Mapinda 28 - Amazwi Yakwe Leza 2013

Umuntu umusuma nu mwipe umwenzo

¹ Umuntu mwipe akapuuka, ala pasi na akumuzinganya. Umuntu musuma wene wapama wakwe cisama.

² Uyi wa muntu wa lukang'ansi ukakatusya ivikanza. Umuntu wa mano awino akaiza avifusya.

³ Umuntu mwipe akacuzya umulanda, imvula ya ononyi nayo ikaonona ivyakulya.

⁴ Wiyo akatazyela amasunde waya uku lusansa lwa antu aipe. Lelo wiyo akalondela amasunde akayakanya.

⁵ Antu akaifya yasitezya ivya ulungami. Lelo yayo akaopa Yawe alio yakatezya vyonsi.

⁶ Umulanda uwa miyele isuma wene waluta umukama uwa miyele iipe.

⁷ Umwana umwiluke ali wino akawaka amasunde, lelo wiyo akapita na antu apunuke akaletela isi insonyi.

⁸ Wiyo akasandulula ivyuma vyakwe umu kuomvya ulufyengo, ulwakulila auze mu vintu vino walonka, alavilonkela umuntu muze, nawe akavipeele nu ku alanda.

⁹ Ndi umwi akakana ukuvwa isunde, ni pepo lyakwe kwene lyapatwa.

¹⁰ Wiyo akalanga antu aololoke imiyele iipe, alaponela umu ucinga wakwe umweneco kwene, lelo akaele alio yalakwata icaupyanyi icisuma.

¹¹ Uwa vyuma angaitunga ukuya uwa mano, lelo umupina umucenjele angamumanya.

¹² Asuma ndi cakuti yacimvya, kukaya uluzango ulukalamba. Aipe ndi ayano yacindamikwa, antu yakafisama.

¹³ Wiyo akafisa amaifyo yakwe atalaya nu longo foo. Lelo wiyo akailongwela amaifyo nu kuzenzuka, akaelelwa uluse.

¹⁴ Wiyo akaopa Yawe insita zyonsi uwa longo. Lelo wiyo akaumalala umwenzo, alaponela umu ntazi.

¹⁵ Umwene mwipe wino akateeka alanda, akoline na cisama aakung'anza, nupya wa cilyanyi icili ni nzala, icakolana ni cuuli.

¹⁶ Intunguluzi iyaula amano, yakwatisya ulufyengo. Lelo ino yakwata ufumacumi, ilateeka pa nsita ntali.

¹⁷ Umuntu wino yakalondelezya apa utazi wa katwe, alaya imbutusi mpaka ni mfwa yakwe. Nupya kutakaye umuntu nanti umwi uwakumulesya.

¹⁸ Wiyo uwakaele alapusuka, lelo wiyo akatelengana pakasi ka nzila zili, alaponela pansi muli yonga.

¹⁹ Wiyo akalima umusili wakwe alakwata ivyakulya ivingi. Lelo wiyo akalondelela ivya uwelewele alaya nu ulanda ukalamba.

²⁰ Umuntu umutailwe alapolelelwa apakalamba. Lelo wiyo akakalauka umukulonka ivyuma yalamupezya.

²¹ Umuncizyanya waipa. Lelo kwene antu yangifya apamulandu wakulondesya amafukakanwa.

²² Amanso yamakumbukila yakalondelela ivyuma, ukwaula nu kumanya ukuti upina ulayalondelela.

²³ Wiyo akakalipila auze, yalamutemwa wakwe cimwi apacisila, ukuluta vino yangatemwa icipondo.

²⁴ Umuntu akaiya ivyakwe isi nanti nyina, avwanga ukuti asi iifyo, wiyo kwene ali muze wa cipondo.

²⁵ Umuntu uwalwiswa akakatusya ulwete. Wiyo akataila muli Yawe alaya nu longo.

²⁶ Wiyo uwataila umu mano yakwe umweneco, wene iciwelewele. Lelo wiyo akalondela ivya antu yamano, alapusuka.

²⁷ Wiyo akapeela ivintu ku apina, atalulilwa akantu, awe. Lelo wiyo alakana ukuyalolekesyapo, antu avule yalamutipa.

²⁸ Antu aipe myenzo ndi yacindamikwa, antu yakafisama. Lelo ndi cakuti yalowa, asuma yakasanduluka.