ng'anda yaminyololo.”

³² Alino Agilipa anena Fesito ati, “Muntu wii akana kutwala mulandu wakwe ku mwene Kesa, wange asapulwe.”