Malango 31 - Amazwi Yakwe Leza 2013

Yoswa wapelwa malo yakwe Mose pa utunguluzi

¹ Mose watwalilile ukunena aina Izlaeli ati,

² “Ndakai natinkwata imyaka ukulingana 120. Nkuposiwa kuti ningamutungulula ningo. Lelo asi cico conga. Yawe watanena ukuti ntalalamba Luzi lwa Yodani.

³ Yawe Leza winu umwisikulu amamukolelela pa nkolelo nu konona inko zyonsi izikala mwenemo, pakuti mupoke impanga ilya mwikale mwenemo. Yoswa alaya intunguluzi inu, wakwe vino Yawe watavwanga.

⁴ Yawe umwisikulu alamupeela ucimvyo pa antu yaya wakwe vino wacisile kuli Siooni na Ogi, yamwene ya ina Amoli nu konona impanga yao.

⁵ Yawe alamupeela ucimvyo pali aliyo, nga mulinzile ukucita kunoyali wakwe muno imupelile ilamulo.

⁶ Posyini nupya muzyansye. Mutezya ukuyoopa nanti ukuzakaza, pano Yawe Leza winu amaya namwe. Wene atalatala amusye nanti ukumutazyela.”

⁷ Lyene Mose aama Yoswa pa manso ya ina Izlaeli yonsi nga amunena ati, “Uposye nupya uzyansye. Wewe uli nu kutungulula antu yaa ku kupoka impanga ino Yawe walavile ukupeela ku vikolwe vyao, nupya ulinzile ukuyankanya wa caupyanyi cao.

⁸ Yawe umwisikuli amamukolelelanga nupya amayanga namwe. Atalatala amusye nanti ukumutazyela. Mutuvwa intete nanti kutovoka.”

Amasunde yakawelengwe lyonsi ndi papita imyaka cinimbali

⁹ Acino Mose alemba isunde lii lyakwe Leza nga alipeela kuli yasimapepo aina Levi, yao asendanga Mbokosi ya Upangano yakwe Yawe, nu ku ntunguluzi zyonsi zya ina Izlaeli.

¹⁰ Alino Mose ayapeela ilamulo ati, “Lyonsi ndi papita imyaka cinimbali, lino umwaka wa kusuula sile ku nkongole wafika,

¹¹ mulinzile kuwelengela aina Izlaeli isunde lii pa Cimulo ca Nsakwe lino yiiza ku kupepa Yawe pa ncende ino wene wasolola.

¹² Muce mwakonganika antu yonsi, aonsi na anaci nga na ana kwene kumwi na inamasi akaikala mu misumba inu, pakuti yakayuvwile alino yasambilile ukoopa Yawe Leza winu nu kuya atekele pakulondela amazwi yonsi amwi sunde lii.

¹³ Mu musango kwene uu amu mupanda winu yano yatatala yuvwa isunde lii lyakwe Yawe Leza yaluvwa. Nayo ali vino yalasambilila ukumuyela pa manda yonsi yano yalikala mu mpanga ino mwasya mwingile mwenemo mu mbalama ya Luzi lwa Yodani.”

Yawe wanena Mose amazwi akusyalikizya

¹⁴ Lyene Yawe anena Mose ati, “Utakweti lyene amanda avule pano pansi. Wasya ufwe. Aama Yoswa mulete kuno mwi Taalu lya Ukongano pakuti imupele amazwi ya utunguluzi akusyalikizya.” Acino Mose na Yoswa iyaya kwi Taalu lya Ukongano.

¹⁵ Nga Yawe aloleka kunoyali kuku mu mvumba yi kumbi lino limilile pipi pa mulyango wi Taalu.

¹⁶ Yawe anena Mose ati, “Wasya ufwe nupya ndi wafwa antu yaa yalansangukila nu kutandika ukupepa tuleza twamu mpanga ino yasya yingile mwenemo.

¹⁷ Lino cico icamwata uwo cilacitika indayasokela cuze. Indayatazyela cakuti lyene nu kuzanzwa yalazanzwa. Lino amazanzo avule yalayacitikila ali lino yalamanya ukuti ivintu vii vikuyacitikila pamulandu wakuti nene, ne Leza wao, insi nayo nupya.

¹⁸ Nani ndakana ukuyazwilizya pamulandu wa nkota zyao mu kumfutatila nu kupepa tuleza tuze.

¹⁹ “Ali cino fwandi wemo lemba ulwimbo luu. Ulusambilizye ku ina Izlaeli pakuti luce luye alukambone kunoyali.

²⁰ Lino ndaingizya mu mpanga ii ivunde nupya iyauzombozi cuze, impanga ino nalavile nu mulapo ukuipela ku vikolwe vyao, na lino yalalya nu kwikuta nu kwina, yalasenukila kuli tuleza tuze nu kutupepa. Nemo yalankana nu konona upangano wane.

²¹ Alino lyene amazanzo avule aipisye pamwi na macuzi vilayaponela. Lelo ulwimbo luu luliimbwa nu kuya umboni uwakuyasinila, pamulandu wakuti amu mupanda wao yatalalwilila. Ali vino navikwene natimanya vino yakwelenganya nanti ntacili njingizye mu mpanga ino nalavile nu mulapo ukuyapeela.”

²² Mu wanda kwene ulya Mose walemvile ulwimbo nu kulusambilizya ku ina Izlaeli.

²³ Lyene Yawe apeela ilamulo lii kuli Yoswa umwana umonsi wakwe Nuni, ati, “Uposye nupya uzyansye. Pano wewe uli nu kutungulula aina Izlaeli ku kupoka impanga ino nayalavile nu mulapo, nga nani namayanga nawe.”

²⁴ Lino Mose wamala kulemba amazwi yaa ya malamulo mu lupapulo, umukutekela cuze pa kukanasya nanti kamwi,

²⁵ apeela ilamulo lii ku ina Levi yakasenda ya Mbokosi ya Upangano yakwe Yawe ati,

²⁶ “Tolini lupapulo luu lwa masunde yakwe Yawe mulwike pambali ya Mbokosi ya Upangano yakwe Yawe Leza winu, pakuti lukasyale papa kwene wa umboni wakusinila antu yakwe.

²⁷ Natimanya ukutalama na ucisanguka wao vino waya. Yene yasangukila Yawe lino nemo ncili nu umi. Nupya mulalusya ukumusangukila pacisila ca mfwa yane.

²⁸ Nkolonganikile aikolo nga ni ntunguluzi zyonsi zyamu mitundu inu, pakuti njanene amazwi yaa. Nemo naama amu mayulu na pano pansi ukuya yakambone akuyasinila.

²⁹ Natimanya ukuti pacisila ca mfwa yane antu mulaya yakacita ya nkota nupya mulakana ivintu vino namusambilizya. Nga ukunkolelo amazanzo yalamuponela, pamulandu wakuti mwemo mulacita ivintu ivilalenga ukuti Yawe asoke, vino wene walesya.”

Ulwimbo lwakwe Mose

³⁰ Lyene fwandi Mose ali pakusaula ulwimbo lonsi aimba ala aina Izlaeli yonsi yakuvwa.