Mapinda 2 - Amazwi Yakwe Leza 2013

Usuma wa mano

¹ Mwanane, uwasambilila vino nkukunena. Utezya uwailila vino nkukukonkomezya ukucita.

² Uwateya amatwi ku mano nu kwezya ukwiluka.

³ Uwalenga ukwiluka nu kupapatila ukucenjela.

⁴ Uwavilondelela kuno vili kwati a siluva nanti icuma cimwi cino yafisa.

⁵ Ndi wacita vivyo, lyene uliluuka ukoopa Yawe vino kwaya, nu kuzana vino ukumanya Leza kwaya.

⁶ Pano Yawe aliwe akapeela amano, aliwe kwene ali ntulo ya kumanya nu kwiluka

⁷ Wene akaazwilizya antu akacita vyaololoke nupya acumi nu kuyacingilila.

⁸ Akawaka inzila zya aololoke nu kucingilila yao ataila munoli.

⁹ Wemo ndi cakuti umanguvwila, umamanyanga ivintu ivisuma, ivilungame, ivyampomvu. Umamanyanga navino uli nu kucita.

¹⁰ Pano umakwatisyanga amano, nu kusansamuka, umasansamukanga apa mano yako.

¹¹ Ukucenjela kwako kulakulinda nu kwiluka kwako kulakusunga.

¹² Nupya ali vino vilakufuntusya uku misango iipe, nu ku antu angaleta icimvulunganya mu mivwangile yao,

¹³ yayo akatazyela imikalile yampomvu apakuti yasyale sile yakupita umu misango yawinyi,

¹⁴ yayo akazangila umu kucita iviipe, nu kusekelela lino yacita cimwi ica muselu.

¹⁵ Inzila zyao izya ucenjezi, zino umuntu nanti umwi atange ataile foo.

¹⁶ Amano ndi yiza munuli ali yano yamakufuntusyanga uku ntalanganyi ya mwanaci ali wensi, angiza kunuli na mazwi akukulyongofya,

¹⁷ umwanaci wiyo atafukila iya, akailila cipangano cino wapangine na Leza.

¹⁸ Pasi pano wensi akaya uku ng'anda yakwe, ale akulowa. Ukuya ukwakwe, ali kupalamila uku mpanga ya afwe.

¹⁹ Apa onsi yonsi yano yakaya ukwakwe, pataya nanti wenga uwawela kweneko. Pasi nanti wenga akawela umu nzila iya umi.

²⁰ Ali cino fwandi mwanane, uwakolanya imisango ya antu asuma, uwakwata ni mikalile isuma.

²¹ Pano antu asuma, akaele, ali yano yalikala muno nsi, akaele ali yano yalakwata mwenemo icifulo cao.

²² Alino antu aipe yene Leza alayafumya umu mpanga, nupya alafumyamo yakaifya ndi vino antu yakaipula ivikona mu calo.