Mapinda 12 - Amazwi Yakwe Leza 2013

¹ Umuntu uwatemwa malango wene akalondesya ukumanya ivintu vya mano, lelo uwapata ukusundwa wene watumpa

² Umuntu musuma akazana utandano na Leza, lelo wiyo wino umwenzo wakwe waalukila iviipe, Yawe alamupeela umulandu.

³ Umuntu asiulwa kuteletenta apakucita iifyo, lelo umufula wakwe yakacita ya vyaololoke wazyansya ndi.

⁴ Umwanaci musuma, wikala wa cilongwe ciyembe, kuli iya, lelo umwanaci akauvwisya iya insonyi, wene waya wa cilonda ca ufila kuli iya.

⁵ Amelengwe ya muntu musuma yaya alungamane, lelo amelengwe ya muntu mwipe yene antumpu.

⁶ Amazwi ya muntu mwipe yakakomesya, lelo amazwi ya muntu musuma yakatuula antu.

⁷ Antu ya myenzo iipe yakafumiziwapo nu kwililika, lelo ang'anda yakwe yano akauvwila Leza yene yatalasansantika.

⁸ Umuntu yakamutaizya pamulandu na mano yakwe, lelo uwa mwenzo waciwelewele wene akazewana.

⁹ Umuntu wa mano akaiombela incito, nu kuilondela iposo pakuti aikala ningo, lelo uwacilumba wene akaitakizya na lino uulilwa cakulya.

¹⁰ Umuntu akacita vyaololoke akasakamala umi wa viteekwa vyakwe, lelo umunkalwe wene atavikwatila uluse, awe.

¹¹ Wiyo akaomba umu calo cakwe nu muzonda akazana ivyakulya ivingi, lelo muselela kukaye wene atakwata amano.

¹² Ing'anda isuma yi lali ikaononeka uku aipe, lelo umufula wa muntu musuma usitengana.

¹³ Umuntu mwipe akailetelela umwisikulu ni vitakwa vyakwe, lelo umuntu kacita wa visuma akaifuntusya uku viipe vyonsi.

¹⁴ Umuntu akavwanga ningo uku antu wene akapokelela ivisuma ivivule, ni milimo ino umuntu akaiombela ikalenga kuti alonkelemo.

¹⁵ Ivikacita umuntu iciwelewele wene akalola kwati ivisuma, lelo uwamano akauvwa umpandamano uku antu.

¹⁶ Ukusoka kwa ciwelewele kukamanyika zuwa, lelo uwa mano wene akasuula nanti yamutuke uli.

¹⁷ Kavwanga wa cumi ali kambone wa cisinka, lelo imboni yaufi ikatumpoka sile.

¹⁸ Akacincila ukuvwanga, ivivwangwa vyakwe vikatota wa mupeni. Lelo amazwi ya muntu wa mano yali wa mulembo ku antu avule.

¹⁹ Amazwi ya cumi yakaikalilila umuyayaya, lelo ivyantumpu vyene visilengela.

²⁰ Umu myenzo ya antu akapangana iviipe mwazula ivyaufi vitupu, lelo mu myenzo ya antu akalangulukilana yene mwaya insansa nu lukundo.

²¹ Umuntu musuma intazi zisimuponela, lelo umwipe wene intazi zisyatala zimutaluka.

²² Antu antumpu yakasosya Yawe, lelo amutaila yene yakamuzanzya.

²³ Umuntu mucenjele akafisa amano yakwe, lelo iviwelewele vyene vikalanga uwelewele wakwevyo apaswe.

²⁴ Umuntu wino akaombesya alateeka auze, lelo akasu yene lyonsi kwene yalaya azya ya yauze.

²⁵ Ukutwisika kwa muntu kwaya ngi cisendo cinyome mu mwenzo wakwe, lelo amazwi ya mutembo yene yakasansamusya.

²⁶ Kacita wa visuma akatungulula auze ku vyaololoke, lelo inzila zya antu aipe zikaponzya.

²⁷ Umuntu mukasu asizana vino akulonda, lelo uwa muzonda wene akalya akali konsi kano umwenzo wakwe ungalonda nu kukazana.

²⁸ Uololoke ili Inzila ino ikatungulula uku umi, lelo ukwifya ili inzila ino ikatwala ku mfwa.