Milimo 18 - Amazwi Yakwe Leza 2013

¹ Pacisila ca vintu vii, Paulo afuma ku Atena aya ku Kolinto.

² Kuku aya azanako Muyuda wino izina lyakwe a Akwila uwavyalilwe mu Ponto ala wacifuma ku Italya nu muci wakwe Pulisila. Yafumileko lino Kalaudio kateeka waku Loma umile imbila kuti Ayuda yonsi yafume mu Loma. Paulo apita ukuya yalola,

³ aya aikala nao yaombela pamwi pano imilimo yao yali ikolane na yakwe Paulo. Yene yali yakasuma ya mataalu.

⁴ Cila Sabata wayanga ku ng'anda ya mapepo ala akwezya kutonsya Ayuda na Agiliki kuti yazumile.

⁵ Lino Sailasi na Timoti yafisile kufuma ku Makedoniya, Paulo wasumvile nsita yonsi mu kukosola ilandwe lya Mwene, ala akunena Ayuda ukuti Yesu ali Klistu.

⁶ Lino yamukana nu kulanda viipe pali aliwe, wene akunta lukungu ku vizwalo vyakwe kuti ayalange vino wapaluka kunoyali, nga ayanena ati, “Ndi mwalowa, ale umulandu winu mweisikulu! Usi mulandu wane. Ukufuma ndakai namaya ku Akulukuwa.”

⁷ Caleka afumako ayasya aya aikala mu ng'anda ya muntu umwi Mukulukuwa zina lyakwe a Tito Yusito, uwapepanga Leza. Ing'anda yakwe yali pipi ni ng'anda ya mapepo.

⁸ Kilisipa, intunguluzi ikalamba yamu ng'anda ya mapepo wataile mu Mwene, pali pamwi na amu ng'anda yakwe onsi. Antu aingi yauze amu Kolinto yano auvwile ilandwe yataila, nga yawatiziwa.

⁹ Usiku umwi Mwene aloleka kuli Paulo mu cilolwa, nga amunena ati, “Utuvwa intete, lelo twalilila nu kuvwanga, utata,

¹⁰ pano indi nawe. Kusi umwi ali na maka ya kukucisa, pano aingi mu musumba uu, antu yane.”

¹¹ Caleka aikalako mwaka ni myezi mutanda, ala akusambilizya antu mazwi yakwe Leza.

Ayuda yatwala Paulo ku cilye cakwe Galio

¹² Lino Galio wali mulasi uwaku Akaya, Ayuda yonsi pamwi yakatukila Paulo, yamulema yamutwala ku cilye,

¹³ yavwanga yati, “Umuntu wii, akwezya kunena antu ukuti yapepa Leza mu musango utalingine ni sunde!”

¹⁴ Lelo lino Paulo atali kuti avwange Galio anena Ayuda ati, “Ndi pali umulandu umwi nanti kuluvyanya kuno mwazana mu muntu wii, cingaya ica mano kuli nene ukuti intekele nuvwe kuno muli mwe Ayuda.

¹⁵ Lelo apakuti cili sile pa kupazyanya pa mazwi, mazina ni sunde linu, mwemwe mweisikulu mulinzile kupingula. Nemo ntakasi kuya kapingula wa mazwi ya musango ndi uu! Nakana.”

¹⁶ Alino ayazinga mu cilye.

¹⁷ Onsi yalema Sositeni, intunguluzi ikalamba yamu ng'anda ya mapepo, yamumila pa mulyango wa cilye. Lelo cico citasakamike Galio nanti panono.

Paulo waswilila ku Antioki

¹⁸ Paulo watenzi na ina Klistu amanda aingi mu Kolinto, lyene ayapakasya, apatama mu wato pamwi na Pulisila na Akwila, nga yaya ku Silya. Lino yatali yapatame mu wato pa Kenkelea Paulo apela lukuzu kulingana nu mulapo uno walafile kuli Leza.

¹⁹ Lino yafika mu Efeso, Paulo asya Pulisila na Akwila. Alino aingila mu ng'anda ya mapepo nga apazyanya na Ayuda.

²⁰ Antu yamulenga kuti aikale nao pa nsita ntali, lelo atazumile.

²¹ Apa kupita lino akuyapakasya, ayanena ati, “Ndawela nupya kunomuli, ndi Leza akasi.” Alino apatama mu wato, afuma ku Efeso.

²² Lino wafika ku Kesaliya, aya ku Yelusalemu ku kulamuka iuvi, nga pacisila aya ku Antioki.

²³ Pacisila ca kwikala kweneko pa nsita imwi, afumako, aya ku mpanga ya Galatiya nga na Fulugiya. Ala akukomelezya yonsi ataile.

²⁴ Muyuda umwi, wi zina lyakwe Apolo, uwavyalilwe ku musumba wa Alekizandilya aiiza ku Efeso. Wali mucenjele mu kuvwanga nupya wamanyikisye na malembelo.

²⁵ Muntu wii wasambiliziwe pamulandu wa nzila ya Mwene, nupya wali umukampuke mu kukosola ala akusambilizya ningo ivisinka vya pali Yesu. Lelo, nanti cali vivyo, wamanyile sile uluwatizyo lwakwe Yoane.

²⁶ Watandike ukuvwanga nu kupama mu ng'anda yamapepo. Lino Pulisila na Akwila yamuvwa, yamusenda ku ng'anda kumwao yamulondolwela ningo ivya nzila yakwe Leza.

²⁷ Lino Apolo watemwa kuya ku Akaya, aina amu Efeso yamukomelezya yalemba na kalata ku ina aku Akaya, yayanena kuti yakamuzengele. Lino wafisileko, wali akazwa mukalamba kuli yano ataile Klistu kupitila mu cikuku cakwe Leza.

²⁸ Wene wapazyanyanga na Ayuda mu mivwangile pa manso ya antu, ala akuyasinila mu malembelo vino Yesu a Klistu.