Mateo 19 - Amazwi Yakwe Leza 2013

Yesu wasambilizya pamulandu wa kutaana

¹ Lino Yesu wamala kuvwanga vintu vii afuma ku Galile aya ku mpanga ya Yudeya, ku mbalama yuze ya luzi lwa Yodani.

² Alino maumba akulu cuze yamulondela, nga nawe apozya alwale ali kweneko.

³ Lyene Afaliseo yamwi iiza kunoli yamwezya yati, “Uzye ciine na Masunde kuti umuntu angata umuci wakwe pamulandu uli onsi?”

⁴ Yesu nawe aasuka ati, “Uzye mutawelenga vino pa utandiko Leza wayaumvile umonsi nu mwanaci?

⁵ Nupya wavwanzile ati, ‘Pamulandu ukwene, umonsi alasya isi na nyina nu kuilundanya ku muci wakwe. Lyene oili yalaya umwili onga.’

⁶ Acino yatacili yaili, lelo umwili onga. Caleka kusi umuntu angalekanya cino Leza watalundanya.”

⁷ Nao yamuzya yati, “Uzye lyene pacani Mose wazumilizye umonsi kupeela umuci wakwe kalata wa kutaana?”

⁸ Yesu nawe aasuka ati, “Mose wazumilizye kuti mwataana na aci inu pamulandu wa kukoma kwa myenzo inu. Lelo pa utandiko wa uumbo citali vivyo.

⁹ Namunena vino umuntu wensi uwata umuci wakwe, suka sile ndi wamulemula, ndi watwala mwanaci muze, ala walongozya.”

¹⁰ Alondezi nao yavwanga yati, “Ndi cakuti uu, uli mulandu sile uno umonsi angata umuci wakwe, ale lyene cingazipisya kuntatwala.”

¹¹ Yesu nawe ayanena ati, “Asi muntu ali wensi anguvwikisya usambilizyo uu, suka sile yao yano Leza wapela maka akwiluka vino ukusenula.

¹² Pano yamwi yatangatwala pano avino yavilwe. Pali yamwi nao atangatwala pano avino antu yayacita. Nga pali yauze aipingula aisikulu ukukana twala pakuti yaombela Leza. Na wiyo angatemwa kuvwa usambilizyo uu, lekini auvwikisye.”

Yesu wapolelela ana anono

¹³ Alino antu yamwi yamuletela ana anono kuti aiikepo makasa yakwe nu kuyapepelela. Lelo alondezi yakalipila antu yao ayalesile.

¹⁴ Lyene Yesu ayanena ati, “Lekini ana anono iize kunondi, mutayalesya, pano Uwene wa mwiyulu uwakwe yao ali ndi yaa.”

¹⁵ Lyene pacisila lino wika makasa yakwe panoyali, afuma kweneko apita.

Mulumendo mukama

¹⁶ Muntu umwi mulumendo aiiza kuli Yesu amuuzya ati, “Kasambilizya, uzye cisuma icani cino ndinzile kucita kuti mpokelele umi wape?”

¹⁷ “Yesu nawe amwaasuka ati, ‘Uzye pacani wanguzya pamulandu ni cisuma? Leza, wenga sile aliwe umusuma. Lelo ndu kasi kuti Leza akupeele umi wape, wayela masunde yakwe.’

¹⁸ “Nawe amuuzya ati, ‘Uzye masunde cii?’ Yesu amwaasuka ati, ‘Utakoma, utalongozya, utaiya, utatumpwila umuzo,’

¹⁹ wacindika so na nyoko, nga nu kutemwa umuzo vino nawe waitemwa.”

²⁰ Muntu amunena ati, “Nkayela masunde yaa onsi. Uzye icani cuze cino nulizya?”

²¹ Yesu nawe amunena ati, “Ndu kasi ukuya mufumaluke, yanga kakazye vino wakwata ukapeele ni mpiya zino ulazana ku apina. Lyene ulaya ni vyuma mwiyulu, nga wize undondele.”

²² Lino mulumendo uvwa cii, aya nu ulanda nga apita akungumile, pano wali umukama cuze.

²³ Lyene Yesu anena alondezi yakwe ati, “Cumi namunena vino cilatalila mukama kwingila mu Wene wa mwiyulu.

²⁴ Nupya namunena vino cangupalila ingamila kupuzya mwi linso lya nsindano, kuluta mukama ukwingila mu Wene wakwe Leza.”

²⁵ Lino alondezi yuvwa cii, yazunguka cuze yuzya yati, “Uzye lyene aweni angatuulwa?”

²⁶ Yesu ayalolekesya ayanena ati, “Ku antu citangacitika, lelo kuli Leza vintu vyonsi vingacitika.”

²⁷ Lyene Petulo avwanga ati, “Lola! Swemo twasya vyonsi nu kukulondela. Uzye lyene tulapelwa cilambu cii?”

²⁸ Yesu nawe ayanena ati, “Cumi namunena vino mu manda akwiza, mu nsi ipya, Mwana wa Muntu alikala pa cilimba cakwe ca wene ca lulumbi. Namwe kwene mwe muno mukamulondela, mulikala pa vilimba ikumi na viili vya wene nu kupingula inko zya Izlaeli ikumi na ziili.

²⁹ Na wensi uwasya mang'anda yakwe, aina aonsi, yakaci yakwe, isi, nyina, ana nanti vyalo pamulandu wane, wene alapokelela ivingi kuluta pali vino wasya, nga nu umi wape.

³⁰ Lelo antu aingi ali ankolelo ndakai yalaya acisila nga na ingi ali acisila yalaya ankolelo.