Masamu 84 - Amazwi Yakwe Leza 2013

Ulwimbo lwakulukisya Ng'anda yakwe Leza

¹ Iye mwe vino natemwisya isano lyako, we Yawe Wamaka yonsi! Pasi paciluka, ica misolo ya kwisano lyako.

² Umwenzo wane wati ufwa sile uku ciluka cako! Pasi paciluka ica misolo ya kwisano lyako, we Yawe nkukwimbila nu luzango lonsi we Leza wa umi.

³ Tuncelelya twailukila icinsanzo na kamimbi nako kaimatila ing'anda iyakusungilamo utwana, apa kavuwa kako, we Yawe Leza Wamaka yonsi, Mwene wane na Leza wane.

⁴ Alongo antu yano yikala umu ng'anda yako, akakulumbanya insita yonsi.

⁵ Alongo antu yano amaka yao yasintilila kunuli, yao akaika amano ukwiza tumbela umwamba Zioni.

⁶ Lino yene yakupita umu Cifoloma cakwe Baka, icilangoke, icume ndii, icifoloma cikasanguka tufukoka twa manzi, ungati amumu muno mukamela icili consi imvula nga yowoka.

⁷ Amaka yao yakavulila kweneko iyasuka iyafika nuku Zioni ukukulolekela kuli Leza wakwe yaleza.

⁸ We Yawe Leza Wamaka yonsi, uvwa ipepo lyane, nkutika we Leza wakwe Yakobo!

⁹ Lolekesya apa mwene witu, akatuvwangila kweneko, polelela umwene wa mpanga itu, wino wasolola we mweneco ukuti atuteeka.

¹⁰ Ukwikala wanda onga umwi sano lyako kwaluta amanda izimbi lyonga ukwikala kuze. Nupya ukwikala pa mulyango wa ng'anda yako we Leza, kwazipisya penepo ukucila ukwikala umu mang'anda ya antu aipe.

¹¹ Pano wemo we Yawe Leza, awewe tukazina mwenemo nupya wewe uli kavwangila witu. Watukwatila inkumbu nu kucindamika, ukatucindamika. We Yawe, usitwima ivisuma sweswe swe antu yako, swe ya miyele isuma.

¹² We Yawe Leza Wamaka yonsi, icacumi yasyuka yayo akutaila!